1 Moze 50:1-26
50 Iʼanemaiʼö italagui namania Yosefo,+ iʼuma ba ilau meʼe.
2 Aefa daʼö, mohede Yosefo khö ndra sohalöwö khönia, yaʼia daʼö sameʼe dalu-dalu enaʼö labayoini mboto namania faoma fanikha faböi alio obou.+ Ba labeʼe dalu-dalu andrö ba mboto Gizaraʼeli
3 sagötö zi 40 hari. Daʼö ginötö niʼogunaʼö enaʼö lö alio obou gamatela. Laʼeʼesi ia ira niha Miserai sagötö zi 70 hari.
4 Me no aefa ginötö wangeʼesi, fahuhuo Yosefo khö zondröniaʼö ba nomo* Waraʼo, ”Uʼandrö khöu, faʼema wehedegu andre khö Waraʼo:
5 ’Fatua lö mate namagu,+ no iwaʼö khögu weʼamöi ba hölu+ enaʼö ukoʼo ia ba lewatönia+ si no ikhao ba danö Ganaʼana.+ Börö daʼö, tehegö khögu weʼamöi mogoʼo amagu ba awena dania mangawulido.’”
6 Imane Faraʼo, ”Aeʼe ba koʼo namamö simane si no möiʼö ba hölu khönia.”+
7 Ba mofanö Yosefo, ikoʼo namania. Fao khönia fefu zohalöwö khö Waraʼo, ira sondröniaʼö ba gödo razo,+ ba fefu zondröniaʼö ba Miserai,
8 simanö göi nösi nomo Yosefo, ira talifusönia, ba fefu nösi nomo namania.+ Hatö iraonora side-ide awö guriföra zi toröi ba Gosena.
9 Fao göi khönia gureta wasuwöta+ awö zaradadu si fakudo irege ato sibai ngawawa daʼö.
10 Ba ofeta ira ba naha wamöbörö ba Gatada ba mbanua Nungo Nidanö Yoridano. Ba daʼö lafalua wangeʼesi sabölö-bölö khö nama Yosefo fitu hari waʼara.
11 Lamane ira niha Ganaʼana si toröi ba daʼö me laʼila wangeʼesi andrö, ”Sahöli-höli dödö wangeʼesi nifalua niha Miserai andrö!” Daʼö mbörö wa lafotöi nahia ba mbanua Nungo Nidanö Yoridano andrö Habeli-misirai.*
12 Lafalua iraono Yakobo zi no iwaʼö khöra.+
13 Laʼohe ia ba Ganaʼana ba lakoʼo ia ba lewatönia ba dögi narö hili si so ba nowi Makhefela, yaʼia daʼö nowi sahatö ba Mamere niʼöli Gaberahamo khö Geferona niha Kheti andrö, tobali naha lewatö khönia.+
14 Me no aefa ikoʼo namania, mangawuli Yosefo ba Miserai fao ndra talifusönia ba fefu niha si fao khönia.
15 Me no mate namara, ataʼu ndra talifusö Yosefo alai na abao dödönia khöra ba isulöni zi lö sökhi nifaluara khönia.+
16 Lafaʼema goroisara khö Yosefo, ”Daʼa goroisa namada fatua lö mate ia:
17 ’Miwaʼö daʼa khö Yosefo, ”Uʼandrö khöu, bologö dödöu ba zala hegöi horö nifalua ndra talifusöu börö me no lafakao ndraʼugö.”’ Iadaʼa maʼandrö khöu efaʼö zalama, yaʼaga enoni Lowalangi nifosumange namau.” Me irongo daʼö Yosefo ba meʼe ia.
18 Ba laʼondrasi ia ira talifusönia, mangalulu ira lamane, ”Sawuyumö ndraʼaga!”+
19 Imane Yosefo, ”Böi miʼataʼufi. Tenga Lowalangi ndraʼodo si tola manguhuku yaʼami.
20 Hewaʼae lö sökhi dödömi khögu me luo daʼö,+ no ibaliʼö faʼasökhi daʼö Lowalangi enaʼö teʼorifi niha sato, simane niʼilada iadaʼa.+
21 Andrö böi miʼataʼufi. Lö uböhöli wameʼe soguna khömi hegöi ba ndraonomi.”+ Simane daʼö wameʼenia fondrara dödö enaʼö ahono dödöra.
22 Ba lö tebulö toröi Yosefo ba danö Miserai fao nösi nomo namania fefu. Faʼanau noso Yosefo 110 fakhe.
23 Fakhamö iʼila Yosefo nono Geferai irugi tölu ngaʼötö,+ simanö göi nono Makhiri,+ ono Manase. Ba wamaigi Yosefo, yaʼira andrö hulö nononia samösa.*
24 Ba gafuriata imane Yosefo khö ndra talifusönia, ”Lö ara tö mate ndraʼo, ba hasambalö ihakhösi tödö ami Lowalangi,+ iheta ami dania ba soi daʼa, iʼohe ami ba danö nifabuʼunia si no möi ia ba hölu khö Gaberahamo, Izaʼaki ba Yakobo.”+
25 Börö daʼö iʼandrö Yosefo khö ndraono matua Gizaraʼeli enaʼö möi ira ba hölu, ”Ihakhösi tödö ami Lowalangi. Mifabuʼu khögu wa miheta dania dölagu moroi ba daʼa.”+
26 Ba mate Yosefo me no irugi 110 fakhe ndröfinia. Labeʼe dalu-dalu ba mbotonia faböi alio obou+ ba labeʼe bakha ba hasi si so ba Miserai.
Nisura ba gahe zura
^ Mazui ”fahuhuo Yosefo ba zi sambua ösi nomo”.
^ Eluahania ”Fangeʼesi Niha Miserai”.
^ Sin.: ”yaʼira andrö si tumbu yawa ba mbalöduhinia”.
