Sara Razo 7:1-51
7 Awai ifazökhi nomonia*+ Selomo 13 fakhe waʼara.+
2 Ifazökhi göi Nomo Gatua Libano+ yawa ba dete gehomo si öfa ngawua moroi ba geu eresi si no mufaʼoli, faʼanaunia 44,5 meter, faʼebolonia mato 22 meter, faʼalawania 13,4 meter.* Ba dete gehomo lafasa mbuatö moroi ba geu eresi.+
3 No lafasa wafa eresi ba dete nomo andrö tanö yawa ba dete geu si no tebabara nituwu faoma ehomo. Faʼoyania* 45, ba ero sambua famaʼoli so 15 ngaʼörö.
4 So tölu zandrela si no mufaʼoli ba si no lafolesi, ba faoma fatahö zandrela ero sambua.
5 Niʼoʼöfa sagi fefu mbawandruhö hegöi döla-dölania. Simanö göi zandrela si tölu ngawua si no fatahö ba si no lafaʼoli.
6 Ifazökhi Naha* Gehomo Selomo, faʼanaunia mato 22 meter, faʼebolonia 13,4 meter.* Tanö fönania so kaki lima nifosagö si no mutuwu faoma ehomo.
7 Ifazökhi göi Naha* Dadaoma+ mazui Naha* Wanguhuku.+ Ba daʼö ifalua halöwönia ba wanguhuku. Mufasa wafa eresi ba nahia andrö, iʼotarai zalo irugi narö zagö.
8 Ba golayama tanö böʼö+ so nomo* Zelomo, fasafi ia moroi ba Naha Wanguhuku ba fagölö lagu wamazökhi yaʼia. Ifazökhi göi nomo khö woʼomonia, ono Waraʼo ono alawe, si fagölö ba Naha Wanguhuku andrö.+
9 Ba omo andrö fefu tefazökhi moroi ba gara sebua böli+ iʼotarai wondrasi ofeta ba dowa tanö yawa hegöi tanö baero irugi golayama sebolo.+ Lataba gara andrö moloʼö si no lasuʼa ba laʼalösöiʼö fefu mbalö faföfö faoma garagazi.
10 Tefazökhi wondrasinia moroi ba gara sebua böli ba segebua. So zi 4,5 meter ba so göi zi 3,5 meter.*
11 Towania moroi ba gara sebua böli si no lasuʼa ba si no mutaba. Laʼogunaʼö göi geu eresi.
12 Ba zi fasui olayama sebolo, so göli nifazökhi moroi ba gara si no mutaba ba tölu winaeta wamalaete yaʼia, ba sambua winaeta döla-döla eresi, fagölö simane öli golayama tanö bakha+ ba nomo Yehowa hegöi ba kaki limania.+
13 Ifatenge niha Razo Selomo ba wamaondragö Hiramo+ moroi ba Diro.
14 Ono lakha mbanua moroi ba mado Nafetali Hiramo andrö, ba tuka tembaga namania moroi ba Diro.+ Onekhe ia, so khönia waʼaboto ba dödö ba toʼölö ia ba ngawalö halöwö+ soʼamakhaita ba tembaga.* Möi ia khö Razo Selomo ba ifalua halöwö nibeʼe khönia.
15 Ifazökhi dombua gehomo moroi ba tembaga,+ faʼalawa ero sambua ehomo 8 meter.* So 5,3 meter fasui ero sambua ehomo.*+
16 Ifazökhi dombua högö gehomo moroi ba tembaga enaʼö mufasa ba dete gehomo si dua rozi. Mato dua meter* waʼalawa ero sambua högö gehomo.
17 Ero sambua högö gehomo, no labeʼe zi hulö zaiwa nifazökhi moroi ba zi fitu rate niforaewe-raewe.+
18 Ibeʼe dombua famaʼoli gambara dalimo ba zi fasui zaiwa andrö si no mufasa ba högö gehomo enaʼö baga-baga. Ifazökhi daʼö ba zi dombua högö gehomo.
