Sara Razo 13:1-34
13 Samösa genoni Lowalangi+ moroi ba Yehuda, möi ia ba Mbetieli börö me no iwaʼö khönia Yehowa. Me luo daʼö, no mozizio Yerobeamo ahatö ba naha wanunu sumange+ ba itunu zumange irege numalö miyawa zimbo.
2 Simane niwaʼö Yehowa, imane enoni Lowalangi andrö sanandrösa ba naha wanunu sumange, ”He naha wanunu sumange, he naha wanunu sumange! Imane Yehowa sanandrösa khöu: ’So samösa dania nono matua si tumbu moroi ba ngaʼötö Dawido töinia Yosia!+ Ba detemö ibunu ndra ere sangai halöwö ba nahia sagalawa yaʼia daʼö sanunu sumange irege numalö miyawa zimbo. Itunu göi döla niha ba daʼö.’”+
3 Iʼombakhaʼö dandra enoni Lowalangi andrö me luo daʼö imane, ”Daʼa dandra nibeʼe Yehowa: Tebagi dua dania naha wanunu sumange ba aduwa nawu* si so ba detenia.”
4 Me irongo Razo Yerobeamo wehede genoni Lowalangi sindruhu andrö sanandrösa ba naha wanunu sumange ba Mbetieli, isöbi dangania moroi ba naha wanunu sumange ba ituturu genoni Lowalangi daʼö imane, ”Raʼu ia!”+ Iʼanemaiʼö abeʼe* dangania ba tebai iböda mangawuli.+
5 Aefa daʼö, tebagi dua naha wanunu sumange andrö ba aduwa nawu si so ba detenia. Tefaudu simane dandra niwaʼö Yehowa khö genoni Lowalangi sindruhu.
6 Imane Razo khö genoni Lowalangi sindruhu andrö, ”Uʼandrö khöu enaʼö öʼandrö waʼahakhö dödö khö Yehowa Lowalangiu. Angandrö enaʼö tefadöhö dangagu.”+ Mangandrö genoni Lowalangi sindruhu ba wangandrö faʼahakhö dödö Yehowa, ba döhö danga Razo.
7 Aefa daʼö imane Razo khö genoni Lowalangi sindruhu, ”Aine, datalau manga ba nomogu. So mbuala somasido ubeʼe khöu.”
8 Hizaʼi, imane enoni Lowalangi sindruhu, ”He öbeʼe khögu matonga gödo razo si toröi yaʼugö, lö faodo khöu wemanga roti mazui mamadu idanö ba nahia daʼa.
9 No iwaʼö khögu Yehowa, ’Böi a roti mazui öbadu nidanö, ba na mangawuliʼö böi törö lala nitöröu mege me tohareʼö.’”
10 Mofanö ia itörö lala böʼö, lö ifuli itörö lala nitörönia me möi ia ba Mbetieli.
11 So samösa zamaʼeleʼö si no atua si toröi ba Mbetieli. Me mangawuli ndraononia matua, latutunö fefu nifalua genoni Lowalangi sindruhu ba Mbetieli awö niwaʼönia khö Razo maʼökhö daʼö. Me no awai latutunö
12 isofu khöra bapara, ”Hezo so itörö mege?” Latuturu khönia lala nitörö genoni Lowalangi sindruhu andrö moroi ba Yehuda.
13 Aefa daʼö imane khöra, ”Mifosela* galide.” Me no aefa lafalua daʼö, mofanö ia itörö galide.
14 Iʼoʼö genoni Lowalangi sindruhu andrö ba iʼila no modadao ia barö geu sebua. Aefa daʼö manofu zamaʼeleʼö andrö, ”Hadia enoni Lowalangi sindruhu ndraʼugö moroi ba Yehuda?”+ Imane, ”Yaʼia.”
15 Imane samaʼeleʼö andrö, ”Aine, taʼa roti ba nomogu.”
16 Hizaʼi imane, ”Tebai faodo khöu mazui möido ba nomou. Tebai faodo khöu wemanga roti mazui mamadu idanö ba nahia daʼa.
17 No iwaʼö khögu Yehowa, ’Tebai öʼa roti mazui öbadu nidanö ba daʼö. Na mangawuliʼö böi törö lala nitöröu mege me tohareʼö.’”
