Sara Razo 19:1-21
19 Iʼombakhaʼö Ahabi+ khö Gizebela+ fefu nifalua Gelia awö wa no ahori ibunu ndra samaʼeleʼö khö Mbaʼali faoma föda.+
2 Ifaʼoheʼö goroisania Izebela khö Gelia, ”Yaʼibeʼe khögu wanguhuku sabölö-bölö lowalangigu na lö ufalua khöu simane nifaluau khö ndra samaʼeleʼö khögu ba zimane daʼa faʼalawa luo mahemolu!”
3 Ataʼu Gelia ba moloi ia ba wangorifi nosonia.+ Ofeta ia ba Mbere-seba+ si so ba Yehuda,+ ba iröi genoninia ba daʼö.
4 Me no maʼökhö fofanö ia ba danö si mate, modadao ia ba mbörö daʼuli ba iʼandrö enaʼö mate ia. Imane, ”Ibönö daʼö! He Yehowa, halö manö nosogu.+ Lö abölö sökhi ndraʼo moroi khö ndra tuagu.”
5 Aefa daʼö, ifadölö ia ba ilau mörö ba mbörö daʼuli. Iʼanemaiʼö ibabaya ia+ malaʼika ba imane, ”Faoso, lau manga.”+
6 Me ifakhölö ia, iʼila kue sowulo-wulo ba zinga högönia, no mubeʼe ba dete gara saukhu ba so sambua naha nidanö ba daʼö. Ilau manga ba ibadu nidanö, ba ifuli zui ifadölö ia.
7 Ifuli zui tohare malaʼika Yehowa ba zi mendrua kali, ibabaya Gelia ba imane, ”Faoso, lau manga börö me aröu nasa lala nitöröu.”
8 Maoso Gelia, ilau manga ba ibadu nidanö irege ifuli abölö ia. Mowaö-waö ia ba zi 40 ngaluo ba 40 wongi irege ofeta ia ba Hili Horebi, hili si no ifili Lowalangi sindruhu.+
9 Möi ia bakha ba dögi narö hili,+ ba daʼö ilau mörö. Imane khönia Yehowa, ”Hadia nifaluau ba daʼa Elia?”
10 Imane Elia, ”He Yehowa Lowalangi samatörö saradadu zorugo,+ no uforege wangai halöwö khöu. Hizaʼi, no laʼerogö mbuʼusa liu iraono Gizaraʼeli,+ no ladudugö naha wanunu sumange ba no labunu faoma föda+ ndra samaʼeleʼö andrö khöu. Hatö yaʼo zauri, ba iadaʼa laʼalui lala wamunu yaʼo.”+
11 Imane khönia Lowalangi, ”Ae baero, ozizio ba hili andrö föna Yehowa.” Itörö Yehowa nahia daʼö+ ba alua nangi sabölö-bölö irege asila hili ba arasa hili sokara föna Yehowa,+ hizaʼi lö hadöi Yehowa ba nangi andrö. Me no aefa nangi sabölö-bölö andrö, alua göi ndruru danö,+ hizaʼi lö hadöi Yehowa ba ndruru danö andrö.
12 Me no aefa ndruru danö, alua galitö+ hizaʼi lö hadöi Yehowa ba galitö andrö. Me no aefa daʼö, terongo li side-ide ba sohau-hau.+
13 Me irongo daʼö Elia, ihalö nukhania sebua+ ibalugö mbawania, möi ia baero ba mozizio ia ba mbawa dögi narö hili. Aefa daʼö, terongo li sangumaʼö, ”Hadia nifaluau ba daʼa Elia?”
14 Imane, ”He Yehowa Lowalangi samatörö saradadu zorugo, no uforege wangai halöwö khöu. Hizaʼi, no laʼerogö mbuʼusa liu iraono Gizaraʼeli,+ no ladudugö naha wanunu sumange ba no labunu faoma föda ndra samaʼeleʼö andrö khöu. Hatö yaʼo zauri, ba iadaʼa laʼalui lala wamunu yaʼo.”+
15 Imane Yehowa, ”Angawuli ba Danö si Mate Ndramaseko. Na no örugi daʼö, bayoini Hazaeli+ tobali razo ba Ziria.
16 Bayoini göi Yehu+ maʼuwu Nimisi tobali razo ba ndraono Gizaraʼeli, ba bayoini Gelisa* ono Zafata banua Habeli-mehola tobali samaʼeleʼö fangaliu.+
17 Gofu haniha zi lö fakhamö ibunu Hazaeli faoma föda,+ Yehu dania zamunu yaʼira.+ Gofu haniha zi lö fakhamö ibunu Yehu faoma föda, Elisa dania zamunu yaʼira.+
18 So nasa 7.000 ndraono Gizaraʼeli+ si lö mangalulu föna Mbaʼali+ ba si lö irai faʼuma khönia.”+
19 Mofanö Gelia ba falukha ia khö Gelisa ono Zafata. Me luo daʼö mohalöwö Gelisa ba wamaku tanö, iʼogunaʼö 12 fasa zawi si matua ba no mozizio ia furira. Möi ifalukhaisi ia Elia ba ibeʼe mbarunia sebua+ khö Gelisa.
20 Iröi fefu zawi andrö Elisa, ilau fagohi ba wogamö Elia ba imane, ”Tehegö khögu weʼamöi mangona* khö bapagu hegöi khö mamagu. Aefa daʼö, hasambalö uʼoʼö ndraʼugö.” Imane Elia, ”Aeʼe, lö utahaʼö.”
21 Mangawuli Gelisa ba ihalö dua ngaʼeu zawi si matua ba ibeʼe daʼö tobali sumange. Iʼogunaʼö geu sasese ifake ba wamaku tanö ba wondrino sawi andrö. Aefa daʼö, ibagi-bagi ba niha ba laʼa. Me no awai daʼö fefu, iʼoʼö Gelia ba tobali ia ngoni-ngoninia.+
