Sara Razo 4:1-34
4 Mamatörö Razo Selomo ba ndraono Gizaraʼeli maʼafefu.+
2 Daʼa döi-töi zohalöwö* khönia: Asaria ono Zadoki+ zi tobali ere;
3 Elihorefi ba Ahia yaʼia daʼö ono Zisa zi tobali sekretaris;+ Yozafati+ ono Gahiludi zi tobali tuka sanura;
4 Benaya+ ono Yehoyada zi tobali sondröniaʼö saradadu; Sadoki ba Abiataro+ zi tobali ere;
5 Asaria ono Natano+ zi tobali kafalo ndra sondröniaʼö ba mbanua misa; Sabudu ono Natano zi tobali ere hegöi si fahuwu khö razo;+
6 Ahisari zi tobali sondröniaʼö ba gödo razo; ba Adonira+ ono Gabada zondröniaʼö niha niʼosawuyu ba wohalöwö.+
7 So 12 ndra sondröniaʼö ba mbanua Gizaraʼeli maʼafefu sangaʼasogö balazo. Ero samösa sondröniaʼö, mohalöwö ia ba wangaʼasogö balazo niʼogunaʼö Razo Selomo hegöi ösi nomonia ba zi sara waŵa ero röfi.+
8 Daʼa döi-töi ndra sondröniaʼö andrö: Ono Huri ba mbanua si so ba hili Geferai;
9 ono Dekeri ba Makasi, Saʼalibi,+ Beti-zamesi ba Elono-beti-hanana;
10 ono Hezedi ba Garuboti (yaʼia zamatörö Sokho hegöi tanö Heferi maʼafefu);
11 ono Gabinadabi ba hili Dora maʼafefu (foʼomonia yaʼia daʼö Tafata ono Zelomo ono alawe);
12 Baʼana ono Gahiludi ba Daʼanakhi, Megido+ hegöi Beti-zeana+ maʼafefu, si so ba zi tambai Zareta tanö tou Yezereʼeli, iʼotarai Mbeti-zeana irugi mbanua Habeli-mehola numalö ba mbanua Yokemea;+
13 ono Geberi ba Ramoti-gileadi+ (yaʼia zamatörö ba nose Yaʼiri+ ono Manase si so ba Gileadi+ hegöi banua Garigobi+ si so ba Mbazana+ yaʼia daʼö 60 mbanua sebua sangokhögö öli kara hegöi baʼa-baʼa moroi ba tembaga);
14 Ahinadabi ono Gido ba Mahanaʼi;+
15 Ahimasi ba Nafetali (foʼomonia yaʼia daʼö Basamata ono Zelomo ono alawe);
16 Baʼana ono Huzaʼi ba Gaseri hegöi Bealoti;
17 Yozafati ono Warua ba Gisasari;
18 Simeʼi+ ono Gela ba Mbeniami;+
19 Eberi ono Guri ba danö Gileadi,+ yaʼia daʼö banua Zihona+ razo niha Gamori hegöi Ogi+ razo Mbazana. So göi samösa zondröniaʼö ba mbanua si tobali kafalo ndra sondröniaʼö ba soi daʼö.
20 Simane faʼoya gawu ba zinga nasi+ waʼato niha Yehuda hegöi Izaraʼeli. Fahöna göra hegöi idanö, ba ohahau dödöra.+
21 Mamatörö Zelomo ba gamatöröwa razo fefu, iʼotarai Nungo Nidanö Oiferati+ irugi mbanua niha Wilisiti ofeta ba nola danö Miserai. Laʼohe khönia mbeʼelö ba tobali ira enoni Zelomo sagötö faʼaurinia.+
22 Ero maʼökhö, moguna muʼasogö mbalazo ba gödo Zelomo faʼoyania 6.600 liter* darigu si sökhi ba 13.200 liter* darigu si toʼölö,
23 fulu ngaʼeu zawi nibula, 20 ngaʼeu zawi sauri ba mbenua soduʼu, 100 ngaʼeu mbiri-biri, simanö göi nago, ngawalö mböhö hegöi fofo satabö.
24 Mamatörö Zelomo tanö ba gaekhula Nungo Nidanö Oiferati+ maʼafefu, iʼotarai Difisa irugi Gaza,+ farahu ba daʼö fefu razo si so ba gaekhula Nungo Nidanö Oiferati. Ohahau dödönia ba wamatörö banua andrö maʼafefu.+
25 Sagötö famatörö Zelomo, ahono dödö niha Yehuda hegöi iraono Gizaraʼeli wemanga bua nagu awö mbua ara nitanöra samösa, iʼotarai Dano irugi Mbere-seba.
26 So 12.000 kudo* khö Zelomo ba 4.000* gandra naha kudo sanöbi kureta wasuwöta khönia.+
27 Ira sondröniaʼö ba mbanua andrö, laʼasogö gö khö Razo Selomo hegöi ba niha si fao khönia wemanga. Ero samösa sondröniaʼö, ifalua daʼö ba mbaŵa si no mutatugöi khönia ba iʼodödögö wamalua enaʼö lö hadöi soʼamböta.+
28 Laʼasogö göi barli hegöi töla wakhe ö kudo, farahu ba daʼö kudo sanöbi kureta gofu hezo muʼogunaʼö moloʼö halöwöra zamösana.
29 Ibeʼe Lowalangi waʼatua-tua khö Zelomo, fangiʼila hegöi faʼaboto ba dödö sebua simane faʼoya gawu ba zinga nasi.+
30 Faʼatua-tua niʼokhögö Zelomo, töra moroi ba waʼatua-tua niʼokhögö niha si so tanö ba Gatumbukha hegöi niha Miserai maʼafefu.+
31 Ha yaʼia zabölö atua-tua moroi ba danö böʼö, töra moroi khö Getano+ ngaʼötö Zera hegöi iraono Maholi sotöi Hemano,+ Khalikoli+ awö Darada. Tehöngö döinia ba soi ba zi fasui yaʼia.+
32 So 3.000 gamaedola+ nifazökhinia* ba 1.005 zinunö.+
33 Tola idunö-dunö sanandrösa ba ngawalö geu, iʼotarai geu eresi ba Libano irugi danömö hiso*+ sauri ba göli hegöi ngawalö gurifö,+ urifö si hombo,+ sanana-nana ba danö+ ba iʼa ba nasi.
34 Dozi niha ba ngawalö soi, möi ira lafondrondrongo waʼatua-tua Zelomo, farahu ba daʼö fefu razo ba zi sagörö ulidanö si no mamondrongo faʼatua-tuania.+
Nisura ba gahe zura
^ Mazui ”zondröniaʼö”.
^ Mazui ”zi fakudo”.
^ Tesura göi daʼa ba zi hauga ngawua manuskrip hegöi ba mbuku tanö böʼö. Ba manuskrip tanö böʼö, lasura 40.000.
^ Mazui ”nitötöinia”.
^ Faigi Geluaha Ngawua Wehede.
