1 Moze 41:1-57
41 Dua fakhe aefa daʼö, mangifi Waraʼo+ no mozizio ia ba zinga Nungo Nidanö Nilo.
2 Iʼila ba daʼö fitu ngaʼeu zawi si sökhi ba satabö si tohare moroi ba Nungo Nidanö Nilo, ba laʼa ndruʼu si so ba daʼö.+
3 Aefa daʼö tohare göi fitu ngaʼeu zawi si lö sökhi famaigi ba safuo moroi ba Nungo Nidanö Nilo, ba laʼiagö zinga zawi satabö si so ba zinga Nungo Nidanö Nilo andrö.
4 Lö ara, sawi si lö sökhi famaigi andrö ba safuo, laʼa zawi si fitu ngaʼeu satabö ba si sökhi. Ba tokea Waraʼo.
5 Aefa daʼö, ifuli ilau mörö ba mangifi ia zui. Ba zi sara töla gandru, so fitu rozi ndraha mbua gandru si sökhi ba soʼösi.+
6 Lö ara, tumbu göi fitu rozi ndraha mbua gandru si lö ösi ba soköli börö nangi saukhu moroi ba gatumbukha.
7 Aefa daʼö, itölö gandru si sökhi ba soʼösi andrö gandru si lö ösi. Ba tokea Waraʼo awena iʼila wa sangifi ia.
8 Sihulö wongi daʼö abu sibai dödönia. Andrö ifakaoniʼö fefu niha si fakelemu awö niha sagatua-tua ba Miserai. Ifatunö khöra wangifinia Faraʼo. Hizaʼi samösa lö sangila eluaha.
9 Ba fahuhuo gumandru sameʼe idanö andrö khö Waraʼo, ”Maʼökhö andre, ufatunö horö si no ufalua.
10 No irai mofönu ndraʼugö khögu simanö göi khö gumandru sameʼe roti. Ba öbeʼe ndraʼaga ba gurunga ba nomo kafalo zanaro.+
11 Samuza inötö me bongi, mangifi ndraʼaga ba faoma so geluaha wangifima andrö.+
12 So ba daʼö samösa ndra matua Heberaiʼo sohalöwö khö gumandru zanaro.+ Me mafatunö khönia wangifima,+ iʼombakhaʼö khöma geluahania.
13 Itörö niwaʼönia, tefataro zui ndraʼo ba halöwögu, hizaʼi latawi mbagi gumandru sameʼe roti.”+
14 Börö daʼö ifatenge niha Faraʼo+ ba wogaoni Yosefo ba iʼanemaiʼö laheta ia ba gurunga.*+ Itöwö ia, ifagatini nukhania, ba möi iʼondrasi Waraʼo.
15 Imane Faraʼo khö Yosefo, ”No mangifido ba samösa lö sangila eluahania. Urongo wa öʼila öfoʼeluaha wangifi nitutunö khöu.”+
16 Imane Yosefo khö Waraʼo, ”Tenga yaʼodo Pa! Lowalangi dania zamaʼema khöu turia si sökhi.”+
17 Imane Faraʼo khö Yosefo, ”Ba wangifigu andrö, no mozizio ndraʼo ba zinga Nungo Nidanö Nilo.
18 Lö ara, so fitu ngaʼeu zawi si sökhi ba satabö si tohare moroi ba Nungo Nidanö Nilo, ba laʼa ndruʼu si so ba daʼö.+
19 Aefa daʼö, tohare göi fitu ngaʼeu zawi safuo si no angao-ngao ba si lö sökhi famaigi. Lö irai uʼila zawi simane daʼö ba zi sagörö tanö Miserai.
20 Lö ara, sawi safuo si no angao-ngao ba si lö sökhi famaigi andrö, laʼa zawi satabö si fitu ngaʼeu.
21 Ba me no laʼa fefu, hulö zi lö si manga fefu zawi daʼö. Lö tebulö waʼafuora ba lö sökhi-sökhi simane yaʼira ba zilalö. Ba tokea ndraʼo.
