1 Moze 40:1-23
40 Lö ara aefa daʼö, fasala gumandru sameʼe idanö+ hegöi kumandru sameʼe roti khö razo Miserai sokhö yaʼira.
2 Mofönu sibai Waraʼo ba niha si darua andrö sohalöwö khönia, yaʼia daʼö kumandru sameʼe idanö ba kumandru sameʼe roti.+
3 Aefa daʼö, ibeʼe ira ba gurunga ba nomo gafalo zanaro+ ba nikuru Yosefo.+
4 Ifataro Yosefo andrö kafalo zanaro tobali awöra ba samaigi-maigi yaʼira,+ ba mato hauga hari ira ba gurunga.
5 Samuza inötö me bongi, endronga mangifi gumandru sameʼe idanö hegöi kumandru sameʼe roti khö razo Miserai si no mubeʼe ba gurunga. Moʼeluaha wangifira andrö zamösana.
6 Me ifalukhaisi ira Yosefo sihulö wongi daʼö ba abu sibai dödöra.
7 Ba manofu ia khö ndra kumandru si darua andrö, ”Hana wa no mifangerau mbawami maʼökhö andre?”
8 Lamane khönia, ”No mangifi ndraʼaga ba lö sangila mangombakha eluahania.” Imane Yosefo, ”Ha Lowalangi zi tola mamoʼeluaha fangifi.+ Mitutunö khögu wangifimi andrö.”
9 Ba itutunö wangifinia andrö kumandru sameʼe idanö, ”Ba wangifigu, so fönagu döla nagu.
10 Ba döla nagu andrö, so tölu rozi ndraha. Moliwiö ia, mobowo, ba iʼasogö ngamohi nagu sasoso.
11 No ugogohe galasi nagu khö Waraʼo, ba uhalö nagu andrö, uferaʼö bakha ba galasi daʼö. Aefa daʼö, ubeʼe khö Waraʼo.”
12 Imane Yosefo khönia, ”Si tölu rozi daha andrö eluahania tölu hari.
13 Tölu hari tö, iʼefasi ndraʼugö Faraʼo ba ifuli ifataro ndraʼugö tobali kumandru sameʼe idanö.+ Yaʼugö dania zameʼe idanö khö Waraʼo simane nifaluamö ba zilalö.+
14 Hizaʼi, na no ösöndra waʼohahau dödö, törö tödöu ndraʼo. Uʼandrö khöu, foromaʼö khögu waʼomasi si lö faröi ba fatunö ndraʼo khö Waraʼo enaʼö ahetado ba daʼa.
15 Sindruhunia, niʼoloiʼö ndraʼo moroi ba soi niha Heberaiʼo,+ ba lö nifaluagu sala ba daʼa si tobali börö wa lakuru ndraʼo.”*+
16 Börö me irongo wa sökhi geluaha wangifi nawönia andrö, itutunö göi wangifinia kumandru sameʼe roti, ”So göi wangifigu. No uʼonoro ba högögu tölu raga-raga roti safusi.
17 Ba raga-raga tanö yawa, so ngawalö roti khö Waraʼo ba tohare wofo si manga roti ba raga-raga andrö.”
18 Imane Yosefo, ”Daʼa geluahania: Si tölu raga-raga andrö eluahania tölu hari.
19 Tölu hari tö, itaba mbagimö Faraʼo ba itawi ndraʼugö ba döla geu. Aefa daʼö tohare wofo si manga nagolemö.”+
20 Tölu hari aefa daʼö, inötö wangowasaini baŵa waʼatumbu Waraʼo.+ Ifalua gowasa ba ikaoni fefu zohalöwö khönia. Iʼefasi gumandru sameʼe idanö. Aefa daʼö, iʼefasi göi gumandru sameʼe roti enaʼö muʼohe ia föna zohalöwö khönia.
21 Ifuli ifataro Faraʼo kumandru sameʼe idanö khönia ba mohalöwö ia ba wameʼe idanö khö Waraʼo.
22 Hizaʼi, itawi gumandru sameʼe roti simane sibai niwaʼö Yosefo.+
23 Ba olifu gumandru sameʼe idanö andrö goroisa Yosefo.+
Nisura ba gahe zura
^ Sin.: ”labeʼe ndraʼo ba dögi”.
