Sara Razo 17:1-24
17 Aefa daʼö, fahölu Gelia*+ niha Disebe si toröi ba Gileadi+ khö Gahabi, ”Faya wa no sauri Yehowa Lowalangi ndraono Gizaraʼeli nifosumangegu, na so namo mazui teu ba zi hauga fakhe faʼara, baero na yaʼo zangandrö yaʼia!”+
2 Imane khönia Yehowa,
3 ”Röi nahia andre. Aeʼe tanö ba gatumbukha ba biniʼö ndraʼugö ba Ndraso Geriti, si so ba gatumbukha Nungo Nidanö Yoridano.
4 Ba nungo nidanö andrö dania öhalö göu idanö, ba ufatenge wofo gaga ba wangaʼasogö soguna khöu.”+
5 Iʼanemaiʼö mofanö Gelia ba ifalua niwaʼö Yehowa. Toröi ia ahatö ba Ndraso Geriti, si so ba gatumbukha Nungo Nidanö Yoridano.
6 Ero sihulö wongi hegöi ba zi bongi, tohare wofo gaga ba wamasao önia roti awö nagole gurifö, ba nungo nidanö si so ba daʼö ihalö gönia idanö.+
7 Hauga hari aefa daʼö, oköli nungo nidanö andrö+ börö me lö salua deu ba soi daʼö.
8 Imane khönia Yehowa,
9 ”Ae ba Zarefa ba mbanua Zidona ba iagö daʼö. Ufatenge samösa lakha mbanua ba daʼö ba wangaʼasogö soguna khöu.”+
10 Möi Gelia ba Zarefa. Me irugi mbawa göli ba mbanua andrö, so samösa lakha mbanua sangowuloi eu. Ikaoni ia Elia ba imane, ”Beʼe ögu maʼifu nidanö.”+
11 Me mofanö lakha mbanua andrö ba wangai idanö, ifuli ikaoni ia Elia ba imane, ”Ohe göi ögu safoto roti.”
12 Imane lakha mbanua andrö, ”Faya wa no sauri Yehowa na so ba daʼa khögu roti. Ha sagokhö darigu si so ba rumbi sebua ba ha maʼifu wanikha ba rumbi side-ide.+ Na no aefa uʼowuloi geu andre, mangawulido yomo ba urino göma daruaga onogu. Daʼö gö safuria niʼama, aefa daʼö mate ndraʼaga.”
13 Imane Elia, ”Böi busi dödöu. Angawuli ba falua zi no öwaʼö. Hizaʼi, fatua lö örino göu hegöi ö nonou, fazökhi ögu roti side-ide ba ohe ba daʼa.
14 Imane Yehowa Lowalangi ndraono Gizaraʼeli, ’Lö ahori darigu si so ba rumbi sebua andrö, ba lö ahori wanikha si so ba rumbi side-ide irege atoru deu ba danö ibeʼe Yehowa.’”+
15 Mofanö lakha mbanua andrö ba ifalua hadia niwaʼö Gelia irege lö moʼamböta zoguna khönia, ösi nomonia awö zoguna khö Gelia ba zi hauga fakhe.+
16 Lö ahori darigu si so ba rumbi sebua ba lö ahori wanikha si so ba rumbi side-ide, simane niwaʼö Yehowa khö Gelia.
17 Ba gafuriata, mofökhö nono ndra alawe sokhö omo andrö, itugu abölö-bölö wökhö nono daʼö ba mate.+
18 Imane lakha mbanua andrö khö Gelia, ”He enoni Lowalangi sindruhu, hana wa öfalua daʼa khögu? Hadia möiʼö ba daʼa ba wamasugi ba dödögu zala si no ufalua hegöi ba wamunu onogu?”+
19 Imane Elia, ”Ohe ia ba daʼa.” Ihalö nono andrö moroi ba danga ninania ba iʼohe ba naha wemörönia si so ba lote, ba daʼö ifadölö.+
20 Muʼao ia khö Yehowa imane, ”He Yehowa Lowalangigu,+ hadia öʼasogö gabula dödö khö lakha mbanua andre si no mangehenaigö nahia waʼatoröigu, yaʼia me ötehegö mate nononia?”
21 Italagui nono daʼö medölu kali ba muʼao ia khö Yehowa, ”He Yehowa Lowalangigu, uʼandrö khöu fuli orifi nono andre.”*
22 Ifondrondrongo Yehowa wangandrö Gelia+ ba ifuli auri nono andrö.+
23 Iʼohe nono andrö Elia moroi ba lote ba ibeʼe khö ninania. Imane Elia, ”Yaʼe nonou, no ifuli auri.”+
24 Imane lakha mbanua andrö khö Gelia, ”Awena aboto ba dödögu wa enoni Lowalangi sindruhu ndraʼugö,+ ba itörö fefu nifaʼema Yehowa khöu.”
