1 Moze 7:1-24
7 Aefa daʼö imane Yehowa khö Noakhi, ”Aeʼe yawa ba nowo, ohe fefu nösi nomou börö me satulö tödö ndraʼugö ba wamaigigu, tenga simane niha ba götöu.+
2 Ohe fitu* ngaʼeu ngawalö gurifö si lö raʼiö,+ si matua ba si alawe, ba tobönö dua ngaʼeu ngawalö gurifö si raʼiö, sageu zi matua ba sageu zi alawe.
3 Simanö göi ngawalö gurifö si hombo, fitu ngaʼeu,* si matua ba si alawe, enaʼö lö tehori gurifö daʼö* ba gulidanö.+
4 Hatö fitu hari tö, utorugö deu+ ba gulidanö, 40 ngaluo ba 40 wongi,+ ba uhori fefu zonoso nifazökhigu ba gulidanö.”+
5 Ba ifalua Noakhi fefu niwaʼö Yehowa khönia.
6 Faʼalawa ndröfi Noakhi me anönö danö idanö yaʼia daʼö 600 fakhe.+
7 Fatua lö anönö danö idanö, möi yawa ba nowo Noakhi awö ndraononia matua, foʼomonia hegöi umönönia.+
8 Ba iʼohe gurifö si lö raʼiö hegöi si raʼiö awö gurifö si hombo ba sanana-nana ba danö,+
9 möi ira yawa ba nowo khö Noakhi, dua-dua ngaʼeu, si matua ba si alawe, simane niwaʼö Lowalangi khö Noakhi.
10 Fitu hari aefa daʼö, anönö danö idanö.
11 Me no 600 fakhe ndröfi Noakhi, ba ngaluo si 17 ba mbaŵa si 2, teboka mbawandruhö nidanö moroi si yawa ba mbanua ba aduwa nidanö soya.+
12 Abölö-bölö sibai deu ba gulidanö 40 ngaluo ba 40 wongi.
13 Me luo daʼö, möi Noakhi yawa ba nowo iʼohe ndraononia, Semi, Khamo ba Yafeti,+ iʼohe göi woʼomonia awö numönönia si datölu.+
14 Fao khöra fefu ngawalö gutu ndruʼu, urifö nifaliaro awö gurifö tanö böʼö* si so ba gulidanö, simanö göi ngawalö gurifö si hombo, ngawalö wofo, ba fefu gurifö soʼafi.
15 Möi fefu gurifö daʼö khö Noakhi yawa ba nowo, dua-dua ngaʼeu, yaʼia daʼö fefu ngawalö gurifö sonoso.
16 Möi ira yawa fefu he si matua hegöi si alawe ero sambua ngawalö gurifö, simane niwaʼö Lowalangi khö Noakhi. Aefa daʼö, iduhö mbawandruhö nowo Yehowa.
17 Lö tebato deu ba gulidanö sagötö zi 40 ngaluo, ba itugu möi yawa nidanö. Ibörögö tefazawa nowo italuʼi dete danö.
18 Itugu ebua molö ba ibörögö anönö zi sagörö ulidanö. Hizaʼi, molaya nowo ba dete nidanö.
19 Ebua sibai molö andrö irege lö oroma saʼae fefu hili sagalawa ba zi sagörö ulidanö.+
20 Tedou waʼebua molö irege italuʼi zuzu hili mato fitu meter* waʼalawa.
21 Ba mate fefu zonoso ba gulidanö,+ yaʼia daʼö urifö si hombo, urifö nifaliaro, utu ndruʼu ba urifö tanö böʼö,* simanö göi niha.+
22 Mate göi fefu zonoso sangokhögö hanu-hanu fangorifi.+
23 Simane daʼö wangohorinia fefu zauri ba zi sagörö ulidanö, he niha hegöi urifö nifaliaro, urifö si hombo awö gurifö tanö böʼö.* Lahori ira fefu ba gulidanö.+ Hatö Noakhi zauri ba fefu zi fao khönia ba nowo.+
24 Lö alö waʼanönö danö idanö sagötö zi 150 hari.+
Nisura ba gahe zura
^ Mazui te ”fitu fasa”.
^ Mazui te ”fitu fasa”.
^ Sin.: ”enaʼö lö mate ngaʼötöra”.
