1 Moze 32:1-32
32 Itohugö wofanönia Yakobo ba falukha ia khö ndra malaʼika Lowalangi.
2 Me iʼila ira imane Yakobo, ”Ose Lowalangi daʼa!” Daʼö mbörö wa ifotöi nahia daʼö Mahanaʼi.*
3 Ifatenge ngoni-ngoninia Yakobo ba wamalukhaisi gaʼania Ezau ba danö Zeʼira+ ba mbanua Gedomo.+
4 Iwaʼö khöra, ”Fatunö khö Gezau sokhö yaʼo goroisa zawuyunia Yakobo imane, ’No ara toröi* ndraʼo khö Labano.+
5 Iadaʼa so khögu zawi, kalide, biri-biri hegöi sawuyu ira matua ba sawuyu ira alawe.+ Wa ufaʼema goroisa daʼa enaʼö ötemaʼö ndraʼo si fao faʼomuso dödö.’”
6 Lamane ira niha nifatenge Yakobo andrö me mangawuli ira, ”No falukha ndraʼaga gaʼamö Ezau, ba no fao khönia zi 400 niha, möi ira ba daʼa ba wamalukhaisi yaʼugö.”+
7 Ataʼu Yakobo ba mangiwa dödönia.+ Andrö ibagi dua ngawawa zi fao khönia, simanö göi nambi, biri-biri, sawi ba ondra.
8 Mangera-ngera ia, ’Na isuwö ngawawa si sambua Ezau, ba tola nasa moloi ngawawa tanö böʼö.’
9 Aefa daʼö mangandrö Yakobo, ”He Yehowa Lowalangi nifosumange duagu Aberahamo ba Lowalangi namagu Izaʼaki, yaʼugö zangumaʼö khögu enaʼö mangawulido ba soigu hegöi ba nösi nomogu, ba no fawuʼu li ndraʼugö khögu wa öfahowuʼö ndraʼo.+
10 Tenga sinangea ndraʼo wanemaʼö faʼomasiu si lö faröi ba faʼasökhi dödöu nifaluamö khögu.+ Me uʼötö Nungo Nidanö Yoridano mböröta, ha sara ziʼogu. Iadaʼa, no tobali dombua ngawawa nösi nomogu.+
11 Uʼandrö khöu,+ efaʼö ndraʼo ba danga gaʼagu Ezau. Ataʼudo na tohare ia ba isuwö ndraʼo+ hegöi ira alawe awö ndraono si fao khögu.
12 No öwaʼö, ’Hasambalö ufahowuʼö ndraʼugö ba uʼoyaʼö maʼuwumö simane faʼoya gawu ba nasi si tebai muʼerai.’”+
13 Ba daʼö mörö Yakobo bongi daʼö. Ihalö ösa gurifönia ibeʼe khö gaʼania Ezau,+
14 yaʼia daʼö 200 ngaʼeu nambi si alawe, 20 ngaʼeu nambi si matua, 200 ngaʼeu mbiri-biri si alawe, 20 ngaʼeu mbiri-biri si matua,
15 tölu ngafulu ngaʼeu gondra si alawe fao nono, 40 ngaʼeu zawi si alawe, 10 ngaʼeu zawi si matua, 20 ngaʼeu galide si alawe, ba 10 ngaʼeu galide si matua.+
16 Ibagi fefu gurifö daʼö tobali hauga ngawawa ba ibeʼe khö ndra sawuyunia. Imane khöra, ”Yaʼami zi oföna mangötö ua, ba mifoʼotalua ami ba ngawawa si so furimi.”
17 Iwaʼö ba niha sangagö tanö föna, ”Na falukha ami gaʼagu Ezau, ba manofu ia haniha zokhö yaʼami, hezo möi ami, ba haniha zokhö ngawawa daʼa,
18 mimane khönia: ’Khö zawuyumö Yakobo. Yaʼe mbualania khöu Pa,+ ba moroi furima so Yakobo.’”
19 Iwaʼö göi zimane daʼö ba niha sanarogö ngawawa si dua, si tölu, ba ngawawa tanö böʼönia, ”Daʼö wehedemi dania khö Gezau na falukha ami khönia.
20 Miwaʼö göi khönia wa so moroi furi zawuyumö Yakobo.” Oföna ifaʼoheʼö mbuala andrö Yakobo enaʼö omuso dödö Gezau,+ irege na falukha ira dania, ihaogö wanemaʼö yaʼia Ezau si fao faʼomuso dödö.
21 Ba oföna laʼötö nidanö ira sawuyunia solohe buala andrö, ba toröi ia nasa ba nose bongi daʼö.
22 Maoso ia bongi daʼö ba iʼohe woʼomonia si darua,+ sawuyunia ira alawe si darua,+ ba 11 nononia matua, laʼötö nahia götöna ba Nungo Nidanö Yaboko.+
23 Iʼohe fefu ira awö haratonia ba laʼötö nungo nidanö andrö.
24 Me hatö samösa Yakobo, tohare samösa ndra matua* ba fasöndra ira ofeta tumbu luo.+
25 Me iʼila ira matua daʼö wa tebai ilawa Yakobo, andrö igogohe döla zola Yakobo irege todege döla zolania me fasöndra ira ndra matua daʼö.+
26 Imane ira matua daʼö, ”Efasi ndraʼo, no ibörögö tumbu luo.” Imane Yakobo, ”Fahowuʼö ndraʼo ua awena uʼefasi ndraʼugö.”+
27 Imane ira matua daʼö, ”Haniha döimö?” Imane, ”Yakobo.”
28 Imane khönia ira matua daʼö, ”Iʼotarai iadaʼa, tenga saʼae Yakobo döimö, hizaʼi Izaraʼeli,*+ börö me no fasöndra ndraʼugö khö Lowalangi+ hegöi ba niha, ba yaʼugö zi möna.”
29 Imane Yakobo, ”Uʼandrö khöu, fatunö khögu haniha döimö.” Imane khönia, ”Hana wa omasiʼö öʼila döigu?”+ Aefa daʼö, ifahowuʼö Yakobo.
30 Daʼö mbörö wa ifotöi nahia daʼö Yakobo, Fenieli.*+ Imane, ”No faʼila bawa ndraʼo khö Lowalangi* ba lö si mate ndraʼo.”+
31 No saʼae tumbu luo me mofanö Yakobo iröi Wenueli.* No ikela-kela wofanö börö me no todege döla zolania.+
32 Daʼö mbörö wa irugi maʼökhö lö laʼa nuo waha gurifö iraono Gizaraʼeli, yaʼia daʼö si so ba gotalua zola, börö me no igogohe ira matua daʼö nuo döla zola Yakobo.
Nisura ba gahe zura
^ Eluahania ”Dombua Nose”.
^ Mazui ”fatewu”.
^ Ira matua daʼa malaʼika si tobali niha.
^ Eluahania ”Niha si Fasöndra (Fatandro) khö Lowalangi” mazui ”Fasöndra Lowalangi”.
^ Eluahania ”Bawa Lowalangi”.
^ Eluahania malaʼika si tobali tenge-tenge Lowalangi.
^ Mazui ”Fenieli”.
