1 Moze 47:1-31
47 Möi Yosefo wamatunö khö Waraʼo,+ ”No ofeta namagu hegöi ira talifusögu ba Gosena.+ No laʼohe nambi, biri-biri, sawi, ba fefu gokhötara moroi ba danö Ganaʼana.”
2 Iʼohe dalima ndra talifusönia me ifalukhaisi Waraʼo.+
3 Manofu khöra Waraʼo, ”Hadia halöwömi?” Lamane, ”Ira sawuyumö andre kubalo mbiri-biri, simane ira tuama me föna.”+
4 Ba lamane, ”Wa möiga ba daʼa enaʼö tobali ndraʼaga niha si fatewu.+ Lö hadöi saʼae duʼu ba mbenua si tola laʼa uriföma ba danö Ganaʼana börö me abölö-bölö sibai mbaŵa lofo ba daʼö.+ Maʼandrö khöu, tehegö khöma toröi ba danö Gosena.”+
5 Ba imane Faraʼo khö Yosefo, ”No möi ba daʼa namau hegöi ira talifusöu.
6 Barö wamatöröu so Miserai. Beʼe khöra danö fondrege zi sökhi ba soi daʼa.+ Tola toröi ira ba danö Gosena, ba na so ba gotaluara zonekhe mohalöwö, fataro ia ba wondrorogö urifögu.”
7 Ba iʼohe Yosefo namania Yakobo ba wamalukhaisi Faraʼo, ba ifahowuʼö Waraʼo andrö Yakobo.
8 Manofu Waraʼo khö Yakobo, ”Hauga fakhe ndraʼugö?”
9 Imane Yakobo, ”No tobali ndraʼo niha sikoli* sagötö zi 130 fakhe. Tosasa waʼaurigu+ ba lö ukhamö waʼanau noso ndra tuagu si no mukoli* me föna.”+
10 Aefa daʼö, ifahowuʼö Waraʼo andrö Yakobo ba mofanö ia.
11 Simane si no iwaʼö Faraʼo, ibeʼe Yosefo khö namania hegöi khö ndra talifusönia nahia waʼatoröi awö danö si tobali tana khöra fondrege zi sökhi ba danö Miserai, yaʼia daʼö tanö Ramese.+
12 Lö iböhöli Yosefo wameʼe soguna* khö namania hegöi khö ndra talifusönia ba fefu nösi nomo namania, moloʼö faʼato ndraonora ero sambua omo.
13 Abölö-bölö sibai mbaŵa lofo andrö irege ahori gö* misa ba ngawalö soi. Lua-luania, lö faʼabölö ba niha Miserai hegöi ba niha Ganaʼana.+
14 Lö laböhöli niha wowöli bua nowi irege owulo ba danga Yosefo+ fefu gefe niha Miserai awö gefe niha Ganaʼana, ba lö iböhöli Yosefo wamasao kefe daʼö ba nomo Waraʼo.
15 Ba gafuriata, ahori gefe ba Miserai hegöi ba Ganaʼana ba mböli zoguna. Börö daʼö, tohare fefu niha Miserai ba lamane khö Yosefo, ”Beʼe göma! Hadia ötehegö mate ndraʼaga börö me lö kefema saʼae?”
16 Imane Yosefo, ”Na lö hadöi kefemi, mibeʼe gurifömi, awena dania ubeʼe gömi.”
17 Ibörögö laʼohe guriföra khö Yosefo, yaʼia daʼö kudo, nambi, biri-biri, sawi ba kalide. Daʼö zi tobali fogati me ibeʼe mbalazora Yosefo. Ba ndröfi daʼö, lö iböhöli Yosefo wameʼe soguna khöra si tobali fogati gurifö nibeʼera.
18 Me no numalö ndröfi daʼö, lafuli laʼondrasi ia ba lamane, ”Lö mabiniʼö khöu Pa. No ahori mabeʼe khöu gefema awö guriföma. Lö hadöi saʼae niʼokhögöma baero mbotoma samösa ba tanöma.
19 Hadia ötehegö mate ndraʼaga ba tekiko danöma? Öli mbotoma awö danöma ba beʼe göma. Möi ndraʼaga sawuyu Waraʼo ba tobali tana khönia danöma. Beʼe khöma danömö zinanö faböi mate ndraʼaga ba lö tekiko danöma.”
20 Iʼöli fefu danö niha Miserai Yosefo. Fefu niha Miserai lafamawa nowira börö waʼabölö-bölö mbaŵa lofo andrö. Fefu danö ba Miserai tobali okhöta Waraʼo.
21 Lö ara, ifawuʼa ba mbanua sebua fefu niha si toröi ba zi sagörö tanö Miserai.+
22 Hatö tanö niʼokhögö ndra ere zi lö iʼöli.+ Lö lafamawa danöra ira ere börö me so dana göra moroi khö Waraʼo.
23 Imane Yosefo khö ndra niha daʼö, ”Maʼökhö andre, no uʼöli ami awö danömi tobali tana khö Waraʼo. Yaʼe khömi danömö zinanö ba mitanö ba nowi.
24 Na mitema mbuania, mibeʼe zi sambua niʼolima khö Waraʼo,+ ba tana khömi zi töra. Mibeʼe ösa zi tobali tanömö, soguna khömi, iraonomi, ba fefu nösi nomomi.”
25 Lamane khönia, ”No öʼorifi ndraʼaga Pa.+ Yaʼomuso dödöu ba nifaluama ba tobali ndraʼaga sawuyu Waraʼo.”+
26 Aefa daʼö, ibeʼe gamakhoita Yosefo ba zi sagörö tanö Miserai ba moguna irugi maʼökhö, wa labeʼe khö Waraʼo zi sambua niʼolima mbua nowi nitemara. Ha tanö ndra ere zi lö ihalö Faraʼo.+
27 Lö tebulö toröi ba Miserai nösi nomo Gizaraʼeli ba danö Gosena.+ Ba daʼö mongaʼötö ira irege ato sibai.+
28 Faʼara Yakobo ba danö Miserai 17 fakhe, ba faʼanau nosonia 147 fakhe.+
29 Me iʼila Izaraʼeli wa lö ara tö mate ia,+ ikaoni nononia Yosefo ba imane, ”Na öʼomasiʼö ndraʼo, aeʼe ba hölu* khögu wa öforomaʼö waʼomasi si lö faröi ba lö faröi ndraʼugö khögu. Uʼandrö khöu, böi koʼo ndraʼo ba Miserai.+
30 Na matedo,* heta ndraʼo ba Miserai ba koʼo ndraʼo ba zinga ndra tuagu.”+ Ba imane Yosefo, ”Hasambalö ufalua niʼandrömö.”
31 Aefa daʼö imane, ”Aeʼe ba hölu khögu.” Ba möi ba hölu Yosefo.+ Lö ara, ituhi danö Izaraʼeli tanö ba lulu waratenia.+
Nisura ba gahe zura
^ Mazui ”si fatewu”.
^ Mazui ”tobali niha si fatewu”.
^ Sin.: ”roti”.
^ Sin.: ”roti”.
^ Sin.: ”beʼe dangamö barö wahagu”. Daʼa lala ba wangaʼaroʼö hölu.
^ Sin.: ”adölö ndraʼo ba ngai ndra tuagu”.
