Sara Razo 10:1-29
10 Me irongo ratu moroi ba Zeba duria sanandrösa ba waʼatehöngö Zelomo börö döi Yehowa,+ andrö wa möi ia itandraigö Zelomo ba wameʼe fanofu sagabua.*+
2 Ofeta ia ba Yeruzalema ba ato sibai zi fao khönia,+ so gondra solohe fanikha famayoini,+ anaʼa soya hegöi kara sebua böli. Iʼondrasi Zelomo ba ibeʼe wanofu si so ba dödönia.
3 Ibeʼe wanema li Selomo ba ngawalö zinofunia ba ihaogö wanutunö. Lö hadöi sabua* khönia.
4 Me iʼila ratu moroi ba Zeba fefu waʼatua-tua Zelomo,+ omo nifazökhinia,+
5 ö si so ba mezania,+ famöfögö naha wedadao ndra sohalöwö khönia, lagu ndra sawuyunia ba wameʼe gö ba meza hegöi fonukhara, solohe önia idanö awö zumange nitunu si lö tebulö ibeʼe ba nomo Yehowa, ahöli-höli sibai dödönia.*
6 Andrö wa imane khö Razo, ”Atulö nirongogu ba soigu sanandrösa ba waʼatua-tuamö hegöi ngawalö zi no öfalua.*
7 Awena faduhu dödögu me uʼondrasi ndraʼugö ba uʼila samösa daʼö. Ambö matonga niʼombakhaʼöra khögu! Abölö atua-tua ba kayo ndraʼugö moroi ba zi no urongo.
8 Owua-wua sibai dödö nono mbanuamö awö ndra enonimö si fao khöu, börö me lö aetu-aetu lafondrondrongo waʼatua-tuamö!+
9 Yatesuno Yehowa Lowalangimö andrö,+ si no mangomasiʼö yaʼugö irege ifataro ndraʼugö ba dadaoma waʼarazo ba ndraono Gizaraʼeli. Börö me iʼomasiʼö ndraono Gizaraʼeli Yehowa sagötö faʼara, andrö wa ibaliʼö ndraʼugö razo ba wamalua sindruhu hegöi satulö.”
10 Aefa daʼö, ibeʼe mbualania khö Razo Selomo 4.104 kilogram* ganaʼa, kara sebua böli,+ ba oya sibai wanikha famayoini.+ Lö hadöi saʼae solohe fanikha famayoini simane faʼoya niʼohe ratu moroi ba Zeba khö Razo Selomo.
11 Köfa Hiramo zolohe anaʼa moroi ba Gofiri,+ simanö göi gara segebua böli+ ba oya sibai geu cendana moroi ba daʼö.+
12 Iʼogunaʼö geu andrö Razo ba wamazökhi toga-toga ba nomo Yehowa awö ba gödo razo, ba wamazökhi harafa ba fakake zinunö nifosinali khö ndra sanunö.+ Lö hadöi saʼae solohe mazui sangila faʼoya geu cendana simane daʼö irugi maʼökhö.
13 Ibeʼe Razo Selomo fefu niʼandrö ratu moroi ba Zeba awö ngawalö zomasi ia, inönö nasa mbuala tanö böʼö börö waʼoböwönia. Aefa daʼö, mangawuli ratu andrö ba soinia, fao ira ndra enoninia.+
14 Laʼohe ganaʼa khö Zelomo 22.777 kilogram* ero röfi,+
15 baero nasa hare nitemania moroi khö ndra saniaga, sogale ba fefu ndra razo niha Garabi awö ndra gubernur ba soi daʼö.
16 Ifazökhi göi Selomo 200 mbaluse sebua moroi ba ganaʼa si no mufaruka,+ ero sambua baluse faʼabuania 6,84 kilogram.*+
17 Baero daʼö, ifazökhi 300 ngawua mbaluse side-ide* moroi ba ganaʼa si no mufaruka, ero sambua baluse faʼabuania 1,7 kilogram.* Aefa daʼö, möi Razo wameʼe daʼö fefu ba Nomo Gatua Libano.+
18 Ifazökhi göi Razo dadaoma sebua moroi ba nifö gaza+ ba ifoʼuli faoma anaʼa si no mufatörö ba galitö.+
19 So önö ngawua mbosi nora föna dadaoma andrö, ba tanö furi dadaoma no mufasa zagö si no owulo-wulo. So göi naha danga ba dadaoma andrö faoma fatambai, ba so dua ngaʼeu wamaedo zingo+ si no mufozizio ba zingania.
20 No mufozizio faoma fatambai wamaedo zingo ba zi önö ngawua mbosi nora andrö, so 12 ngaʼeu fefu. Lö hadöi amatöröwa tanö böʼö samazökhi dadaoma simane daʼö.
21 Moroi ba ganaʼa fefu mako niʼogunaʼö Razo Selomo. Fefu gama-gama si so ba Nomo Gatua Libano+ tefazökhi moroi ba ganaʼa si sökhi. Lö hadöi nifazökhi moroi ba wirö, börö me lö moguna sibai wirö me götö Zelomo.+
22 So khö razo göfa Darisi+ soloyo ba nasi si fao ba göfa Hiramo. Sakali tölu fakhe, mangawuli göfa Darisi andrö ba wolohe anaʼa, firö, ifö gaza,+ baʼe hegöi fofo meraki.
23 Abölö kayo+ ba atua-tua Razo Selomo+ moroi ba razo tanö böʼö ba zi sagörö ulidanö.
24 Dozi niha ba gulidanö laʼodödögö wamalukhaisi* Razo Selomo ba wamondrondrongo faʼatua-tua nibeʼe Lowalangi khönia.+
25 Ero röfi, möi ira laʼohe mbuala khönia simane gama-gama moroi ba wirö, anaʼa, nukha, fakake wasuwöta, fanikha famayoini, kudo hegöi kalide sebua.*
26 Lö iböhöli Selomo wangowuloi kureta wasuwöta awö kudo,* irege so khönia 1.400 gureta wasuwöta ba 12.000 ngaʼeu kudo.*+ Ibeʼe fefu daʼö ba mbanua si no tobali naha wangiröʼö kureta wasuwöta hegöi ba nahia sahatö ba gödo razo ba Yeruzalema.+
27 Faʼoya wirö niʼowuloinia ba Yeruzalema simane faʼoya gara, ba faʼoya geu eresi simane faʼoya geu ara gatua ba Zefela.+
28 Ba danö Miserai* lahalö kudo Zelomo. Ira saniaga sohalöwö khönia, daʼö zowöli ngawawa kudo andrö* ba no latatugöi mbölinia.+
29 Böli zi sara kureta wasuwöta moroi ba Miserai yaʼia daʼö 600 loga firö, ba böli kudo si sageu 150 loga firö. Aefa daʼö, laʼamawa khö ndra razo niha Kheti+ hegöi khö ndra razo Ziria maʼafefu.
Nisura ba gahe zura
^ Mazui ”ba wameʼe dahö-dahö”.
^ Sin.: ”si tobini”.
^ Sin.: ”atata dölania”.
^ Mazui ”fehedemö”.
^ Baluse si toʼölö laʼohe si möi fafana.
^ Mazui ”laʼodödögö faʼila bawa khö”.
^ Ba li Heberaiʼo eluahania ngaʼötö galide ba kudo.
^ Mazui ”si fakudo”.
^ Mazui ”zi fakudo”.
^ Mazui te ”Moroi ba Miserai hegöi ba Gewe”, te ba Gilikia.
^ Mazui te ”daʼö zowöli ngawawa kudo andrö moroi ba Gewe”.
