1 Moze 34:1-31
34 Ono alawe si tumbu khö Yakobo faoma Lea+ sotöi Dina, asese fariawö ia ba* ndraono alawe soi daʼö.+
2 So ba daʼö ndra matua sotöi Sikhema ono Hemori niha Hewi,+ sondröniaʼö ba soi andrö. Me iʼila ia Sikhema, iʼoloiʼö Dina andrö aefa daʼö ihoröni.
3 Me no ifalua daʼö, lö fabali dödönia khö Dina ono Yakobo. Omasi ia ba lö iböhöli wangai tödö nono alawe andrö.
4 Andrö imane Sikhema khö namania Hemori,+ ”He Pa, beʼe li khö nono alawe daʼö enaʼö tobali ia foʼomogu.”
5 No irongo Yakobo wa no ihoröni nononia Dina andrö Sikhema. Me luo daʼö, ba mbenua so ndraononia matua ba wokubaloi urifö. Ba lö hede-hede Yakobo irege no mangawuli ira fefu.
6 Lö ara, tohare Hemori ama Zikhema möi ia wamalukhaisi Yakobo ba fahuhuo ira.
7 Me larongo zalua andrö iraono Yakobo, iʼanemaiʼö mangawuli ira moroi ba mbenua. Afökhö dödöra ba mofönu sibai ira börö me no iʼasogö wangaila sebua Sikhema ba ndraono Gizaraʼeli me ihoröni nono Yakobo.+ Tenga sinangea alua menaʼö daʼö.+
8 Imane khöra Hemori, ”Omasi sibai nonogu Sikhema nonou alawe. Tehegö nonomö tobali foʼomo nonogu.
9 Datafakhai waʼasitenga böʼö ba tafangowalu ira, mibeʼe khöma nonomi alawe tobali foʼomoma, ba mabeʼe khömi nonoma alawe tobali foʼomomi.+
10 Tola toröi ami khöma ba utehegö khömi danö daʼa. Tola mogale ami ba miʼiagö daʼa.”
11 Imane Sikhema khö Yakobo hegöi khö ndra talifusö Dina, ”Asala miʼoʼö wehedegu, ubeʼe khömi hadia manö niʼandrömi.
12 Gofu hawaʼebua mböwö miʼandrö ba hadia manö zomasi ami,+ hasambalö ubeʼe asala mitehegö tobali foʼomogu nono alawe daʼö.”
13 Börö me no ihoröni Sikhema nakhira Dina, tumbu ba dödö ndraono Yakobo ba wolimo Sikhema hegöi amania.
14 Lamane khö ndra niha si darua andrö, ”Tebai mabeʼe dalifusöma alawe khö ndra matua si lö nisuna,*+ börö me fangaila sebua ba khöma daʼö.
15 Awena tola matehegö na miʼoʼö niʼandröma khömi: misuna fefu ndra matua ba khömi simane yaʼaga.+
16 Awena dania mabeʼe khömi nonoma alawe ba mahalö göi nonomi alawe ba mowanua ita ba daʼa tobali sambua soi.
17 Hizaʼi, na lö fao dödömi ba lö omasi ami nisuna, mahalö nakhima ba mofanöga ba daʼa.”
18 Fao dödö Hemori+ hegöi ononia Sikhema ba niʼandröra andrö.+
19 Iʼanemaiʼö ifalua niʼandröra andrö+ Sikhema börö waʼomasinia khö nono Yakobo. Ba nösi nomo namania, ha yaʼia zabölö mufosumange.
20 Möi Hemori faoma Sikhema ba mbawa göli mbanua ba fahuhuo ira khö ndra matua sato ba mbanuara,+
21 ”Omasi ndra niha daʼa mangatulö ira khöda. Mitehegö khöra toröi ba daʼa ba akha mogale ira, börö me ebolo nasa danö ba soi daʼa. Tola mangowalu ita khö nonora alawe ba tola göi mangowalu ira khö nonoda alawe.+
22 Fao dödöra wangiagö daʼa enaʼö ha sambua soi ita asala taʼoʼö niwaʼöra: Fefu ndra matua ba gotaluada, lö tola löʼö lasuna simane yaʼira.+
23 Tobali dania tana khöda gokhötara, uriföra, ba fefu zi so khöra. Aine, dataʼoʼö niwaʼöra enaʼö omasi ira wangiagö daʼa.”
24 Fefu ndra matua si no owulo ba mbawa göli, fao dödöra ba wehede Hemori hegöi ononia Sikhema, ba lasuna fefu ndra matua ba mbanua daʼö.
25 Hizaʼi, tölu hari aefa daʼö me lö si döhö ira nasa, lahalö wödara iraono Yakobo si darua yaʼia daʼö Simeoni faoma Lewi talifusö Dina.+ Möi ira ba mbanua daʼö lö hede-hedera irege lö manahö dödö niha, labunu fefu ndra matua ba daʼö.+
26 Labunu göi Hemori faoma Sikhema, ba lahalö Dina moroi ba nomo Zikhema ba mofanö ira.
27 Tohare ndraono Yakobo tanö böʼö ba wamaigi nibunu andrö. Larabu mbanua daʼö börö me no lahoröni nakhira.+
28 Lahalö nambi, biri-biri, sawi, kalide, ba gofu hadia zi so yomo ba mbanua hegöi ba kabu.
29 Lahalö fefu gokhöta, laʼoloiʼö ndraono si gide-ide awö woʼomo ndra matua sato, ba larabu fefu zi so ba nomo.
30 Imane Yakobo khö Zimeoni faoma Lewi,+ ”No mifobörö khögu wangala.* Ha börö-börö ami, laʼuduni ndraʼo ira niha Ganaʼana hegöi niha Weresi si toröi ba daʼa. Lö atoto ita, ba hasambalö laʼosaraʼö dödöra ba wanuwö hegöi ba wamunu yaʼo ba fefu nösi nomoda.”
31 Lamane khönia, ”Haniha zangumaʼö khöra wa labaliʼö ira alawe sohorö-horö nakhima?”
Nisura ba gahe zura
^ Mazui ”asese ifalukhaisi”.
^ Sin.: ”si lö mutaba uli wamatua”.
^ Mazui ”Latiboʼo ndraʼo banua börö ami”.
