1 Moze 38:1-30
-
Yehuda hegöi Tamara (1-30)
38 Gasa-gasa daʼö, iröi ndra talifusönia Yehuda ba ifasindro nosenia ahatö ba naha Hira, niha Gadula.
2 Ba daʼö falukha Yehuda khö nono Zua ono alawe ngaʼötö niha Ganaʼana.+ Ihalö foʼomonia ndra alawe daʼö ba orudu ira.
3 Manabina ndra alawe daʼö ba tumbu khönia nono matua. Ifotöi Yehuda nononia daʼö, Ero.+
4 Ifuli zui manabina woʼomonia ba tumbu khönia nono matua, ibeʼe töi Onani.
5 Tumbu khönia zui nono matua, ba ibeʼe töi Sela. Ba Gakhisibi+ so Yehuda me tumbu nono daʼö.
6 Samuza inötö, ifangowalu nononia siaʼa Yehuda sotöi Ero khö Damara.+
7 Hizaʼi, lö sökhi gamuata Gero ono Yehuda andrö föna Yehowa. Börö daʼö, ibunu ia Yehowa.
8 Andrö imane Yehuda khö Gonani, ”Halö foʼomou ndronga gaʼamö ba buʼa woʼömöu börö me foʼomo gaʼamö ia enaʼö mongaʼötö gaʼamö ba khöu.”+
9 Iʼila Onani wa lö lafotöi ngaʼötönia dania nono si tumbu andrö.+ Börö daʼö, na orudu ia khö ndronga gaʼania, iduwagö tou ba danö danömö niha andrö khönia enaʼö lö mongaʼötö gaʼania.+
10 Lö sökhi nifalua Gonani andrö, daʼö mbörö wa ibunu ia Yehowa.+
11 Imane Yehuda khö numönönia Tamara, ”Fuliʼö ba nomo namau ba böi angowalu irege ebua nonogu Sela.” Imane tödönia Yehuda, ’Tola manö mate ia göi simane ira gaʼania si darua.’+ Mangawuli Damara ba toröi ia ba nomo namania.
12 Lö ara aefa daʼö, mate woʼomo Yehuda ono Zua.+ Me no awai ginötönia ba wangeʼesi, mofanö Yehuda ba Dimena+ ba nahia woguti bu mbiri-birinia, fao nawönia Hira niha Gadula andrö.+
13 Lafatunö khö Damara wa ba dalu lala so namania matuania numalö ba Dimena ba woguti bu mbiri-biri.
14 Andrö iheta mbarunia, baru lakha mbanua, ifake nöu, simanö göi lembe ba wombalugö bawania. Aefa daʼö, modadao ia ba mbawa göli Genaʼi ba lala si numalö ba Dimena, börö me no iʼila wa ebua-ebua Zela ba lö nasa lafangowalu ira.+
15 Me iʼila ia Yehuda, iwalingagö ira alawe sohorö-horö Damara andrö börö me no ibalugö mbawania.
16 Ifahatö ia Yehuda ba zinga lala ba imane, ”Hadia tola orudu ndraʼo khöu?” Lö iʼila wa umönönia ndra alawe daʼö.+ Imane ira alawe andrö, ”Hadia nibeʼeu khögu na orudu ndraʼugö khögu?”
17 Imane Yehuda, ”Ufaʼoheʼö khöu sageu nono nambi.” Imane ira alawe daʼö, ”Hadia dandra wa öfaʼoheʼö khögu dania?”
18 Imane Yehuda, ”Hadia zi tola ubeʼe si tobali lohe-lohe dödöu?” Imane ira alawe daʼö, ”Laedurumö si no mufotandro,+ sinali, ba siʼo nigogohemö andrö.” Ibeʼe daʼö fefu Yehuda ba orudu ira irege manabina ndra alawe daʼö.
19 Aefa daʼö, mofanö Damara iheta lembenia ba ifuli ifake mbaru lakha mbanua.
20 Ba ifaʼoheʼö nono nambi daʼö Yehuda khö zi fahuwu khönia niha Gadula+ andrö ba möi ifuli ihalö gade si no ibeʼe. Hizaʼi, lö falukha ira ndra alawe daʼö.
21 Manofu niha Gadula andrö ba niha mbanua si toröi ira alawe daʼö, ”Hezo so ndra alawe sohorö-horö* si toʼölö toröi ba zinga lala Genaʼi?” Lamane khönia, ”Lö irai so ndra alawe sohorö-horö ba daʼa.”
22 Ba mangawuli ia khö Yehuda imane, ”Lö si falukha ndraʼaga ndra alawe daʼö, ba lawaʼö ira niha mbanua daʼö, lö irai so ndra alawe sohorö-horö ba daʼa.”
23 Imane Yehuda, ”Akha ihalö manö khönia gama-gama daʼö. Böi alui ia saʼae faböi aila ita ba niha. No aheta khögu gesuanö, ufaʼoheʼö khönia nono nambi daʼa hizaʼi lö si falukha ami.”
24 Mato tölu waŵa aefa daʼö, so zamatunö khö Yehuda, ”No tobali ira alawe sohorö-horö numönöu Tamara, ba abeto ia iadaʼa.” Imane Yehuda, ”Midöni ia baero ba mitunu ia.”+
25 Me laʼohe ia baero, ifaʼoheʼö goroisania Tamara khö namania matuania imane, ”Sokhö gama-gama daʼa zobetosi yaʼo.” Imane nasa, ”Haogö fareso haniha zokhö laeduru nifotandro andre, sinali, ba siʼo daʼa.”+
26 Ihaogö wamareso Yehuda ba imane, ”Yaʼo zi sala, tenga yaʼia, börö me lö ufangowalu ia khö nonogu Sela.”+ Iʼotarai daʼö, lö saʼae orudu khönia Yehuda.
27 Me irugi inötö woʼononia, tumbu khönia nono si faero.
28 Ba woʼononia andrö, no iʼoroʼö baero dangania ononia si sambua. Iʼanemaiʼö ihalö mbana soyo samatumbuʼö ononia ba iböbö danga nono sawuyu andrö. Imane, ”Daʼa zi oföna tumbu.”
29 Me ifuli iböda dangania ono sawuyu andrö, möi baero dalifusönia ba imane samatumbuʼö ono andrö, ”Hana wa ösika naha nono ninamö?” Daʼö mbörö wa lafotöi ia Feresi.*+
30 Aefa daʼö, tumbu nono sawuyu niböbö tanga faoma bana soyo ba labeʼe töinia Sera.+
Nisura ba gahe zura
^ Mazui ”sohorö-horö ba gosali”.
^ Eluahania ”Sasika”, te eluahania sasika barö waha.
