Sara Razo 6:1-38
6 No 480 fakhe aheta ndraono Gizaraʼeli moroi ba danö Miserai,+ ba ibörötaigö Selomo wamazökhi omo Yehowa*+ me no öfa fakhe mamatörö ia tobali razo ba ndraono Gizaraʼeli. Ibörögö daʼa ba mbaŵa si dua, yaʼia daʼö baŵa Sifi.*+
2 Omo nifazökhi Razo Selomo khö Yehowa, faʼanaunia 26,7 meter, faʼebolonia 8,9 meter, ba faʼalawania 13,4 meter.*+
3 Faʼanau kaki lima+ si so föna gosali* yaʼia daʼö 8,9 meter,* fagölö waʼebolora nomo. Monönö 4,5 meter* waʼanau nomo börö kaki lima andrö.
4 Ifosandrela nomo daʼö, ba ifasa lesi-lesi sadöni bakha+ ba zandrela andrö.
5 Aefa daʼö, ifazökhi domosa samasui omo andrö. Fakhai domosa daʼö ba dowa nomo, yaʼia daʼö ba dowa gosali* hegöi ba dowa mbateʼe tanö bakha.*+ So göi mbateʼe ba zinga domosa andrö.+
6 Bateʼe si so ba ngai tanö tou mato dua meter* waʼebolo, tika dua mato 2,7 meter* waʼebolo, ba tika tölu 3,1 meter* waʼebolo. Ifanekaoro zi fasui dowa nomo tanö baero irege lö hadöi si tola mutaruʼö ba dowa nomo.+
7 No muhenaigö mutataba gara ba wamazökhi omo daʼö,+ irege lö terongo li wanoko, fato mazui fakake siʼöli tanö böʼö sagötö mufazökhi ia.
8 Bawandruhö mbateʼe si so ba ngai tanö tou,+ so ia ba gamaudu tanö raya* nomo andrö. So nora niʼogaolo si numalö ba tika dua, simanö göi iʼotarai ba tika dua numalö ba tika tölu.
9 Lö iböhöli wamazökhi omo andrö irege awai,+ ba ifasa gasö matua hegöi fafa eresi tobali sagönia.+
10 Mufazökhi mbateʼe tanö ba ngai ba zi fasui omo andrö,+ ero sambua bateʼe mato dua meter* waʼalawania, ba so geu eresi samakhai yaʼia ba nomo.
11 Imane Yehowa khö Zelomo,
12 ”Na öʼoʼö fefu zi no uhonogöi, oroisagu, hegöi amakhoitagu, ba öfaudugö waʼauriu ba daʼö fefu,+ hasambalö ufalua zi no ufabuʼu khö namau Dawido+ sanandrösa khöu, mendrua manö ba nomo nihaogömö andre.
13 Toröi ndraʼo ba gotalua ndraono Gizaraʼeli,+ ba lö irai uröi nono mbanuagu Izaraʼeli.”+
14 Lö iböhöli wamazökhi omo andrö Selomo irege awai.
15 Ifazökhi dowa tanö bakha faoma fafa eresi. Mufasa wafa ba dowa tanö bakha iʼotarai zalo irugi narö zagö ba mufasa wafa juniper ba zalonia.+
16 Aefa daʼö, ifazökhi mbateʼe tanö bakha,+ yaʼia daʼö Nahia Wondrege Niʼamoniʼö.+ Iʼoto tanö furi nomo faoma fafa eresi iʼotarai zalo irugi narö zagö, irege so mbateʼe faʼanaunia 8,9 meter.*
17 Tanö föna nomo andrö, föna mbateʼe, mufotöi ia osali,*+ ba faʼanaunia 17,8 meter.*
18 Mufoe geu eresi tanö bakha ba nomo tobali gambara labu+ hegöi bowo mbunga samoka.+ Mufoʼuli fefu faoma eu eresi irege lö hadöi kara soroma.
19 Ifaʼanö mbateʼe tanö bakha+ ba nomo andrö Selomo ba wangiröʼö tawöla amabuʼula li Yehowa.+
20 Faʼanaunia 8,9 meter, faʼebolonia 8,9 meter, ba faʼalawania 8,9 meter,*+ ba mufoʼuli ia faoma anaʼa si sökhi. Ifoʼuli naha wanunu sumange+ faoma eu eresi.
