Sara Razo 9:1-28
9 Me no iʼasiwai Selomo wamazökhi omo Yehowa, gödo razo+ awö niʼera-erania maʼafefu,+
2 ifalukhaisi ia Yehowa ba zi mendrua kali simane me so ia ba Gibeona.+
3 Imane Yehowa, ”No ufondrondrongo wangandrö hegöi ngarö-ngarö dödöu si no öfaʼema tanö fönagu. No uʼamoniʼö nomo nifazökhimö andrö, ba no ufaʼaso döigu ba daʼö sagötö faʼara.+ Lö aefa hörögu wamaigi ba toröi dödögu ba daʼö.+
4 Ba yaʼugö, na öfosumange ndraʼo soroi ba dödö+ ba tobali ndraʼugö niha sadölö tödö+ simane amau Dawido,+ na öfalua goroisagu+ ba öʼoʼö fefu nifakhoigu hegöi huku nibeʼegu,+
5 hasambalö uʼaroʼö dadaoma waʼarazomö ba ndraono Gizaraʼeli sagötö faʼara, simane si no ufabuʼu khö namau Dawido me umane, ’Lö tebulö modadao ngaʼötömö ba dadaoma waʼarazo ndraono Gizaraʼeli.’+
6 Hizaʼi, na faröi ndraʼugö khögu hegöi ngaʼötöu ba lö mifalua goroisa hegöi amakhoita nibeʼegu, na mifosumange ba mangalulu ami khö lowalangi tanö böʼö,+
7 hasambalö uhori ndraono Gizaraʼeli ba danö si no ubeʼe khöra.+ Uheta nomo si no uʼamoniʼö andrö ba döigu,+ ba tobali ira famaʼiki hegöi fangoʼaya* ba gotalua soi maʼafefu.+
8 Ba tobali adudula dania nomo andre.+ Dozi niha sanörö, ahöli-höli dödöra wamaigi ba mangoʼaya ira lamane, ’Hana wa ifalua zimane daʼa Yehowa ba nomonia hegöi ba soi daʼa?’+
9 Aefa daʼö lamane, ’Börö me no faröi ira khö Lowalangira Yehowa, si no mangeheta ira tuara moroi ba danö Miserai, ba me no laʼoʼö, lafosumange ba latuhi danö föna lowalangi böʼö. Daʼö mbörö wa ifatörö khöra Yehowa fefu wamakao andre.’”+
10 Me no awai ifazökhi nomo si dombua andrö Selomo ba zi 20 fakhe waʼara, yaʼia daʼö omo Yehowa hegöi gödo razo,+
11 ibeʼe Selomo 20 mbanua si so ba Galilaia khö Hiramo+ razo Diro börö me no iʼasogö geu eresi hegöi eu juniper awö ganaʼa niʼandrö Razo Selomo.+
12 Me mofanö Hiramo moroi ba Diro ba wamaigi banua nibeʼe Zelomo khönia, lö fao dödönia ba daʼö.*
13 Imane, ”He talifusö, hana wa öbeʼe khögu mbanua simane daʼa?” Daʼö mbörö wa lafotöi mbanua andrö Tanö Gabuli* irugi maʼökhö.
14 No ifaʼoheʼö Hiramo 4.104 kilogram* ganaʼa khö Razo Selomo.+
15 Ifaso niha Razo Selomo enaʼö mohalöwö ira+ ba wamazökhi omo Yehowa,+ gödo razo, Hili-Hili,*+ öli Yeruzalema, Hasora,+ Megido+ hegöi Gezeri.+
16 (Gezeri no buala wabalisa nibeʼe Waraʼo razo Miserai khö nononia alawe,+ foʼomo Zelomo. Ba zilalö, no irabu mbanua andrö Faraʼo, itunu, ba ibunu niha Ganaʼana+ si toröi ba daʼö.)
17 Ifazökhi* Gezeri andrö Selomo, Beti-horona Tanö Tou,+
18 Baʼalata,+ Tamara ba danö si mate,
19 banua naha wangiröʼö gama-gama khö Zelomo, banua wangiröʼö kureta wasuwöta,+ banua nahia waʼatoröi zi fakudo, ba fefu zedöna ifazökhi Selomo ba Yeruzalema, ba Libano awö soi nifatörönia maʼafefu.
20 Dozi si toröi ba gotalua niha Gamori, niha Kheti, niha Weresi, niha Hewi, niha Yebusi,+ si lö farahu ba ndraono Gizaraʼeli,+
21 yaʼia daʼö ngaʼötöra si tebai lahori iraono Gizaraʼeli ba soi andrö, ifaso ira Selomo ba wohalöwö tobali sawuyu irugi maʼökhö.+
22 Hizaʼi, lö hadöi ba gotalua ndraono Gizaraʼeli nifataronia tobali sawuyu,+ börö me yaʼira zi tobali saradadu, enoni, sondröniaʼö, ngoni-ngoni hegöi kafalo zaradadu solohe kureta wasuwöta awö zi fakudo.
23 So 550 zondröniaʼö banua si tobali kafalo, halöwöra yaʼia daʼö ba wamaigi-maigi sohalöwö khö Zelomo.+
24 Findra nono Waraʼo ono alawe+ moroi ba Mbanua Dawido+ numalö ba nomo nifazökhi Zelomo khönia. Aefa daʼö, ifazökhi Hili-Hili*+ andrö Selomo.
25 Tölu kali ba zi döfi,+ ibeʼe zumange nitunu Selomo hegöi sumange fangatulö ba naha wanunu sumange nifazökhinia khö Yehowa.+ Itunu zumange ba naha wanunu sumange si so tanö föna Yehowa, ba no iʼasiwai wamazökhi omo andrö.+
26 Ifazökhi göi göfa Razo Selomo ba Gesiono-geberi+ sahatö ba Geloti, ba Nasi Soyo si so ba mbanua Gedomo.+
27 Ifatenge ndra enoninia Hiramo ba göfa andrö+ yaʼia daʼö ira sohalöwö ba nasi si no toʼölö enaʼö fao ira wohalöwö khö ndra enoni Zelomo.
28 Möi ira ba Gofiri+ ba lahalö 14.364 kilogram* ganaʼa moroi ba daʼö, ba laʼohe khö Razo Selomo.
Nisura ba gahe zura
^ Sin.: ”amaedola”.
^ Sin.: ”lö tefaudu daʼö ba wamaiginia”.
^ Mazui te ”Tanö si Lö Moguna”.
^ Mazui ”Milo”. Ba li Heberaiʼo eluahania ”tanö nitimbu”.
^ Mazui ”Ifasui öli”.
^ Mazui ”Milo”. Ba li Heberaiʼo eluahania ”tanö nitimbu”.
