1 Moze 35:1-29
35 Aefa daʼö, imane Lowalangi khö Yakobo, ”Aeʼe ba Mbetieli,+ ba daʼö iagö ba fazökhi naha wanunu sumange khö Lowalangi sindruhu, samalukhaisi yaʼugö me moloiʼö börö gaʼamö Ezau.”+
2 Andrö imane Yakobo ba nösi nomonia hegöi ba niha si fao khönia fefu, ”Mitiboʼö nadu lowalangi faya andrö si so khömi+ ba miʼamoniʼö ami, mitukari nukhami.
3 Möi ita ba Mbetieli. Ufazökhi naha wanunu sumange khö Lowalangi sindruhu ba daʼö, yaʼia zamondrondrongo fangandrögu me tosasa ndraʼo ba lö faröi ia khögu gofu hezo möi ndraʼo.”*+
4 Ba labeʼe ba danga Yakobo fefu nadu lowalangi faya andrö khöra awö gati-ati ba dalingara, ba möi ikoʼo* fefu daʼö Yakobo barö geu sebua sahatö ba Zikhema.
5 Sagötö fofanöra, agataʼu khöra niha ba mbanua daʼö ibeʼe Lowalangi irege lö si barani ba wolohi iraono Yakobo.
6 Ba ofeta Yakobo awö niha si fao khönia fefu, larugi Lusi+ yaʼia daʼö Betieli ba danö Ganaʼana.
7 Ifazökhi sambua naha wanunu sumange ba daʼö ba ibeʼe töi nahia daʼö Eli-mbetieli,* börö me no irai ifalukhaisi ia Lowalangi ba daʼö me moloi ia börö gaʼania.+
8 Ba gafuriata, mate Debora+ sondrorogö Rebeka. Lakoʼo ia ahatö ba Mbetieli ba narö geu sebua.* Daʼö mbörö wa ifotöi nahia daʼö Yakobo, Aloni-baku.*
9 Ba wofanö Yakobo moroi ba Wadana-aramo,* ifuli zui ifalukhaisi ia Lowalangi ba wamahowuʼö yaʼia.
10 Imane Lowalangi, ”Töimö Yakobo,+ hizaʼi lö saʼae lakaoni khöu Yakobo. Iʼotarai iadaʼa labeʼe töimö Izaraʼeli.” Ibörögö ikaoni khönia Lowalangi, Izaraʼeli.+
11 Imane nasa Lowalangi, ”Yaʼodo Lowalangi Fondrege Zabölö.+ Miʼoʼono ba miʼoyaʼö ami. Tobali dania ndraʼugö ama ba ngawalö soi,+ ba moroi ba maʼuwumö* dania tumbu razo-razo.+
12 Tanö nibeʼegu khö Gaberahamo hegöi Izaʼaki, ubeʼe dania khöu hegöi ba maʼuwumö.”+
13 Ba mofanö Lowalangi me no awai fahuhuo ia khö Yakobo.
14 Ifasindro sambua gara fanörö tödö Yakobo ba gamaudu fahuhuo khönia Lowalangi. Iduwagö zumange nibadu hegöi fanikha yawa ba dete gara andrö.+
15 Ba lö tebulö ifotöi Yakobo nahia daʼö Betieli,+ börö me ba daʼö fahuhuo khönia Lowalangi.
16 Ba mofanö ira moroi ba Mbetieli. Me so ira ba dalu lala, fandröndröu nasa moroi ba Geferata, irugi inötö khö Rakhela ba woʼono. Hizaʼi, marase sibai ia ba woʼononia andrö.
17 Me iforege wangöʼögö ononia, imane khönia niha sanolo ira alawe soʼono, ”Böi ataʼufi, tumbu khöu zui nono matua.”+
18 Ba gafuriata waʼaurinia* (me arakhagö mate ia), ibeʼe töi nononia andrö Benoni,* hizaʼi ikaoni ia amania Beniami.*+
19 Ba mate Rakhela, lakoʼo ia ba lala numalö ba Geferata, yaʼia daʼö Betilekhema.+
20 Ibeʼe sambua gara sebua Yakobo ba dete lewatönia. So manö gara daʼö ba dete lewatö Rakhela irugi maʼökhö.
21 Aefa daʼö, mofanö Gizaraʼeli ba ifasindro nosenia tanö yefo Malige Gederi.
22 Samuza inötö me toröi Gizaraʼeli ba danö daʼö, forudu mörö Rubeno khö Mbiliha foʼomo namania ba döi, ba no irongo Izaraʼeli zalua andrö.+
So 12 nono matua khö Yakobo.
23 Ono matua si tumbu khö Lea yaʼia daʼö Rubeno+ siaʼa nono Yakobo, awena Simeoni, Lewi, Yehuda, Isasari, ba Sebuloni.
24 Ono matua si tumbu khö Rakhela yaʼia daʼö Yosefo ba Beniami.
25 Ono matua si tumbu khö Mbiliha sohalöwö khö Rakhela yaʼia daʼö Dano ba Nafetali.
26 Ono matua si tumbu khö Zilifa sohalöwö khö Lea yaʼia daʼö Gado ba Aseri. Daʼö nono matua si tumbu khö Yakobo ba danö Wadana-aramo.*
27 Iadaʼa, ofeta Yakobo ba nomo namania Izaʼaki ba Mamere,+ ba Giriati-araba, yaʼia daʼö Heberona. Ba daʼö toröi Gaberahamo faoma Izaʼaki, tobali ira niha si fatewu.+
28 Faʼanau noso Gizaʼaki irugi 180 fakhe.+
29 Ba mate Gizaʼaki ba laʼorudugö ia ba zinga ndra tuania.* Anau nosonia ba owua-wua dödönia. Ba lakoʼo ia iraononia Ezau hegöi Yakobo.+
Nisura ba gahe zura
^ Mazui ”ba lala nitörögu”.
^ Mazui ”ibiniʼö”.
^ Eluahania ”Lowalangi Mbetieli”.
^ Mazui ”eu ek”.
^ Eluahania ”Eu Ek Wangeʼesi”.
^ Eluahania ”Tanö Saloʼo Aramo (Siria); banua ba Mezofotamia”.
^ Sin.: ”ba löwi-löwiu”.
^ Eluahania ”Ono Danga Kambölö”.
^ Eluahania ”Ono ba Wangabu Dödögu”.
^ Mazui ”Me aetu nosonia”.
^ Eluahania ”Tanö Saloʼo Aramo (Siria); banua ba Mezofotamia”.
^ Daʼa amalalata wehede ba woʼamaedolagö faʼamate.
