Sara Razo 16:1-34
16 Daʼa niwaʼö Yehowa sanandrösa khö Mbaesa nifaʼemania khö Yehu+ ono Hanani,+
2 ”No ufazawa ndraʼugö moroi ba gawu-gawu ba no ubaliʼö ndraʼugö sondröniaʼö ono mbanuagu Izaraʼeli.+ Hizaʼi, ötörö lala Yerobeamo ba öfaelungu nono mbanuagu Izaraʼeli ba wamalua horö irege laʼafökhöiʼö dödögu börö horö nifaluara.+
3 Börö daʼö, uhori Mbaesa hegöi ngaʼötönia simane fangohorigu ngaʼötö Yerobeamo+ ono Nebati.
4 Ösi nomo Mbaesa si mate yomo ba mbanua, asu zi manga yaʼira. Ösi nomonia si mate baero mbanua, fofo zi manga yaʼira.”
5 Fefu waö-waö tanö böʼö sanandrösa khö Mbaesa, tefarahu ba daʼö nifaluania awö zi no ikhamö, no tesura daʼö ba mbuku razo-razo ndraono Gizaraʼeli.
6 Ba gafuriata mate Mbaesa* ba lakoʼo ia ba Dirisa.+ Aefa daʼö, ononia Ela zi tobali razo fangalinia.
7 Ifaʼema wanguhukunia Yehowa khö Yehu samaʼeleʼö ono Hanani sanandrösa khö Mbaesa hegöi ba ngaʼötönia börö me no ifalua zi lö sökhi fönania, ba no iʼafökhöiʼö dödö Yehowa simane ösi nomo Yerobeamo, ba no ibunu Nadabi.+
8 Me no 26 fakhe mamatörö Asa razo Yehuda, mufataro Gela ono Mbaesa tobali razo ba ndraono Gizaraʼeli, ba dua fakhe mamatörö ia ba Dirisa.
9 Mamagölö genoninia sotöi Simeri ba wolawa yaʼia. Simeri andrö kumandru zi matonga saradadu solohe kureta wasuwöta. Me luo daʼö ba Dirisa so Gela, no mabu ia ba nomo Garasa, sondröniaʼö ba gödo razo si so ba Dirisa.
10 Tohare Zimeri ba ibunu Gela,+ ba tobali ia razo fangali Gela. Alua daʼa me no 27 fakhe mamatörö Asa razo Yehuda.
11 Me tobali ia razo ba modadao ia ba dadaoma waʼarazo, iʼanemaiʼö ibunu fefu nösi nomo Mbaesa. Ahori ibunu fefu ndra matua,* he si fahatö* mazui si fahuwu khö Mbaesa.
12 Ihori fefu nösi nomo Mbaesa simane nifaʼema Yehowa khö Yehu samaʼeleʼö.+
13 Alua daʼö börö horö nifalua Mbaesa awö nononia Ela ba me no lafaelungu ndraono Gizaraʼeli ba wamalua horö irege laʼafökhöiʼö dödö Yehowa Lowalangi ndraono Gizaraʼeli, yaʼia me lafazökhi nadu si lö moguna.+
14 Fefu waö-waö tanö böʼö sanandrösa khö Gela awö nifaluania, no tesura daʼö ba mbuku razo-razo ndraono Gizaraʼeli.
15 Me no 27 fakhe mamatörö Asa razo Yehuda, mufataro Zimeri tobali razo ba Dirisa fitu hari waʼara. Me luo daʼö, no lafazökhi nose ira saradadu ba wanuwö Gibetona,+ banua niha Wilisiti.
16 Aefa daʼö, larongo ira saradadu wa no mamagölö Zimeri ba no ibunu Razo. Fefu ndraono Gizaraʼeli ba zi maʼökhö daʼö, lafataro Gomeri+ kumandru saradadu andrö tobali razora. Lafalua daʼö ba nose.
17 Mofanö Gomeri awö ndraono Gizaraʼeli maʼafefu moroi ba Gibetona ba möi ira lafaʼuʼu Dirisa.
18 Me iʼila Simeri wa no murabu mbanua andrö, möi ia ba domosa si no mufasui öli si so ba gödo razo. Me so ia bakha ba gödo razo, itunu nahia daʼö irege mate ia.+
19 Alua daʼö börö horö nifaluania me no iʼoʼö lala Yerobeamo irege ifalua zi lö sökhi föna Yehowa awö horö nifalua ndraono Gizaraʼeli me no ifaelungu ira Simeri.+
20 Fefu waö-waö tanö böʼö sanandrösa khö Zimeri, tefarahu ba daʼö zi lö sökhi niʼera-erania, no tesura daʼö ba mbuku razo-razo ndraono Gizaraʼeli.
