1 Moze 6:1-22
6 Itugu monönö waʼato niha ba gulidanö ba tumbu göi khöra nono alawe.
2 Ibörögö lafaigi-faigi ono Lowalangi sindruhu*+ wa baga-baga nono alawe si tumbu ba niha andrö. Börö daʼö, gofu haniha zomasi ira, lahalö tobali foʼomora.
3 Ba imane Yehowa, ”Lö saʼae faʼebolo dödö khögu ba niha*+ börö me samazökhi horö ira.* Hatö 120 fakhe tö waʼanau nosora.”+
4 Me luo daʼö hegöi me no aefa daʼö, so Nadaoya* ba gulidanö börö me lö laböhöli waʼorudu iraono Lowalangi sindruhu ba nono alawe niha gulidanö. Ba tumbu khöra nono matua ba tobali ira niha sagabölö si tehöngö me götö föna.
5 Lua-luania, iʼila Yehowa wa itugu lö sökhi zalua ba gulidanö. Oi si lö sökhi manö gera-era awö nikhoi dödöra.+
6 Maniasa* Yehowa me no iwöwöi niha ba gulidanö ba afökhö dödönia.+
7 Andrö imane Yehowa, ”Uhori niha niwöwöigu andrö ba gulidanö, niha hegöi urifö nifaliaro, urifö si hombo, ba urifö tanö böʼö,* börö me maniasa ndraʼo wamazökhi yaʼira.”
8 Hizaʼi, omuso dödö Yehowa khö Noakhi.
9 Daʼa waö-waö Noakhi.
Noakhi andrö niha satulö tödö.+ Lö mosinegu ia, tenga simane niha ba götönia. Itörö lala Lowalangi sindruhu.*+
10 Ba tumbu datölu nono matua khö Noakhi, yaʼia daʼö Semi, Khamo ba Yafeti.+
11 Hizaʼi ba wamaigi Lowalangi sindruhu, no tekiko gulidanö ba afönu faʼalösökhi.
12 Sindruhu-ndruhu no tekiko ba wamaigi Lowalangi gulidanö.+ No tefuyu fefu gamuata niha.+
13 Ba imane Lowalangi khö Noakhi, ”No uhalö gangetula ba wangohori fefu zonoso, börö me afönu gulidanö faʼalösökhi nifaluara. Uhori ira fabaya ulidanö daʼa.+
14 Fazökhi khöu nowo* moroi ba geu sabeʼe.*+ Öfobateʼe ba ösölö tanö bakhania hegöi tanö baero faoma asipala.+
15 Simane daʼa wamazökhiu yaʼia: 134 meter* waʼanau, 22 meter* waʼebolo, ba 13 meter* waʼalawa.
16 Fazökhi sambua zandrela* enaʼö möi yomo haga ba nowo, mato 44 sentimeter* iʼotarai zagö. Fazökhi mbawandruhö nowo ba zi tambainia,+ ba öfotölu tika, yaʼia daʼö tanö tou, bakha ba dalu, ba tanö yawa.
17 ”Ba anönö danö idanö+ ubeʼe ba uhori fefu zonoso si so barö mbanua. Uhori fefu zi so ba gulidanö.+
18 Fawuʼu li ndraʼo khöu. Aeʼe bakha ba nowo andrö, ohe ndraonomö, foʼomou hegöi umönöu.+
19 Ohe yawa ba nowo fefu ngawalö gurifö,+ dua-dua ngaʼeu, si matua ba si alawe, enaʼö lö mate ira.+
20 Dua-dua ngaʼeu ngawalö gurifö si hombo, urifö nifaliaro, ba fefu ngawalö gurifö tanö böʼö.* Fao ira khöu yawa ba nowo enaʼö lö mate ira.+
21 Baero daʼö, ozaragö ba ohe fefu ngawalö gö,+ soguna khöu hegöi soguna ba gurifö andrö.”
22 Ifalua Noakhi fefu niwaʼö Lowalangi. Ifalua simane sibai niwaʼö khönia.+
Nisura ba gahe zura
^ Ngawua wehede ba li Heberaiʼo eluahania ira malaʼika Lowalangi.
^ Sin.: ”ba gehehagu”.
^ Mazui ”börö me iʼoʼö gisö-isö nösi samalua horö”.
^ Te eluahania ”Ira Sangekhugö”, yaʼira mbörö wa alabu niha böʼö. Faigi Geluaha Ngawua Wehede.
^ Mazui ”Abu dödö”.
^ Eluahania ifaudugö waʼaurinia ba zomasi Lowalangi.
^ Mazui ”geu sogitö”.
^ Sin.: ”sambua kota-kota”; köfa sebua.
^ Ba li Heberaiʼo: tsohar. So göi niha sangumaʼö tsohar eluahania sagö sanaere si 1 siʼu, tenga tögi-tögi mazui sandrela lala haga.