22 ”Aefa daʼö, ifuli zui mangifi ndraʼo. So fitu rozi ndraha mbua gandru soʼösi ba si sökhi ba zi sara töla gandru.+
23 Ba tumbu göi fitu rozi ndraha mbua gandru si no akore, lö ösi, ba no oköli börö nangi saukhu moroi ba gatumbukha.
24 Aefa daʼö itölö gandru si sökhi andrö gandru si lö ösi. No ufatunö daʼa ba niha si fakelemu+ ba samösa lö sangila eluahania.”+
25 Imane Yosefo khö Waraʼo, ”Fangifimö si dombua andrö fagölö geluahania. No ifatunö khöu Lowalangi sindruhu hadia nifaluania dania.+
26 Sawi si fitu ngaʼeu si sökhi andrö eluahania fitu fakhe, ba si fitu rozi ndraha mbua gandru si sökhi andrö eluahania göi fitu fakhe. Fagölö geluaha wangifimö si dombua andrö.
27 Si fitu ngaʼeu zawi safuo ba si lö sökhi famaigi andrö safuria tohare hegöi si fitu rozi ndraha mbua gandru si lö ösi ba soköli börö nangi saukhu moroi ba gatumbukha, eluahania alua mbaŵa lofo fitu fakhe waʼara.
28 Simane si no uwaʼö mege: No ifatunö khöu Lowalangi sindruhu hadia nifaluania dania.
29 ”Fahöna dania mbalazo ba zi sagörö tanö Miserai sagötö zi fitu fakhe waʼara.
30 Aefa daʼö, alua lofo sabölö-bölö fitu fakhe waʼara. Lofo andrö zangaʼasogö faʼatekiko ba Miserai irege olifu niha wa no irai fahöna mbalazo ba zilalö.+
31 Lö itörö tödöra wa no irai fahöna mbalazo ba soi daʼa ba zilalö börö waʼabölö-bölö mbaŵa lofo.
32 Dua kali mangifi ndraʼugö börö me no ihonogöi Lowalangi sindruhu ba hasambalö ifalua ba waʼalio.
33 ”Iadaʼa, alui samösa ndra matua sonekhe ba satua-tua, ba beʼe khönia kuaso ba zi sagörö tanö Miserai.
34 Fataro ndra sondröniaʼö ba Miserai ba wangowuloi si sambua niʼolima mbua zinanö sagötö fahöna mbalazo ba zi fitu fakhe.+
35 Enaʼö göi lahöna mbalazo barö ndröfi andrö dania. Börö kuaso nibeʼeu khöra, laʼiröʼö fefu mbua zinanö misa ba mbanua si tobali balazo ba latarogö.+
36 Daʼö zi tobali balazo na alua dania mbaŵa lofo ba danö Miserai sagötö zi fitu fakhe, faböi tekiko soi daʼa ba mbaŵa lofo andrö.”+
37 Fao dödö Waraʼo hegöi sohalöwö khönia ba niwaʼö Yosefo.
38 Imane Faraʼo khö zohalöwö khönia, ”Lö tasöndra niha tanö böʼö simane yaʼia sangokhögö faʼabölö Lowalangi.”
39 Imane Faraʼo khö Yosefo, ”Börö me no ifatunö khöu Lowalangi daʼö fefu, lö hadöi niha sonekhe ba satua-tua simane yaʼugö.
40 Yaʼugö zamaigi-maigi omogu, ba laʼoʼö wehedeu iraono mbanuagu fefu.+ Ha yaʼo zabölö ebua kuaso moroi khöu börö me razo ndraʼo.”*
41 Itohugö wangumaʼö Faraʼo, ”Ufataro ndraʼugö tobali samatörö ba zi sagörö tanö Miserai.”+
42 Iheta laedurunia Faraʼo si no ifotandro ba ibeʼe ba duru Yosefo. Ibeʼe göi mbaru sebua moroi ba nukha si sökhi awö naya anaʼa ba mbaginia.
