1 Moze 39:1-23
39 Laʼohe Yosefo ba Miserai+ ira niha Zimaʼeli+ ba lafamawa ia khö Wotifa.+ Yaʼia andrö sondröniaʼö ba gödo razo khö Waraʼo ba kafalo zanaro.
2 Ba fao-fao Yehowa khö Yosefo.+ Daʼö mbörö wa mofozu halöwönia ba lafataro ia ba wondrorogö omo zokhö yaʼia, niha Miserai andrö.
3 Iʼila sokhö yaʼia wa fao-fao khönia Yehowa ba mofozu fefu nifaluania ibeʼe Yehowa.
4 Omuso dödö Wotifa khö Yosefo ba tobali ia sangai halöwö khönia. Labeʼe khönia halöwö ba wamaigi-maigi omo awö gokhöta zokhö yaʼia maʼafefu.
5 Iʼotarai daʼö, lö iböhöli Yehowa wamahowuʼö fefu halöwö soʼamakhaita ba nomo niha Miserai andrö börö Yosefo. Ifahowuʼö Yehowa fefu gokhötania, he si so ba nomo hegöi ba danö.+
6 Ba gafuriata, ibeʼe fefu gokhötania ba danga Yosefo ba lö iʼabusi tödö Fotifa ngawalö hadia ia, baero niʼania. Itugu monönö waʼebua Yosefo ba no siga-siga.
7 Aefa daʼö, ibörögö adöni dödö woʼomo Wotifa khö Yosefo. Imane, ”Aine, förö ba ngaigu.”
8 Lö omasi Yosefo ba imane, ”Fefu gokhöta zokhö yaʼo, no ibeʼe ba dangagu ba lö moguna iʼabusi tödö hadia ia.
9 Lö hadöi sebua kuaso ba nomo andre baero ndraʼo ba no ibeʼe fefu ba dangagu, hatö yaʼugö me no foʼomonia ndraʼugö. Lö duhu ufalua zi lö sökhi ba fasala ndraʼo föna Lowalangi.”+
10 Ero maʼökhö, lö iböhöli ira alawe daʼö wangai tödö Yosefo, hizaʼi lö irai omasi Yosefo forudu mörö khönia mazui fao ira daru-darua.
11 Samuza maʼökhö me lö hadöi sohalöwö ba daʼö, möi mohalöwö Yosefo yomo ba nomo.
12 Ba zi lö idöna-döna, isöbi mbarunia sebua ira alawe daʼö ba imane, ”Aine, förö ba ngaigu!” Hizaʼi, moloi baero Yosefo iröi mbarunia.
13 Me iröi mbarunia andrö Yosefo ba moloi ia baero,
14 muʼao ndra alawe daʼö ikaoni ndra sohalöwö khönia ba imane, ”Hiza ndra matua Heberaiʼo daʼö niʼohe ba daʼa, iʼailasi ita. Edöna ihoröni ndraʼo, andrö wa ulau moʼira-ira.
15 Me irongo moʼira-ira ndraʼodo, iröi mbarunia ba moloi ia baero.”
16 Aefa daʼö, ibeʼe ba ngainia mbaru Yosefo andrö irege mangawuli woʼomonia.
17 Lö ara, itutunö ira alawe daʼö zalua khönia simane fanutunönia mege, ”Niha Heberaiʼo niʼohemö daʼö, möi ia khögu ba daʼa ba wangailasi yaʼo.
18 Me moʼira-ira ndraʼo, iröi mbarunia ba moloi ia baero.”
19 Me no irongo Fotifa nifalua zawuyunia andrö khö woʼomonia, mofönu sibai ia.
20 Iʼohe Yosefo sokhö yaʼia ba ibeʼe bakha ba gurunga, ba naha niha sato nikuru razo. Ba daʼö lakuru Yosefo.+
21 Ba lö faröi Yehowa khö Yosefo, iforomaʼö waʼomasinia si lö faröi. Omuso dödö gafalo gurunga khö Yosefo.+
22 Daʼö mbörö wa ifataro Yosefo ba wozago niha gurunga. Yosefo zotatugöi halöwöra.+
23 Lö saʼae abu dödö gafalo gurunga ba halöwö nibeʼenia khö Yosefo börö me fao-fao khönia Yehowa, ba mofozu fefu nifaluania ibeʼe Yehowa.+