21 Ifoʼuli tanö bakha nomo andrö Selomo faoma anaʼa si sökhi.+ Aefa daʼö, no ifadölö rate anaʼa föna mbateʼe tanö bakha+ si no mufoʼuli faoma anaʼa.
22 Ifoʼuli göi naha wanunu sumange+ maʼafefu sahatö ba mbateʼe tanö bakha faoma anaʼa. Ifoʼuli nomo andrö fefu faoma anaʼa.
23 Ba mbateʼe tanö bakha, so dombua kerubi+ nifazökhi Zelomo moroi ba geu naruʼu* ba 4,5 meter* waʼagalawa ero sambua.+
24 Mato dua meter* waʼanau gafi kerubi ero tambai. Iʼotarai mbalö si sambua ofeta ba mbalö si sambua, faʼanaunia 4,5 meter.*
25 Kerubi si dua faʼanaunia 4,5 meter.* Fagölö-gölö sibai kerubi si dombua andrö, he ngaʼeu hegöi faʼebuania.
26 Faʼalawa kerubi si sambua 4,5 meter,* simanö göi zi sambuania.
27 Ba ibeʼe kerubi+ si dombua andrö ba Nahia Wondrege Niʼamoniʼö. No mubologö gafira irege so tambai gafi kerubi si sambua si fatöfa ba dowa tanö ba daʼa, ba tambai gafi kerubi si sambua si fatöfa ba dowa tanö ba daʼö. Ba faoma fatöfa gafira si tambai ba gotalua nahia andrö.
28 Ba ifoʼuli kerubi andrö faoma anaʼa.
29 Ifoe gambara kerubi+ andrö Selomo, töla geu khorema+ hegöi bowo mbunga samoka+ ba dowa nomo andrö maʼafefu, yaʼia daʼö ba zi dombua mbateʼe andrö.*
30 Ifoʼuli zalo ba zi dombua mbateʼe faoma anaʼa.
31 Ba weʼamöi ba mbateʼe tanö bakha, ifazökhi dombua mbawandruhö moroi ba geu naruʼu, ehomo tanö ba ngai hegöi döla-döla mbawandruhö, tobali faosatö si lima.*
32 Tefazökhi mbawandruhö si dombua moroi ba geu naruʼu, ba muhaogö wamofoe yaʼia simane gambara döla geu khorema awö mbowo mbunga samoka ba mufoʼuli faoma anaʼa. Iʼogunaʼö wanoko ba wamoʼuli gambara kerubi hegöi töla geu khorema andrö faoma anaʼa.
33 Simane daʼö göi wamazökhinia döla-döla mbawandruhö gosali* si tobali faosatö si öfa.* Iʼogunaʼö geu naruʼu.
34 Tefazökhi zi dombua mbawandruhö andrö moroi ba geu juniper, ba so dombua lagö-lagö mbawandruhö si tola mufatöʼö.+
35 Ifoe gambara kerubi, töla geu khorema hegöi bowo mbunga samoka, ba ifoʼuli daʼö faoma anaʼa.
36 Ba golayama tanö bakha,+ ifotölu winaeta wamazökhi towa faoma kara nitataba ba sambua winaeta geu eresi.+
37 Ba ndröfi si 4 wamatörö Zelomo, ba mbaŵa Sifi,* mufazökhi wondrasi nomo Yehowa.+
38 Ba ndröfi si 11 ba mbaŵa Buli,* yaʼia daʼö ba mbaŵa si walu, teʼasiwai fefu nomo andrö moloʼö si no mutatugöi.+ Iʼasiwai daʼö Selomo ba zi fitu fakhe.
Nisura ba gahe zura
^ Te Nahia Niʼamoniʼö.
^ Eluahania Nahia Niʼamoniʼö.
^ Eluahania Nahia Wondrege Niʼamoniʼö.
^ Sin.: ”tanö ba gambölö”.
^ Eluahania Nahia Niʼamoniʼö si so tanö föna Nahia Wondrege Niʼamoniʼö.
^ Mazui ”geu fanikha”.
^ Sin.: ”tanö bakha ba tanö baero”.
^ Mazui te ”sambua niʼolima”. Te daʼö geluahania faosatö si lima ba wamazökhi döla-döla mbawandruhö mazui si sambua niʼolima moroi ba waʼebua mbawandruhö.
^ Eluahania Nahia Niʼamoniʼö.
^ Te daʼö geluahania faosatö si öfa ba wamazökhi bawandruhö mazui si sambua niʼoʼöfa moroi ba waʼebua mbawandruhö.