43 Baero daʼö, iwaʼö khö Yosefo wanörö kureta wasuwöta, fanete gureta ba waʼarazo khönia. Iwaʼö ba niha si so tanö fönania enaʼö muʼao ira lamane, ”Avrekh!”* Simane daʼö nifalua Waraʼo ba wamataro Yosefo tobali samatörö ba danö Miserai.
44 Imane nasa Faraʼo khö Yosefo, ”Yaʼo zotöi Faraʼo. Hizaʼi, na lö saefa wehedeu, lö hadöi si tola mamalua hadia ia* ba zi sagörö tanö Miserai.”+
45 Aefa daʼö, ibeʼe Faraʼo döi si bohou khö Yosefo yaʼia daʼö Safenati-faneakhi ba ibeʼe khönia Gasenata+ ono Wotifera, ere ba Gono* tobali foʼomonia. Ibörögö mamatörö* Yosefo ba danö Miserai.+
46 Faʼalawa ndröfi Yosefo me ifalukhaisi* Waraʼo razo Miserai yaʼia daʼö 30 fakhe.+
Ba mofanö Yosefo föna Waraʼo ba iʼanöröi fefu danö Miserai.
47 Sagötö waʼafahöna mbalazo ba zi fitu fakhe, oya sibai mbua nowi ba soi daʼö.
48 Lö iböhöli wangowuloi balazo ba danö Miserai sagötö zi fitu fakhe ba iʼiröʼö ba mbanua misa. Balazo niʼiröʼö ero sambua banua tehalö moroi ba nowi si so ba mbanua si fasui daʼö.
49 Lö iböhöli Yosefo wangöhöna bua nowi irege oya sibai simane gawu ba nasi ba tebai laʼerai hawaʼoya.
50 Fatua lö alua mbaŵa lofo, darua nono matua si tumbu khö Yosefo+ moroi khö Gasenata ono Wotifera ere ba Gono.*
51 Ibeʼe töi ziaʼa khönia Manase*+ börö me imane, ”No olifu ndraʼo ngawalö zalua khögu ibeʼe Lowalangi ba fefu nösi nomo namagu.”
52 Töi nononia si sambua yaʼia daʼö Eferai*+ börö me imane, ”No ibeʼe nonogu Lowalangi ba soi si göna ndraʼo fangabu dödö.”+
53 Awai zi fitu fakhe andrö me fahöna mbalazo ba danö Miserai,+
54 ba ibörögö alua zi fitu fakhe mbaŵa lofo, itörö niwaʼö Yosefo.+ Alua fefu lofo ba ngawalö soi, hizaʼi so mbalazo* ba Miserai.+
55 Ba gafuriata, tosasa fefu niha Miserai börö waʼolofo ba ibörögö laʼandrö khö Waraʼo enaʼö ibeʼe zoguna khöra.+ Imane Faraʼo, ”Miʼaeʼe khö Yosefo, ba miʼoʼö niwaʼönia.”+
56 Börö me itugu abölö-bölö mbaŵa lofo ba Miserai, ibörögö ibokai Yosefo naha wangiröʼö balazo si so ba soi daʼö ba ifamawa ba niha Miserai.+ Alua göi mbaŵa lofo ba zi sagörö ulidanö.+
57 Ba oi tohare niha moroi ba zi sagörö ulidanö, möi ira ba Miserai wowöli balazora khö Yosefo börö me abölö-bölö lofo si göna ira.+
Nisura ba gahe zura
^ Sin.: ”ba dögi”.
^ Mazui ”börö dadaoma daʼa”.
^ Te daʼa wehede ba wangoʼou niha enaʼö lafosumange ia.
^ Sin.: ”mamazawa tangania mazui ahenia”.
^ Eluahania Heliofoli.
^ Mazui ”iʼanöröi”.
^ Mazui ”me ibörögö wangai halöwö khö”.
^ Eluahania Heliofoli.
^ Eluahania ”Yaʼia Mbörö Wa Olifu”.
^ Eluahania ”Atabö Sibai”.
^ Mazui ”roti”.
