1 Moze 49:1-33
49 Aefa daʼö, mohede Yakobo khö ndraononia ba imane khöra, ”Miʼowuloi ami, omasido ufatunö khömi hadia zedöna alua ba waʼaurimi ba zi so miföna.
2 Mifondrondrongo yaʼami iraono Yakobo ba miʼowuloi ami. Mifondrondrongo wehede namami Izaraʼeli.
3 ”Yaʼugö Rubeno+ ziaʼa nonogu,+ fangabeʼegu ba böröta waʼabölögu.* Yaʼugö wondrege nifosumange ba fondrege zabölö.
4 Hizaʼi tenga simane daʼö ndraʼugö börö me lö khöu fanaha tödö simane molö sabölö-bölö, no möiʼö ba naha wemörö namau.+ No ötaʼunöisi naha wemörögu. Sindruhu-ndruhu no möi ia ba daʼö!
5 ”Yaʼami Simeoni ba Lewi si fatalifusö.+ Laʼogunaʼö wangönara ba wamalua si lö sökhi.+
6 Böi fariawö khöra yaʼugö nosogu.* Böi fao khöra yaʼugö era-eragu börö me labunu niha ba wönura+ ba omuso dödöra na lataba nuo gahe zawi.
7 Niʼelifi wönura ba waʼalösökhi ba fönura si lö faʼahakhö dödö.+ Ufabali ira dania ba gotalua Yakobo ba tefazawili ba gotalua Gizaraʼeli.+
8 Ba yaʼugö Yehuda,+ lasuno ndraʼugö ira talifusöu.+ Ökalaisi zi faʼudu khöu* dania.+ Mangalulu khöu dania fefu nono namau.+
9 Hulö nono zingo Yehuda.+ Yaʼugö onogu, hasambalö öʼa dania gahulua ba maosoʼö. Mörö ia ba ifadölö simane singo. Börö me hulö zingo ia, haniha zi tola manusugi yaʼia?
10 Lö dania aheta ziʼo waʼarazo khö Yehuda+ mazui siʼo wamatörö ba gotalua gahenia irugi tohare Zilo,*+ ba khönia mangalulu fefu soi.+
11 Ba döla nagu iböbö galidenia ba iböbö nono galidenia ba döla nagu fondrege zi sökhi. Isasai dania mbarunia ba nagu awö nukhania ba zindruhu nidanö nagu soyo simane do.
12 No oyo hörönia börö nagu, ba afusi nifönia börö susu.
13 ”Ba zinga nasi toröi dania Zebuloni,+ ba mbewe gawu solombase köfa,+ ba ola mbanuania numalö ba Zidona.+
14 ”Hulö galide sabeʼe töla Gisasari,+ samadölö yaʼia ba gotalua zi dombua bola-bola nifasa ba hulu galide.
15 Iʼila dania wa sökhi sibai nahiania andrö ba no baga-baga soi daʼö. Ifaöndrö dania galisinia ba wolohe noro ba iforege wohalöwö simane sawuyu.
16 ”Dano+ dania zangetuʼö huku ba soinia me sambua mado ia ba Gizaraʼeli.+
17 Hulö simane ulö ia dania ba zinga lala, ulö si so tandru ba zinga lala, sondrou börö sisi kudo irege aekhu tou zi fakudo.+
18 He Yehowa khöu udöna-döna wangorifigu.
19 ”Lasuwö dania Gado+ ira sorabu, hizaʼi isuwö ira moroi furi.+
20 ”Fahöna dania roti* khö Gaseri+ ba yaʼia dania zameʼe gö razo.+
21 ”Hulö mböhö si alawe Nafetali,+ sabölö fagohi. Iwaʼö wehede si sökhi.+
22 ”Yosefo+ zi tobali daha geu satabö sowua ba zinga gumbu nidanö, ba italuʼi dowa ndrahania.
23 Lö laböhöli wanuwö yaʼia si fafana ba lafana ia, ba lö aetu fatuwu ira khönia.+
24 Ba no ifaʼanö khönia wana sinali,+ abölö ba alio dangania.+ Daʼö moroi khö zabölö sanolo Yakobo, moroi khö gubalo hegöi gowe ndraono Gizaraʼeli.
25 Buala ia* moroi khö Lowalangi nifosumange namania, ba itolo ia Lowalangi. Fao ia khö Wondrege Zabölö ba ifahowuʼö ia Lowalangi, ibeʼe howu-howu moroi ba dalu mbanua, howu-howu moroi ba danö,+ awö ndraono sato ba urifö soya.
26 Abölö sökhi howu-howu namania moroi ba mbua zinanö si so ba hili si lö irai taya, ba abölö baga moroi ba hili si lö tebulö.+ Yosefo zi no mufili moroi ba gotalua ndra talifusönia, ba lö dania aetu itema howu-howu daʼö fefu.*+
27 ”Lö iböhöli Beniami+ wondraʼu ahulua simane asu gatua.+ Iʼa gahuluania sihulö wongi, ba ibagi nirabunia ba zi bongi.”+
28 Yaʼira zi 12 mado ba Gizaraʼeli, daʼö howu-howu moroi khö namara. Ifaudugö howu-howunia khöra zamösana.+
29 Aefa daʼö iwaʼö khöra, ”Lö ara tö mate ndraʼo.*+ Mikoʼo ndraʼo ba zinga ndra tuagu ba dögi narö hili si so ba nowi Geferona, niha Kheti andrö,+
30 yaʼia daʼö ba dögi narö hili si so ba nowi Makhefela, ahatö ba Mamere ba danö Ganaʼana, ba nowi niʼöli Gaberahamo khö Geferona niha Kheti andrö si tobali naha lewatö khönia.
31 Ba daʼö lakoʼo Gaberahamo hegöi foʼomonia Sara,+ simanö göi Gizaʼaki+ hegöi foʼomonia Rebeka. Ba daʼö göi ukoʼo Lea.
32 Nowi si so ba daʼö hegöi tögi narö hili andrö no muʼöli ba niha Kheti.”+
33 Me no aefa iwaʼö daʼö khö ndraononia, ifadölö ia Yakobo ba naha wemörönia. Lö ara, aetu nosonia ba laʼorudugö ia ba zinga ndra tuania.*+
Nisura ba gahe zura
^ Mazui ”waʼabölögu ba wangaʼasogö ngaʼötö”.
^ Faigi Geluaha Ngawua Wehede.
^ Sin.: ”Ba duʼi-tuʼi zi faʼudu khöu so dangamö”.
^ Eluahania ”Khönia; Yaʼia Zangokhögö”.
^ Mazui ”gö”.
^ Eluahania Yosefo.
^ Sin.: ”lö tebulö fefu howu-howu daʼö ba högö Yosefo”.
^ Mazui ”laʼorudugö ndraʼo ba zinga ndra tuagu”, daʼa wehede nifoʼamaedola ba wanutunö faʼamate.
^ Daʼa wehede nifoʼamaedola ba wanutunö faʼamate.