19 Ba högö gehomo si so ba kaki lima andrö, so zi hulö mbunga lili faʼalawania 1,8 meter.*
20 So ia ba högö gehomo si no mufasui faoma saiwa, ba dete gehomo si dua rozi. So dombua famaʼoli dalimo ero sambua högö gehomo, ba so 200 waʼoya dalimo maʼafefu.+
21 Ifasindro gehomo daʼö föna kaki lima gosali,*+ si sara tanö ba gambölö* ibeʼe töinia Yakhino* ba si sara tanö ba gabera* ba Boasi*+ ibeʼe töi daʼö.
22 Högö tanö yawa ba gehomo andrö simane bunga lili. Awai mufazökhi gehomo daʼö.
23 Aefa daʼö, ifazökhi naha wangöhöna idanö sowulo-wulo nifotöi Asi Tembaga,+ faʼalawania mato dua meter.* Faʼebolo mbawa naha nidanö andrö 4,5 meter* iʼotarai mbalö faföfö, ba fasui maʼafefu 13,4 meter.*+
24 Tanö tou mbawa naha nidanö, no lafodombua wamaʼoli gambara labu+ samasui Asi Tembaga andrö. Fulu ngawua labu ero 44,5 sentimeter.* Ha sambua tuangara naha wangöhöna idanö andrö.
25 Lafedadao Nasi Tembaga andrö ba hulu wamaedo zawi si matua si 12 ngaʼeu,+ 3 zangotahögö tanö yöu, 3 ba gaekhula, 3 tanö raya ba 3 tanö ba gatumbukha. Fefu zawi andrö laʼerogö Nasi Tembaga daʼö.
26 Faʼaweʼe-weʼe dowa Nasi daʼö simane faʼebolo laluʼa danga,* bawania simane bawa mako, simane bowo mbunga lili samoka. Tola monaha 44.000 liter* nidanö.
27 Aefa daʼö, ifazökhi fulu ngawua gureta*+ tembaga. Ero sambua kureta faʼanaunia 1,8 meter, faʼebolonia 1,8 meter ba faʼalawania mato sameter.*
28 Simane daʼa wamazökhi gureta andrö: Lafazökhi zingania fatambai moroi ba ngaʼörö-ngaʼörö tembaga nibeʼe ba lesi-lesi niʼoʼöfa sagi.
29 Ba ngaʼörö-ngaʼörö tembaga andrö so gambara zingo,+ sawi si matua hegöi kerubi.+ So göi gambara si fagölö ba lesi-lesinia. Tanö yawa ba tanö tou gambara zingo awö zawi andrö, no lafazökhi gambara solete si no mufoe niforaewe-raewe.
30 Ero sambua kureta, so öfa gaolo-gaolo tembaga. So döla-döla tembaga samakhai gaolo-gaolo daʼö, ba so öfa ngawua toga ba zi fasui watalinga gureta andrö sanaha gaolo-gaolonia. Gamaudu tanö tou no mufazökhi raewe-raewe.
31 Owulo-wulo mbawa naha nidanö daʼö ba no lafazökhi lesi-lesi fasuinia. Iʼoroi dane-danenia irugi tanö tou zi no lafolesi, faʼalawania 44,5 sentimeter.* Lesi-lesi hegöi töla-tölania lafotöi tuwu-tuwu, faʼalawania 67 sentimeter.* Ba zinga lesi-lesinia maʼafefu, so ngaʼörö-ngaʼörö tembaga si no mutoto, niʼoʼöfa sagi wamazökhi yaʼia, tenga owulo-wulo.
32 Gaolo-gaolo si öfa ngawua andrö so tanö tou ba gamaudu sagi-sagi. Oi zara fakhai tuwu-tuwunia ba gureta daʼö. Faʼalawa gaolo-gaolonia ero sambua, 67 sentimeter.*
33 Gaolo-gaolonia hulö gaolo-gaolo gureta kudo. Fefu duwu-tuwunia tefazökhi moroi ba loga, simanö göi döla-dölania, zari-zari awö mako-makonia.
34 Dozi kureta, so öfa ngawua duwu-tuwu gaolo-gaolo ba zi öfa watalinga gureta, ba ha sambua tuangara gureta andrö.
35 Ba gamaudu tanö yawania no mufasui lesi-lesi, faʼalawania 22 sentimeter.* Ha sambua tuanga niʼogunaʼö ba wamazökhi lesi-lesi, ngaʼörö-ngaʼörönia awö duwu-tuwunia.
