1 Moze 37:1-36
37 Lö ifawuʼa ia Yakobo ba danö Ganaʼana, nahia waʼatoröi namania tobali si fatewu.+
2 Daʼa waö-waö Yakobo.
Me awuyu-wuyu nasa Yosefo+ me 17 fakhe ndröfinia, fao ia wokubaloi biri-biri+ khö ndraono Mbiliha+ ba ono Zilifa+ foʼomo namania. Ifatunö Yosefo khö namania gamuata si lö sökhi nifaluara.
3 Omasi sibai Gizaraʼeli khö nononia Yosefo moroi ba danö böʼö,+ börö me si tumbu ba waʼatuania Yosefo andrö. Daʼö wa ifazökhi mbaru sebua fondrege zi baga* khö nononia Yosefo.
4 Laʼila ira talifusönia wa abölö iʼomasiʼö ia amania, andrö laʼuduni ia ba lö sökhi na mohede ira khönia.
5 Samuza maʼökhö, mangifi Yosefo ba ifatunö khö ndra talifusönia+ irege monönö waʼabao dödöra.
6 Imane khöra, ”Omasido ufatunö khömi wangifigu.
7 Taböbö-böbö gandru ba nowi, ba zi lö mudöna-döna mosindro manö ngamböbö gandru niböbögu ba no ifasui ngamböbö gandru niböbömi ba mangalulu ira khögu.”+
8 Lamane ira talifusönia, ”Makasumö, tobaliʼö razo ba öfatörö ndraʼaga?”+ Börö wangifi nitutunö Yosefo andrö wa monönö waʼabao dödöra khönia.
9 Aefa daʼö, ifuli zui mangifi ia ba ifatunö khö ndra talifusönia, ”No mangifido zui. Ba zi sakali daʼa, luo, baŵa ba 11 ndröfi, oi mangalulu ira khögu.”+
10 Ifatunö khö namania wangifi daʼö hegöi khö ndra talifusönia ba mofönu khönia namania, ”Hadia geluaha wangifimö andrö? Hadia mangalulu khöu namau hegöi inau ba fefu ndra talifusöu?”
11 Ba monönö waʼafökhö dödö ndra talifusönia khönia,+ hizaʼi lö olifu namania zi no itutunö andrö.
12 Samuza maʼökhö, mofanö ndra gaʼania ahatö ba Zikhema+ ba wokubaloi biri-biri namania hegöi nambi.
13 Imane Izaraʼeli khö Yosefo, ”Ahatö ba Zikhema möi ndra gaʼamö wokubaloi biri-biri hegöi nambi. Omasido na möiʼö ba daʼö.” Imane Yosefo, ”Lau Pa!”
14 Imane Izaraʼeli, ”Aeʼe ba daʼö ba faigi hewisa ira, simanö göi mbiri-biri awö nambi khöda. Aefa daʼö, angawuli ba fatunö khögu.” Ba mofanö Yosefo itörö Ndraso Heberona+ numalö ba Zikhema.
15 Lö ara, so samösa zangila yaʼia me ifangörö-ngörö ia wofanö ba mbenua. Isofu khönia niha daʼö, ”Haniha niʼaluimö?”
16 Imane Yosefo, ”Uʼalu-alui ndra gaʼagu. Hadia öʼila hezo lakubaloi guriföma?”
17 Imane niha daʼö, ”No mofanö ira. Urongo mege möi ira ba Ndrotana.” Ba möi Yosefo wamaigi ira gaʼania ba Ndrotana ba so ira ba daʼö.
18 Me laʼila ia moroi ba zaröu, ibörögö laʼalui lala ba wamunu yaʼia.
19 Faoma lamane khö nawöra zamösana, ”Hiza moroi sa tuka zangifi.+
20 Databunu ia ba tafazaumba ba dögi. Tamane dania no iʼa ia utu ndruʼu. Datafaigi dania hadia lua-lua wangifinia.”
21 Me irongo daʼö Rubeno,+ edöna iʼefaʼö Yosefo ba dangara. Imane, ”Böi mibunu ia.”+
22 Itohugö wangumaʼö Rubeno, ”Tafazaumba manö ia ba dögi ba danö si mate andrö. Hizaʼi, böi mibunu ia*+ ba böi mifesokho.”+ Wa iwaʼö daʼö Rubeno, börö me edöna iʼefaʼö Yosefo ba iʼohe khö namania.
23 Lö ara me irugi Yosefo, laraʼu ia ira gaʼania ba laheta mbarunia sebua si baga-baga.+
24 Ba lafazaumba ia ba dögi. Me luo daʼö, lö hadöi idanö ba dögi andrö.
25 Me modadao ira ba manga, laʼila niha Zimaʼeli+ sato si otarai Gileadi numalö ba Miserai. No lafonoro khöra gondra faoma gitö somuhua,* fanikha famayoini, ba uli geu sogitö.+
26 Imane Yehuda khö ndra talifusönia, ”Hadia hareda na no tabunu nakhida ba tabiniʼö nifaluada?+
27 Datafamawa ia+ khö ndra niha Zimaʼeli andrö, böi tahalö tangada wamunu yaʼia. Gofu hewisa, lö tebulö wa akhida ia ba föfö ndroda.” Fao dödöra ba wehedenia.
28 Me latörö ira niha Midiano+ sogale andrö, lahalö Yosefo moroi ba dögi ba lafamawa ia khö ndra niha Zimaʼeli andrö ha 20 ngawua loga firö.+ Ba laʼohe Yosefo ba Miserai.
29 Me ifuli ia Rubeno wamaigi tögi andrö ba lö hadöi bakha Yosefo, isika nukhania.
30 Me möi ifalukhaisi ndra akhinia imane khöra, ”Lö hadöi bakha ono daʼö! Hadia zinangea ufalua?”
31 Lö ara, lataba sageu nambi si matua ba laʼungugö mbaru Yosefo ba ndro gurifö daʼö.
32 Ba lafaʼoheʼö khö namara mbaru sebua andrö lamane, ”Yaʼe nisöndrama. Faigi atö, hadia baru nonomö daʼa mazui tenga.”+
33 Ihaogö wamareso ba imane, ”Baru nonogu daʼa! No iʼa ia utu ndruʼu! No isasawi khögu Yosefo!”
34 Isika nukhania Yakobo ba iʼonukha goni ba löwi-löwinia. Iʼeʼesi nononia ba zi hauga hari.
35 Lö laböhöli iraono Yakobo wondrara tödö namara, hizaʼi lö omasi ia. Imane, ”Uʼeʼesi nonogu irege mate ndraʼo!”*+ Lö iböhöli amania weʼe.
36 Ba Miserai, lafamawa Yosefo ira niha Midiano andrö khö Wotifa,+ sondröniaʼö ba gödo razo Waraʼo hegöi kafalo zanaro.+
Nisura ba gahe zura
^ Mazui ”mbaru sanau si sökhi”.
^ Mazui ”böi mibeʼe baero ndronia”.
^ Mazui ”gitö labdanum”.
^ Mazui ”irege möido mitou ba Syeol!” Faigi ”Syeol” ba Geluaha Ngawua Wehede.
