1 Moze 4:1-26
4 Ba orudu Gadamo khö Khawa ba manabina Khawa.+ Me no tumbu khönia Gaʼino,+ imane Khawa, ”Tumbu khögu nono matua börö wanolo moroi khö Yehowa.”
2 Aefa daʼö, tumbu khönia Habeli,+ akhi Gaʼino.
Tobali kubalo mbiri-biri Habeli, ba sohalöwö ba danö Gaʼino.
3 Ba ara maʼifu, iʼohe ösa mbua zinanönia Kaʼino ibeʼe sumange Yehowa.
4 Ba ibeʼe göi Habeli mato hauga ngaʼeu nono mbiri-birinia siaʼa+ hegöi tawö gurifönia. Omuso dödö Yehowa khö Habeli awö zumange nibeʼenia,+
5 hizaʼi lö omuso dödönia khö Gaʼino awö zumange nibeʼenia. Andrö, mofönu sibai Gaʼino ba afatö dödönia.*
6 Börö daʼö, imane Yehowa khö Gaʼino, ”Hana wa mofönu sibai ndraʼugö ba afatö dödöu?
7 Na öfalalini gera-erau ba öfalua zi sökhi, hadia lö omuso dödögu khöu mangawuli?* Na löʼö, no itarogö ndraʼugö horö ba mbawandruhö ba ifatörö ndraʼugö. Ba yaʼugö, kalaisi ia.
8 Aefa daʼö, imane Kaʼino khö nakhinia Habeli, ”Aine, möi ita ba mbenua.” Ba daʼö ibözi Habeli andrö Kaʼino irege mate.+
9 Lö ara imane Yehowa khö Gaʼino, ”Hezo nakhiu Habeli?” Imane, ”Lö uʼila. Hadia sozago akhigu ndraʼodo?”
10 Imane Lowalangi, ”Hana wa öfalua daʼö? Fondrondrongo! No muʼao khögu ndro nakhimö moroi tou ba danö.+
11 Iadaʼa, si göna fangelifi ndraʼugö. Nifofanö dania ndraʼugö moroi ba danö andre si no mamokai bawania börö me ba daʼa öbunu nakhimö faoma tangau samösa.+
12 Na monowi ndraʼugö ba danö, lö ibeʼe khöu mbuania.* Lö öböhöli woloi ba si lö tatu töröwa ndraʼugö ba gulidanö.”
13 Imane Kaʼino khö Yehowa, ”Talafo abua wanguhuku si göna yaʼo börö horögu.
14 Maʼökhö andre, öfofanö ndraʼo moroi ba danö daʼa, ba lö öʼila ndraʼo saʼae. Lö uböhöli woloi ba si lö tatu töröwa ndraʼo ba gulidanö, ba gofu haniha zi falukha khögu, daʼö zamunu yaʼo dania.”
15 Imane khönia Yehowa, ”Na simanö, gofu haniha zamunu Kaʼino, itema zulö fitu winaeta.”
Andrö ibeʼe* Yehowa dandra khö Gaʼino enaʼö lö labunu ia gofu haniha zi falukha khönia.
16 Ba mofanö Gaʼino föna Yehowa, toröi ia ba danö Nodi,* tanö ba gatumbukha Gedena.+
17 Ba orudu Gaʼino khö woʼomonia+ irege manabina ba tumbu khönia Henokhi. Ifasindro sambua mbanua Kaʼino ba ibeʼe töi mbanua andrö döi nononia Henokhi.
18 Ba tumbu göi nono khö Henokhi, töinia yaʼia daʼö Iradi. Iradi ama Mehuyaʼeli, Mehuyaʼeli ama Metuzaʼeli, Metuzaʼeli ama Lameki.
19 Darua woʼomo Lameki, si samösa töinia Ada, ba si samösa töinia Sila.
20 Tumbu Yabalo khö Gada. Yabalo andre niha si oföna toröi ba nose-ose ba samaliaro urifö.
21 Töi nakhinia Yubalo. Yaʼia niha si oföna samoli harafa ba surune.
22 Tumbu Dubala-kaʼino khö Zila. Tubala-kaʼino andre zamöbözi ngawalö fakake moroi ba tembaga hegöi siʼöli. Talifusönia alawe yaʼia daʼö Naʼama.
23 Ba ifazökhi gamaedola Lameki khö woʼomonia si darua, Ada ba Sila,
”Yaʼami foʼomogu si darua, mifondrondrongo niwaʼögu,Mibeʼe mbörö dalingami ba wehedegu:
No ubunu samösa ndra matua börö me no ifesokho ndraʼo,Ono matua si bohou ebua börö me no ibözi ndraʼo.
24 Na 7 winaeta musulöni khö Gaʼino,+Khö Lameki, 77 winaeta.”
25 Ifuli zui orudu Gadamo khö woʼomonia. Ba tumbu khönia nono ba ibeʼe töinia Seti,*+ börö me imane, ”No ibeʼe* khögu ngaʼötö tanö böʼö Lowalangi fangali Habeli nibunu Gaʼino.”+
26 Tumbu nono matua khö Zeti ba ibeʼe töinia Enosi.+ Me luo daʼö, ibörögö lakaoni döi Yehowa.
Nisura ba gahe zura
^ Mazui ”ba ifangerau mbawania”.
^ Mazui ”hadia lö teʼalawaʼö ndraʼugö?”
^ Sin.: ”lö ifangawuli khöu waʼabölönia”.
^ Mazui ”itatugöi”.
^ ”Tanö Nodi” eluahania tanö ba niha nitiboʼö.
^ Eluahania ”Lafezawa; Latouʼö; Lahonogöigö”.
^ Mazui ”ihonogöigö”.