18 Imane samaʼeleʼö andrö, ”Samaʼeleʼö göi ndraʼo simane yaʼugö. So malaʼika samaʼema oroisa Yehowa andre khögu, ’Waʼö khönia enaʼö fao ami wangawuli ba nomou irege tola iʼa roti ba ibadu nidanö.’” Sindruhunia, falimo zamaʼeleʼö daʼö.
19 Fao genoni Lowalangi andrö khönia ba wemanga roti hegöi ba wamadu idanö ba nomonia.
20 Me no modadao ira ba zinga meza, mohede Yehowa khö zamaʼeleʼö si no atua andrö solohe mangawuli enoni Lowalangi sindruhu.
21 Imane samaʼeleʼö si no atua andrö khö genoni Lowalangi sindruhu moroi ba Yehuda, ”Imane Yehowa, ’Börö me no ösawö goroisa nibeʼe Yehowa ba lö öʼoʼö niwaʼö Lowalangiu Yehowa,
22 ba me no öfuliʼö wemanga roti ba mamadu idanö ba nahia si no iwaʼö khöu, ”Böi a roti mazui öbadu nidanö”, lö lakoʼo ndraʼugö ba lewatö ndra tuamö.’”+
23 Ba me no aefa manga roti ba mamadu idanö genoni Lowalangi sindruhu andrö, möi zamaʼeleʼö si no atua ba ifosela* galide khö zamaʼeleʼö si fao khönia wangawuli.
24 Me mofanö ia, falukha khönia zingo ba lala, ba iʼa ia singo daʼö.+ No tefadölö gamatelania ba so galide hegöi singo ba zingania.
25 Ba me so zanörö lala, laʼila mboto zi mate andrö awö zingo si no mozizio ba zingania. Möi ira latutunö ba mbanua si so samaʼeleʼö si no atua andrö.
26 Me irongo daʼö, imane samaʼeleʼö si no atua andrö solohe yaʼia mangawuli, ”Yaʼia andrö enoni Lowalangi sindruhu si no manawö oroisa Yehowa.+ No ilulu ia Yehowa enaʼö iʼa ia singo, simane niwaʼö Yehowa khönia.”+
27 Aefa daʼö, imane khö ndraononia matua, ”Mifosela* galide.” Lafalua daʼö.
28 Mofanö ia ba iʼila mboto zi mate si so ba lala, ba zinga daʼö no mozizio galide hegöi singo. Lö niʼa zingo boto zi mate andrö ba lö nisasawinia kalide.
29 Ifazawa ba galide mboto genoni Lowalangi sindruhu ba mangawuli ia ba mbanuania, iʼohe mboto zi mate andrö ba wangeʼesi hegöi ba wogoʼo yaʼia.
30 Ba lewatö nifazökhinia ibeʼe mboto zi mate andrö, ba lö aetu laʼeʼesi. Lamane, ”Alai ndraʼo ndraʼugö talifusögu!”
31 Me no aefa lakoʼo, imane samaʼeleʼö si no atua andrö khö ndraononia, ”Na matedo, mikoʼo ndraʼo ba nahia nikoʼo genoni Lowalangi sindruhu daʼö. Ba ngai dölania mibeʼe dölagu.+
32 Hasambalö alua fefu wehede Yehowa nifaʼemania sanandrösa ba naha wanunu sumange ba Mbetieli hegöi ba nahia wamosumange si so ba nahia sagalawa+ ba mbanua Zamaria.”+
33 Me no alua daʼö, lö iböhöli wamalua lala si lö sökhi andrö Yerobeamo. Lö aetu ifataro niha si toʼölö ba wangai halöwö tobali ere ba nahia sagalawa.+ Ifataro fefu niha somasi ia ba imane, ”Niha daʼa zi tobali ere ba nahia salawa.”+
34 Nifaluania andre tobali horö ba nösi nomo Yerobeamo+ irege daʼa zi möi famakiko ba fangohori yaʼira ba gulidanö.+
Nisura ba gahe zura
^ Mazui ”nawu sotawö”, yaʼia daʼö awu si no mufaruka ba dawö gurifö nibeʼe sumange.
^ Mazui ”oköli”.
^ Mazui ”Mifasa dadaoma ba hulu”.
^ Mazui ”ifasa dadaoma ba hulu”.
^ Mazui ”Mifasa dadaoma ba hulu”.
