1 Moze 27:1-46
27 Me no atua Gizaʼaki ba lö iʼila-ila niha, ikaoni nononia siaʼa sotöi Ezau,+ ”He onogu!” Itema li, ”Hana Pa!”
2 Itohugö wehede Izaʼaki, ”No atua ndraʼo saʼae, ba lö uʼila hawaʼara matedo.
3 Iadaʼa, halö dohomö awö wana nifosinali, aeʼe ba mbenua, alui ögu gutu ndruʼu.+
4 Ba haogö wondrino enaʼö omasido wemanga ba ohe ba daʼa. Yaʼo dania zi manga, ba ufahowuʼö ndraʼugö fatua lö matedo.”
5 Ba mofanö Gezau ba wangalui ahulua. Hizaʼi, no irongo Rebeka me fahuhuo Gizaʼaki khö Gezau.+
6 Andrö imane Rebeka khö Yakobo,+ ”Awena sibai urongo me iwaʼö bapamö khö gaʼau Ezau,
7 ’Ohe ögu ba daʼa gahulua ba haogö wondrino. Yaʼo dania zi manga, ba ufahowuʼö ndraʼugö föna Yehowa fatua lö matedo.’+
8 Fondrondrongo wehedegu onogu, ba falua niwaʼögu khöu.+
9 Halö dua ngaʼeu nono nambi fondrege zi sökhi ba guriföda. Uhaogö dania wondrino simane somasi bapamö.
10 Ba aeʼe fasao khö bapamö enaʼö iʼa ba ifahowuʼö ndraʼugö fatua lö mate ia.”
11 Imane Yakobo khö ninania Rebeka, ”Hewisa daʼö mama, abölö mbu Gezau,+ na yaʼodo, alösö guli.
12 Hewisa na igogohe ndraʼo bapagu?+ Iwalinga dania ulimo ia, ba hasambalö wa iʼelifi ndraʼo tenga ifahowuʼö.”
13 Imane inania, ”Böi abusi tödö onogu, yaʼo dania zoluʼi fangelifi daʼö. Falua manö hadia niwaʼögu. Halö nono nambi andrö.”+
14 Möi ia ihalö nono nambi andrö ba ifasao khö ninania. Irino inania gö sami somasi bapania.
15 Aefa daʼö, möi Rebeka wangai nukha Gezau sabölö baga si no iʼiröʼö ba nomo, ba ibeʼe daʼö khö Yakobo enaʼö ifake.+
16 Ibeʼe nasa guli nambi daʼö ba danga Yakobo hegöi ba mbaginia börö me lö hadöi bu.+
17 Ba ibeʼe khö nononia Yakobo gö sami si no irino andrö awö roti nifazökhinia.+
18 Möi Yakobo wamalukhaisi amania imane, ”He Pa!” Itema li, ”Hana onogu? Ezau ndraʼugö ma Yakobo?”
19 Imane Yakobo, ”Yaʼodo Ezau, onomö siaʼa.+ No ufalua niwaʼömö. Odadao Pa, a gahuluagu andre enaʼö öfahowuʼö ndraʼo.”+
20 Imane Izaʼaki, ”Alio sibai ahulu ndraʼugö onogu.” Imane Yakobo, ”No itolo ndraʼo Lowalangi Yehowa.”
21 Imane Izaʼaki, ”Aine ba daʼa onogu, akha ugogohe ndraʼugö. Omasido uʼila hadia sindruhu-ndruhu Ezau ndraʼugö mazui tenga.”+
22 Ifahatö ia Yakobo khö namania Izaʼaki. Me no igogohe, imane Izaʼaki, ”Linia li Yakobo, ba tangania tanga Gezau.”+
23 Lö aboto ba dödö Gizaʼaki wa Yakobo daʼö börö mbu dangania simane tanga gaʼania Ezau. Andrö wa ifahowuʼö ia Izaʼaki.+
24 Aefa daʼö manofu Gizaʼaki, ”Hadia sindruhu Ezau ndraʼugö?” Imane Yakobo, ”Sindruhu Pa.”
25 Imane Izaʼaki, ”Ohe ba daʼa gahuluamö enaʼö uʼa ba ufahowuʼö dania ndraʼugö.” Ba möi ifasao Yakobo gö khö namania awö nagu, ba manga Gizaʼaki ba mamadu ia.
26 Imane Izaʼaki, ”Aine ba daʼa onogu, umado.”+
27 Ifahatö ia ba iʼuma namania irege tola iʼago Izaʼaki hua mbarunia.+ Ba ifahowuʼö ia Izaʼaki,
”Hua nonogu simane faʼomuhua mbenua nifahowuʼö Yehowa.
