Sara Razo 5:1-18
5 Me irongo Hiramo razo Diro+ wa no labayoini Zelomo tobali razo fangali namania Dawido, ifatenge ösa genoninia khö Zelomo börö me fahuwu ia khö* Dawido ba zilalö.+
2 Aefa daʼö, ifaʼoheʼö goroisania Selomo khö Hiramo,+
3 ”Aboto ba dödöu wa tebai ifazökhi amagu Dawido nomo andrö ba döi Lowalanginia Yehowa börö me ato nudu nilawania ba wasuwöta irege ibeʼe khönia waʼamöna Yehowa.+
4 Iadaʼa, no iʼefaʼö ndraʼo Yehowa Lowalangigu moroi ba danga nudu si so ba zi fasuigu.+ Lö solawa yaʼo ba lö alua zi lö sökhi.+
5 Daʼö mbörö wa omasido ufazökhi nomo andrö ba döi Lowalangigu Yehowa simane nifabuʼu Yehowa khö namagu Dawido me imane, ’Onomö dania zamazökhi omo andrö ba döigu. Yaʼia nifatarogu si dadao ba dadaomau si tobali fangaliu.’+
6 Öʼila wa lö hadöi ba gotaluama zonekhe molobö eu simane niha Zidona. Börö daʼö, uʼandrö khöu enaʼö öfatenge genoniu ba wolobö khögu eu eresi ba Libano.+ Falulu fohalöwö genonigu khö genoniu, ba ugazi genoniu moloʼö si no ötatugöi khögu.”+
7 Me irongo Hiramo wehede Zelomo andrö, omuso sibai dödönia ba imane, ”Nisuno Yehowa maʼökhö börö me no ibeʼe khö Dawido nono satua-tua ba wondröniaʼö soi sebua andre!”+
8 Aefa daʼö, ifaʼema goroisania Hiramo khö Zelomo, ”No urongo fefu niwaʼöu khögu, hasambalö ufalua zomasiʼö. Uʼasogö khöu geu eresi hegöi eu juniper.+
9 Laʼohe ba nasi geu andrö ira enonigu iʼotarai Libano. Laböbö tobali rake ba lafasao ba nahia si no öfatunö. Ba daʼö ladudugö dania ba tola öʼohe saʼae. Fangalinia, asogö khögu gö soguna ba gödogu.”+
10 Ba iʼasogö Hiramo geu eresi hegöi eu juniper somasi Zelomo.
11 Ibeʼe 4.400.000 liter* gandru Selomo soguna ba gödo razo Hiramo, ba 4.400 liter* wanikha zaitu fondrege zi sökhi. Daʼö nibeʼe Zelomo khö Hiramo ero röfi.+
12 Ibeʼe waʼatua-tua Yehowa khö Zelomo simane nifabuʼunia.+ Ba sökhi gamakhaita Zelomo khö Hiramo irege fawuʼu li ira.
13 So 30.000 ndra matua ba ndraono Gizaraʼeli maʼafefu nifaso Razo Selomo ba wohalöwö.+
14 Ifalali-lali wamatenge yaʼira ba Libano. So 10.000 niha ero waŵa. Laʼiagö Libano ba zi sara waŵa, ba dua waŵa laʼiagö nomora. Adonira+ zamaigi-maigi halöwöra.
15 So 70.000 zi tobali sonoro* khö Zelomo ba 80.000 zanaba kara+ ba hili,+
16 ba so 3.300 zondröniaʼö ba mbanua+ nifataro ba wamaigi-maigi sohalöwö.
17 Ifaretakö ira Razo enaʼö lakhao gara segebua sebua böli+ ba latataba+ irege tobali kara wondrasi ba nomo andrö.+
18 Ba lataba gara andrö ira tuka khö Zelomo, tuka khö Hiramo hegöi niha Gebala.+ Lafaʼanö geu hegöi kara ba wamazökhi omo andrö.
