1 Moze 43:1-34
43 Abölö-bölö sibai mbaŵa lofo ba danö Ganaʼana.+
2 Me no ahori gö niʼohera moroi ba Miserai,+ imane amara, ”Miʼaeʼe zui miʼöli göda maʼifu.”
3 Imane Yehuda khö namania, ”No ifangelama ndraʼaga niha daʼö wa tebai mafalukhaisi ia na lö maʼohe nakhima.+
4 Na ötehegö fao khöma nakhima ba mofanö ndraʼaga wowöli gö.
5 Hizaʼi, na lö ötehegö fao ia khöma ba lö mofanöga börö me no iwaʼö niha daʼö, tebai mafalukhaisi ia na lö maʼohe nakhima.”+
6 Imane Izaraʼeli,+ ”Hana wa mibusi dödögu? Hana wa mifatunö khönia wa so nakhimi nasa?”
7 Lamane khönia, ”Isofu-sofu ndraʼaga hegöi ösi nomoma, ’Hadia lö si mate namami? Hadia so dalifusömi tanö böʼö nasa?’ ba mafatunö khönia zindruhu.+ Lö maʼila wa iwaʼö khöma wolohe Beniami ba daʼö.”+
8 Ba iforege Yehuda wangumaʼö enaʼö faduhu dödö namania Izaraʼeli, ”Tehegö fao khögu nono daʼö,+ enaʼö mofanöga faböi mate ita waʼolofo,+ yaʼugö hegöi yaʼaga awö ndraonoma.+
9 Hasambalö yaʼo zondrorogö yaʼia.*+ Khögu sofu dania. Na lö mangawuli ia, yaʼo zoluʼi horö khöu sagötö faʼara.
10 Na lö tataha-taha, te no mangörö ndraʼaga mato dua kali ba daʼö.”
11 Andrö imane amara Izaraʼeli, ”Na lö hadöi saʼae lala tanö böʼö, ba mifalua manö daʼa: Mibeʼe bakha ba goni mbua zinanö sabölö sökhi moroi ba danö daʼa:+ maʼifu wanikha famayoini, maʼifu wewani, gitö somuhua,*+ uli geu sogitö,+ bua pistasio,* ba bua almond.* Miʼohe fefu ba mibeʼe buala khö niha daʼö.
12 Mifuli miʼohe gefe dua kali faʼebua awö gefe nifangawuli ba goni khömi.+ Te so zi fasala me luo daʼö.
13 Ohe nakhimö ba mifalukhaisi niha daʼö.
14 Yaʼifatumbuʼö ba dödönia waʼahakhö dödö Lowalangi Fondrege Zabölö ba itehegö mangawuli dalifusömi Simeoni hegöi Beniami. Ba na hasambalö taya nonogu, laʼua, utaögö manö!”+
15 Ba laʼohe mbuala andrö awö gefe si dua kali faʼebua. Ba mofanö ira ba Miserai fao khöra Mbeniami ba lafuli lafalukhaisi Yosefo.+
16 Me iʼila Yosefo no fao khöra Mbeniami, iʼanemaiʼö iwaʼö ba zohalöwö ba nomo khönia, ”Ohe ndra niha daʼa ba nomo. Taba gurifö ba faʼanö gö börö me fao ira khögu wemanga dania ba zi laluo.”
17 Iʼanemaiʼö ifalua niwaʼö Yosefo+ ba iʼohe ira ba nomo Yosefo.
18 Me laʼohe ira ba nomo Yosefo, ataʼu sibai ira ba lamane, ”Te daʼö wa laʼohe ita ba nomo daʼa börö gefe nifangawuli me luo daʼö bakha ba goni. Hasambalö laraʼu ita ba labaliʼö sawuyu, aefa daʼö lahalö galide niʼoheda!”+
19 Börö daʼö lafahatö ira khö zohalöwö ba nomo Yosefo ba fahuhuo ira khönia ba mbawandruhö.
20 Lamane, ”Bologö dödöu Pa! Me awena möiga, sindruhu-ndruhu sowöli gö ndraʼaga.+
21 Hizaʼi me marugi nahia wolombase ba mabokai gonima, tokea ndraʼaga me maʼila so gefema bakha ba goni zamösana ba maʼifu lö salö.+ Börö daʼö omasiga mafuli.
22 Iadaʼa oya niʼohema kefe ba wowöli gö. Lö maʼila haniha zameʼe kefe daʼö bakha ba gonima.”+
23 Imane khöra, ”Mihonogö ami, böi miʼataʼufi. Lowalangimi ba Lowalangi namami zameʼe kefe daʼö bakha ba goni khömi. No utema gefemi andrö.” Aefa daʼö, ifasao khöra Zimeoni.+
24 Ba iʼohe ira ba nomo Yosefo ba ibeʼe khöra nidanö fanasa gahe. Ibeʼe göi gö galide khöra.
25 No larongo wa tohare Yosefo ba zi laluo ba fao ira wemanga ba daʼö,+ börö daʼö lahenaigö mbuala+ nibeʼera khönia.
26 Me ofeta Yosefo ba nomo, labeʼe khönia mbuala daʼö ba mangalulu ira khönia.+
27 Aefa daʼö, isofu hewisa duriara ba imane khöra, ”Hewisa duria namami si no atua si no irai mifatunö khögu? Hadia lö si mate ia?”+
28 Lamane khönia, ”Lö hadia ia khö namama, sawuyumö andrö. Auri ia nasa.” Ba mangalulu ira latuhi danö.+
29 Me iʼila nakhinia sotöi Beniami yaʼia daʼö ono ninania,+ imane, ”Hadia daʼa nakhimi siakhi si no irai mitutunö khögu?”+ Imane nasa, ”Yaʼifahowuʼö ndraʼugö Lowalangi onogu.”
30 Börö wamaigi akhinia tebai saʼae itaha dödönia. Iʼanemaiʼö möi baero Yosefo ba iʼalui nahania weʼe. Möi ia ba zi sambua bateʼe ba mege-ege ia ba daʼö.+
31 Aefa daʼö, möi isasai mbawania. Me no tola itaha dödönia möi ia baero ba imane, ”Mibeʼe yawa gö.”
32 Ba labeʼe gö Yosefo ba mezania samösa. Ba meza tanö böʼö labeʼe gö ndra talifusönia ba so göi meza tanö böʼö ba niha Miserai si so ba daʼö. Lö omasi niha Miserai na fao ira wemanga ba niha Heberaiʼo börö me anuzu dödöra.+
33 Tanö föna ibeʼe dadaoma ndra talifusönia andrö Yosefo moloʼö tana khö ziaʼa+ ofeta ba ziakhi. Ba faoma lafaigi-faigi nawöra si fao faʼahöli-höli dödö.
34 Lö aetu ibeʼe khöra gö si so ba mezania. Hizaʼi, lima kali winaeta ibeʼe khö Mbeniami moroi ba danö böʼö.+ Simane daʼö me fao ira khönia wemanga ba mamadu irege abuso.
Nisura ba gahe zura
^ Mazui ”zi tobali gade khönia”.
^ Mazui ”gitö labdanum”.
^ Fakhili-khili ia ba gasa gore, hizaʼi aʼusö-owugeʼe laʼa-laʼania.
^ Mazui ”bua badam”.