28 Yaʼibeʼe khöu Lowalangi sindruhu namo mbanua moroi si yawa+ ba tanö satabö sinanö ba gulidanö,+ awö mbua nowi hegöi agu si bohou si no fahöna.+
29 Dozi dania mado ba ngawalö soi tobali enoniu ba mangalulu ira khöu. Tobali ndraʼugö dania samatörö ira talifusöu ba mangalulu ira khöu.+ Göna fangelifi dozi niha sangelifi yaʼugö, ba tefahowuʼö dozi niha samahowuʼö yaʼugö.”+
30 Me awena sibai awai ifahowuʼö Yakobo andrö Izaʼaki, ba awena göi mofanö Yakobo iröi namania, iʼanemaiʼö mangawuli wealu gaʼania Ezau.+
31 Irino göi gö sami Ezau ba möi ifasao khö namania imane, ”Odadao Pa, a gahuluagu andre enaʼö öfahowuʼö ndraʼo.”
32 Manofu Gizaʼaki, ”Haniha ndraʼugö?” Imane, ”Yaʼodo Ezau, onomö siaʼa.”+
33 Ba tokea sibai dödö Gizaʼaki irege manizi mbotonia imane, ”Na simanö, haniha zi möi malu andrö mege ba solohe khögu ba daʼa ahuluania? Fatua lö tohare ndraʼugö, ba no uʼa. No ufahowuʼö ia, yaʼia zanema howu-howu!”
34 Me irongo daʼö Ezau, abu sibai dödönia. Muʼao ia, ”Fahowuʼö ndraʼo, fahowuʼö ndraʼo Pa!”+
35 Imane amania, ”No ilimo ndraʼo akhiu irege khönia möi howu-howu nibeʼegu khöu menaʼö.”
36 Imane Ezau, ”Daʼö mbörö wa labeʼe töinia Yakobo.* No dua kali irabu dana khögu.+ No ihalö waʼasiaʼagu,+ iadaʼa ihalö göi howu-howu nibeʼe khögu!”+ Imane nasa, ”Hadia so howu-howumö tanö böʼö Pa si tola öbeʼe khögu?”
37 Imane Izaʼaki, ”No ufataro ia tobali samatörö yaʼugö,+ ba tobali enoninia fefu ndra talifusönia. No göi ubeʼe khönia mbua nowi awö nagu si bohou.+ Lö hadöi saʼae si tola ubeʼe khöu onogu.”
38 Imane Ezau, ”Hadia tebai öbeʼe khögu howu-howu andrö Pa, hewaʼae na ha sambua? Fahowuʼö ndraʼo, fahowuʼö ndraʼo Pa!” Iduhugö wege-ege Ezau.+
39 Imane Izaʼaki,
”Tenga dania ba danö satabö sinanö toröi ndraʼugö, ba lö ösöndra namo mbanua moroi si yawa.+
40 Öʼogunaʼö wöda sandrohu faʼaurimö+ ba tobali enoni nakhiu dania ndraʼugö.+ Hizaʼi, na tebai ötaha, tola öheta ndraʼugö khönia.”*+
41 Lua-luania, afökhö sibai dödö Gezau khö Yakobo börö me Yakobo zanema howu-howu namania.+ Imane tödönia Ezau, ”Lö ara tö, mate namagu. Aefa daʼö, ubunu Yakobo.”+
42 Me irongo Rebeka niʼera-era Gezau, iʼanemaiʼö ikaoni Yakobo imane, ”Fondrondrongo, edöna ibunu ndraʼugö gaʼamö Ezau börö waʼafökhö dödönia khöu.*
43 Iadaʼa, oʼö niwaʼögu. Faʼanö ndraʼugö ba oloi ba Harana khö gaʼagu Labano.+
44 Ba daʼö iagö gasa-gasa irugi alö wönu gaʼamö,
45 ba lö mofönu ia khöu saʼae irege olifu ia nifaluamö khönia. Ba ufatenge dania niha samaondragö yaʼugö. Lö omasido na ha samuza waʼamatemi.”
46 Ba no hauga kali iwaʼö Rebeka khö Gizaʼaki, ”Tefakao waʼaurigu börö ndra alawe niha Kheti andrö.+ Na mangowalu göi Yakobo khö ndra alawe niha Kheti simane daʼö ba soi daʼa, sökhi manö matedo.”+
Nisura ba gahe zura
^ Eluahania ”Niha Sondraʼu Börö Sisi; Samadöni Dadaoma”.
^ Sin.: ”tola öfatö kalo mbagi andrö khönia moroi ba mbagimö”.
^ Mazui ”ihalö khönia waʼahono dödö ba iʼera-era wamunu yaʼugö”.
