1 Moze 8:1-22
8 Lö olifu Lowalangi khö Noakhi awö gutu ndruʼu fefu ba urifö nifaliaro yawa ba nowo.+ Iʼasogö nangi Lowalangi sanörini ulidanö ba ibörögö alö nidanö.
2 Tebato waʼaduwa nidanö moroi si yawa ba mbanua ba teduhö mbawandruhö nidanö ba mbanua si yawa, irege tebato* deu sabölö-bölö.+
3 Ibörögö alö nidanö ba gulidanö. Me no irugi 150 hari, alö saʼae nidanö.
4 Ba ngaluo si 17 ba mbaŵa si 7, tosake nowo ba Hili Gararata.
5 Itugu alö waʼebua nidanö ba mbaŵa si 10. Ba ngaluo si oföna ba mbaŵa si 10, ibörögö oroma zuzu hili.+
6 Me no aefa zi 40 hari, ibokai zandrela+ nowo andrö Noakhi,
7 ba ifoloi sambua wofo gaga. Ifangörö-ngörö manö ia fofo daʼö wehombo-hombo irege ogöʼö nidanö ba gulidanö.
8 Aefa daʼö, ifoloi sambua marafadi ba wamaigi na no ogöʼö nidanö.
9 Lö isöndra dugelania marafadi andrö, ba mangawuli ia ba nowo börö me lö nasa soroma dete danö.+ Börö daʼö, iʼoroʼö dangania ba wolohe marafadi andrö yawa ba nowo.
10 Ibaloi fitu hari tö ba ifuli ifoloi marafadi andrö.
11 Me arakhagö bongi, mangawuli marafadi andrö ba iʼila Noakhi ba mbawa marafadi daʼö mbadö-badö mbulu zaitu sawena ifatö! Awena aboto ba dödö Noakhi wa no ogöʼö nidanö.+
12 Ifuli zui ibaloi fitu hari tö. Ifoloi marafadi daʼö hizaʼi lö mangawuli ia saʼae.
13 Ba ndröfi si 601+ ba ngaluo si oföna ba mbaŵa siföföna, no ogöʼö nidanö. Ibokai ösa zagö nowo andrö Noakhi ba ifakhölö ia, iʼila wa no otufo dete danö.
14 Ba ngaluo si 27 ba mbaŵa si 2, sindruhu-ndruhu wa no otufo dete danö.
15 Imane Lowalangi khö Noakhi,
16 ”Aeʼe baero moroi ba nowo, ohe woʼomou, iraonou matua awö numönöu.+
17 Ohe göi baero fefu ngawalö gurifö si fao khöu,+ urifö si hombo, urifö nifaliaro, ba urifö tanö böʼö,* enaʼö moʼono ira ba monönö waʼoya ba gulidanö.”+
18 Ba möi baero Noakhi hegöi iraononia matua,+ foʼomonia ba umönönia.
19 Fefu gurifö, he urifö si hombo hegöi urifö tanö böʼönia,* awö zaliwa-liwa ba danö, möi ira baero moroi ba nowo andrö moloʼö ngawawara zamösana.+
20 Aefa daʼö, ifazökhi Noakhi naha wanunu sumange+ khö Yehowa. Ihalö mato hauga ngaʼeu gurifö ba mato hauga ngawua wofo si lö raʼiö,+ ibeʼe zumange nitunu ba naha wanunu sumange andrö.+
21 Ibörögö omuso dödö Yehowa me iʼago hua zumange andrö. Imane tödönia Yehowa, ”Lö irai uʼelifi saʼae danö+ ha börö niha, börö me lö sökhi gera-era dödö niha iʼotarai iraono ia.+ Lö irai saʼae uhori fefu zonoso simane si no ufalua.+
22 Iʼotarai maʼökhö, lö tebulö so mbaŵa wananö ba gulidanö awö mbaŵa wamasi, faʼokafu ba faʼaukhu zino, baŵa lökhö hegöi baŵa deu, si maʼökhö ba si bongi.”+