36 Ba lesi-lesinia hegöi ba ngaʼörö-ngaʼörö tembaga ba zingania, ifazökhi gambara kerubi, singo, töla geu khorema ba naha si no mutatugöi. Ifazökhi göi gambara raewe-raewe ba zi fasuinia.+
37 Fagölö wamazökhi+ si fulu ngawua kureta andrö.+ Fagölö waʼebua ba no fakhili-khili.
38 Ifazökhi fulu ngawua naha nidanö moroi ba tembaga.+ Faʼalawa ero sambua 1,8 meter,* ba monaha nidanö 880 liter.* Ero sambua kureta so sambua naha nidanö.
39 Aefa daʼö, ibeʼe lima ngawua gureta ba gambölö nomo ba lima ba gabera ba ibeʼe Nasi Tembaga ba gambölö nomo, tanö raya gatumbukha.+
40 Ifazökhi naha nidanö tanö böʼö Hiramo,+ tambila+ hegöi mako.+
Iʼasiwai fefu halöwönia khö Razo Selomo ba nomo Yehowa:+
41 dua rozi gehomo+ hegöi högö gehomo si hulö mako; dombua zaiwa+ sombalugö högö gehomo si dua rozi andrö;
42 ba 400 ngawua gambara dalimo+ ba zaiwa si dombua nifasa ba högö gehomo si dua rozi andrö si hulö mako, ba dombua famaʼoli gambara dalimo ero sambua saiwa;
43 fulu ngawua gureta+ ba fulu naha nidanö;+
44 Asi Tembaga+ ba 12 ngaʼeu zawi si matua tanö tounia;
45 embe, tambila, mako hegöi gama-gama si takile tanö böʼö moroi ba tembaga nifazökhi Hiramo khö Razo Selomo ba nomo Yehowa.
46 Ibeʼe fareta Razo enaʼö mufazökhi fefu daʼö ba tuanga moroi ba dambu laʼuri si so ba Yoridano, ba gotalua Zukhota awö Zareta.
47 Lö isuʼa hawaʼabua fefu gama-gama andrö Selomo börö me oya sibai. Daʼö mbörö wa tebai mutatugöi hawaʼabua tembaga andrö maʼafefu.+
48 Ifazökhi fefu gama-gama daʼa Selomo ba nomo Yehowa: naha wanunu sumange+ moroi ba ganaʼa; meza anaʼa+ ba wameʼe roti nibaliʼö sumange;
49 naha wandru+ moroi ba ganaʼa si sökhi nibeʼe föna ba mbateʼe tanö bakha, lima tanö ba gambölö, ba lima tanö ba gabera; bunga,+ fandru ba folazi tali wandru, oi moroi ba ganaʼa;+
50 karawa, famunu galitö,+ tambala, mako,+ naha mbo galitö,+ fefu daʼö oi moroi ba ganaʼa si sökhi; simanö göi dane-dane nibeʼe ba mbawandruhö mbateʼe tanö bakha,+ yaʼia daʼö Nahia Wondrege Niʼamoniʼö hegöi ba mbawandruhö gosali,*+ oi moroi ba ganaʼa maʼafefu.
51 Ba me no awai ifazökhi nomo Yehowa andrö Razo Selomo, iʼohe fefu gama-gama niʼamoniʼö+ namania Dawido. Iʼohe wirö, anaʼa hegöi gama-gama ba naha wangiröʼö harato ba nomo Yehowa.+
Nisura ba gahe zura
^ Mazui ”gödonia”.
^ Te faʼoya geu si no tebabara ba dete gehomo.
^ Mazui ”Kaki Lima”.
^ Mazui ”Kaki Lima”.
^ Mazui ”Kaki Lima”.
^ Mazui ”gödo razo”.
^ Mazui ”perunggu”.
^ Mazui ”So 5,3 m waʼanau tali niʼogunaʼö ba wamasui si sambua ehomo”. Sin.: ”12 siʼu”. Faigi Lamp. B14.
^ Eluahania Nahia Niʼamoniʼö.
^ Mazui ”tanö raya”.
^ Eluahania ”Yaʼiʼaroʼö [yaʼia daʼö Yehowa] Wamataro”.
^ Mazui ”tanö yöu”.
^ Te eluahania ”Si Fao Faʼabölö”.
^ Mazui ”goroba idanö”.
^ Eluahania Nahia Niʼamoniʼö.
