1 Moze 33:1-20
33 Moroi ba zaröu, iʼila Yakobo wa so moroi sa Gezau fao khönia ndra matua si 400 niha.+ Isarakö ndraononia ba danga Lea, Rakhela, ba sawuyunia ira alawe si darua.+
2 Tanö föna sibai ibeʼe zawuyunia ira alawe hegöi iraonora,+ itete Lea awö ndraononia,+ ba tanö furi sibai Rakhela+ faoma Yosefo.
3 Aefa daʼö, ihulö ira wofanö Yakobo ba wangondrasi gaʼania. Ba wofanö-fanönia, ifaöndrö ia tou ba danö fitu kali.
4 Ba fagohi Gezau wamalukhaisi yaʼia, italagui ba iʼuma nakhinia, ba lalau meʼe.
5 Me iʼila ndra alawe awö ndraono, manofu Gezau, ”Haniha zi fao khömö andre?” Imane Yakobo, ”Yaʼira andrö iraono nibeʼe Lowalangi khö zawuyumö andre.”+
6 Ba laʼondrasi ia ira sawuyu ira alawe andrö, laʼohe nonora ba latuhi danö.
7 Ba möi föna Lea iʼohe ndraononia ba latuhi danö. Simanö göi Yosefo faoma Rakhela, latuhi danö.+
8 Imane Ezau, ”No falukha ndraʼo ba niha nifatengeu. Hana wa öfalua daʼö?”+ Imane Yakobo, ”Enaʼö tola ötemaʼö ndraʼo si fao faʼomuso dödö.”+
9 Imane Ezau, ”No oya gokhötagu akhigu,+ fuli manö ohe gokhötamö andre.”
10 Imane Yakobo, ”Böi zi lö ötema. Na sindruhu omasiʼö falukha khögu ba tema mbualagu andre. Wa uʼohe daʼa enaʼö tola faʼila bawa ita, ba me no falukha ita hulö zi no faʼila bawa ndraʼo khö Lowalangi, börö me no ötemaʼö ndraʼo si fao faʼomuso dödö.+
11 Uʼandrö khöu, tema mbualagu andre niʼohegu khöu+ börö me no ifahowuʼö ndraʼo Lowalangi ba lö moʼamböta ndraʼo.”+ Iforege wangumaʼö Yakobo khö Gezau irege itema Ezau.
12 Aefa daʼö imane Ezau, ”Aine, mofanö ita, taröi daʼa. Akha yaʼo tanö föna.”
13 Imane Yakobo, ”Öʼila wa no igide-ide ndraonogu+ ba no uʼohe mbiri-biri hegöi nambi si bohou moʼono. Na muʼalio-liokö wolohe yaʼira ba zi maʼö-maʼökhö, ahori mate fefu.
14 Tola ödari-dari wofanö, yaʼugö sokhö yaʼo. Madaʼi-daʼi wofanö moroi furi ba woloʼö urifö hegöi iraonogu irege ofeta ndraʼaga ba mbanua zokhö yaʼo ba Zeʼira.”+
15 Imane Ezau, ”Na simanö, akha fao khöu ösa zawuyugu andre.” Hizaʼi imane Yakobo, ”Böi saʼae. No ötemaʼö ndraʼo si fao faʼomuso dödö. Tobönö khögu daʼö.”
16 Ba mangawuli Gezau maʼökhö daʼö ba Zeʼira.
17 Mofanö Yakobo ba Zukhota+ ba ifazökhi sambua nomo ba daʼö. Ifazökhi göi kandra gurifönia. Daʼö mbörö wa ifotöi nahia daʼö Sukhota.*
18 Me no mofanö Yakobo moroi ba Wadana-aramo,*+ lö hadia ia khönia me irugi mbanua Zikhema+ ba danö Ganaʼana.+ Ifasindro nosenia ahatö ba mbanua daʼö.
19 Iʼöli danö moroi khö ndraono Hemori, ama Zikhema, bölinia 100 ngawua firö. Ba daʼö ifasindro nosenia.+
20 Ifasindro sambua naha wanunu sumange ba daʼö ba ibeʼe töi ”Lowalangi andrö Lowalangi Gizaraʼeli”.+
Nisura ba gahe zura
^ Eluahania ”Ose-Ose; Kandra-Kandra”.
^ Eluahania ”Tanö Saloʼo Aramo (Siria); banua ba Mezofotamia”.