21 Me luo daʼö, tebagi dua ndraono Gizaraʼeli. So zi fao khö Dibini ono Ginata börö me omasi ira lafataro ia tobali razo, ba so göi zi fao khö Gomeri.
22 Fefu zi fao khö Gomeri lakalaisi zi fao khö Dibini ono Ginata. Aefa daʼö, mate Dibini ba mufataro Gomeri tobali razo.
23 Me no 31 fakhe mamatörö Asa razo Yehuda, mufataro Gomeri tobali razo ba ndraono Gizaraʼeli ba mamatörö ia 12 fakhe waʼara. Önö fakhe mamatörö ia ba Dirisa.
24 Iʼöli hili Zamaria khö Zemeri, faʼebua mbölinia 68,4 kilogram* wirö ba ifazökhi mbanua ba hili andrö. Ifotöi mbanua daʼö Samaria,*+ simane töi Zemeri sokhö hili andrö.
25 Lö aetu-aetu ifalua zi lö sökhi Gomeri föna Yehowa, abölö-bölö waʼalösökhinia moroi khö ndra razo fatua lö yaʼia.+
26 Lö iböhöli woloʼö lala Yerobeamo ono Nebati awö horö ndraono Gizaraʼeli maʼafefu börö me no ifaelungu ira Yerobeamo, no laʼafökhöiʼö dödö Yehowa Lowalangi ndraono Gizaraʼeli yaʼia daʼö me lafazökhi nadu si lö moguna.+
27 Fefu waö-waö tanö böʼö sanandrösa khö Gomeri tefarahu ba daʼö nifaluania awö zi no ikhamö, no tesura daʼö ba mbuku razo-razo ndraono Gizaraʼeli.
28 Ba gafuriata, mate Gomeri* ba lakoʼo ia ba Zamaria. Aefa daʼö, ononia Ahabi+ zi tobali razo fangalinia.
29 Me no 38 fakhe mamatörö Asa razo Yehuda, mufataro Gahabi ono Gomeri tobali razo ba ndraono Gizaraʼeli, ba mamatörö ia 22 fakhe waʼara ba Zamaria.+
30 Ba wamaigi Yehowa, abölö-bölö waʼalösökhi Gahabi ono Gomeri moroi khö ndra razo fatua lö yaʼia.+
31 Iʼoʼö horö nifalua Yerobeamo+ ono Nebati, hizaʼi tenga ha daʼö manö nifaluania. Mangowalu ia khö Gizebela+ ono Getibaʼali razo niha Zidona,+ ba ibörögö ifosumange Mbaʼali+ ba mangalulu ia ba daʼö.
32 Ifazökhi naha wanunu sumange khö Mbaʼali ba nomo* Mbaʼali+ nifazökhinia ba Zamaria.
33 Ifazökhi göi döla-döla niʼamoniʼö.*+ Abölö oya horö nifaluania moroi khö ndra razo fatua lö yaʼia irege afökhö dödö Yehowa Lowalangi ndraono Gizaraʼeli khönia.
34 Me mamatörö Gahabi, ifuli ifasindro Yerikho andrö Hieli niha Mbetieli. Mate nononia siaʼa sotöi Abiramo börö me ifazökhi wondrasi ba mbanua andrö. Ba mate Zegubi ononia siakhi börö me ifazökhi mbawandruhö göli. Tefaudu daʼa ba niwaʼö Yehowa khö Yosua ono Nuni.+
Nisura ba gahe zura
^ Sin.: ”lafadölö Mbaesa ba ngai ndra tuania”.
^ Sin.: ”ibunu gofu haniha zi kiö ba dowa”. Daʼa ngawua wehede ba li Heberaiʼo fangailasi ndra matua.
^ Mazui ”solau balö”.
^ Eluahania ”Okhöta Niha Zemeri”.
^ Sin.: ”lafadölö Gomeri ba ngai ndra tuania”.
^ Mazui ”nahia wamosumange”.
^ Faigi Geluaha Ngawua Wehede.
