Sara Samueli 10:1-27
10 Ihalö mbuli-buli wanikha Samueli ba ifaduwa ba högö Zaulo.+ Iʼuma ia Samueli ba imane, ”Hadia tenga Yehowa zombayoini yaʼugö tobali sondröniaʼö+ ono mbanuania?*+
2 Maʼökhö daʼa na fabaliʼö khögu, so darua niha si falukha khöu ahatö ba lewatö Rakhela,+ ba mbanua Mbeniami ba Zeleza. Ba lafatunö khöu, ’No musöndra galide niʼalu-aluimö, hizaʼi tenga kalide andrö saʼae niʼera-era namau,+ abu dödönia ndraʼugö. Imane, ”Lö sangawuli nonogu. Hadia zinangea ufalua?”’
3 Moroi ba daʼö, aeʼe ba geu sebua ba Dabora ba falukha dania ndraʼugö datölu ndra matua si möi khö Lowalangi sindruhu ba Mbetieli.+ Samösa zolohe ono nambi si tölu ngaʼeu, samösa zolohe roti si tölu ngaʼörö, ba samösa zolohe rumbi sebua nifoʼösi agu nibadu.
4 Lasofu dania hewisa ndraʼugö ba labeʼe öu dua ngaʼörö roti, ba böi zi lö ötema nibeʼera andrö.
5 Aefa daʼö, ofeta dania ndraʼugö ba hili Lowalangi sindruhu, nahia ndra saradadu Wilisiti. Na örugi mbanua daʼö, falukha ndraʼugö khö ndra samaʼeleʼö si möi mitou moroi ba nahia salawa. Gasa-gasa wamaʼeleʼöra, so dania niha samoli fakake zinunö nifosinali, tamburu, surune ba harafa.
6 Mohalöwö dania ba dödöu geheha niʼamoniʼö+ moroi khö Yehowa ba mamaʼeleʼö ndraʼugö simane yaʼira ba tobaliʼö simane niha böʼö.+
7 Na no alua dandra daʼa fefu, falua zi tola öfalua faoma tangau börö me fao khöu Lowalangi sindruhu.
8 Aefa daʼö, dari-dari ba Giligala+ ba ufalukhaisi ndraʼugö ba daʼö ba wameʼe sumange nitunu ba sumange fangatulö. Baloi fitu hari irege tohare ndraʼo ba ufatunö dania khöu hadia zinangea öfalua.”
9 Ha iʼerogö sibai Saulo me fabali ira Zamueli, ibörögö ibulöʼö dödö Zaulo Lowalangi ba alua fefu dandra niʼombakhaʼö Zamueli ba ngaluo daʼö.
10 Mofanö ira moroi ba daʼö numalö ba hili ba falukha ia khö ndra samaʼeleʼö. Iʼanemaiʼö mohalöwö geheha Lowalangi ba dödö Zaulo+ ba ibörögö mamaʼeleʼö ia+ ba gotaluara.
11 Me fao ia khö ndra samaʼeleʼö ba mamaʼeleʼö göi ia, laʼila ia dozi si no irai faʼila khönia ba lamane, ”Hadia zalua khö nono Gisi? Hadia samaʼeleʼö göi Zaulo andrö?”
12 So samösa moroi ba daʼö zangumaʼö, ”Haniha nama ndra samaʼeleʼö tanö böʼö andrö?” Daʼö mbörö wa asese lamane,* ”Hadia samaʼeleʼö göi Zaulo andrö?”+
13 Me no awai mamaʼeleʼö Zaulo, möi ia ba nahia salawa.
14 Aefa daʼö mohede dalifusö namania ira matua, imane khö Zaulo hegöi sohalöwö khönia andrö, ”Hezo numalö ami?” Imane Saulo, ”Möiga mangalui kalide,+ ba lö nisöndrama, andrö wa möiga khö Zamueli.”
15 Imane talifusö namania, ”Uʼandrö khöu, fatunö khögu hadia niwaʼö Zamueli khöu.”
16 Imane Saulo khö dalifusö namania, ”Iwaʼö khöma wa no musöndra galide niʼalu-aluima.” Lö ifatunö khönia Saulo wehede Zamueli wa tobali dania ia razo.
17 Ikaoni fefu soi daʼö Samueli enaʼö owulo ira föna Yehowa ba Misefa,+
18 ba imane ba ndraono Gizaraʼeli, ”Daʼa niwaʼö Yehowa Lowalangi Gizaraʼeli: ’Yaʼodo zangeheta iraono Gizaraʼeli moroi ba danö Miserai. Yaʼo zangefaʼö yaʼami moroi ba danga niha Miserai+ hegöi ira samatörö samakao yaʼami.
19 Hizaʼi no miʼerogö Lowalangimi maʼökhö,+ Sangefaʼö yaʼami ba wamakao ba faʼatosasa. Mimane, ”Löʼö, fataro khöma samösa razo.” Börö daʼö, miʼosindro föna Yehowa moloʼö mado hegöi moloʼö ösi nomomi* zamösana.’”
20 Iwaʼö Samueli ba mado ndraono Gizaraʼeli maʼafefu enaʼö lafahatö ira,+ ba mado Mbeniami nifili.+
21 Aefa daʼö iwaʼö ba mado Mbeniami enaʼö lafahatö ira moloʼö ösi nomora zamösana, ba ösi nomo ngaʼötö Materi nifili. Ba gafuriata, Saulo ono Gisi nifili.+ Hizaʼi, laʼalu-alui ia ba lö lasöndra.
22 Andrö manofu ira khö Yehowa,+ ”Hadia so ia ba daʼa?” Imane Yehowa, ”No ibiniʼö ia ba daʼö sisa, ba zi tambai gama-gama.”
23 Fagohi ira ba wamaondragö yaʼia. Me mozizio ia ba gotalua niha, abölö alawa ia moroi ba danö böʼö, ha falalawa galisinia.+
24 Imane Samueli ba soi daʼö fefu, ”Hadia no miʼila niha nifili Yehowa andre?+ Samösa lö simane yaʼia ba gotalua niha sato.” Ba muʼao ira fefu lamane, ”Yaʼanau nosou Razo!”
25 Ifatunö Samueli ba soi andrö hadia manö nifalua razo,+ isura ba mbuku, ba iʼiröʼö föna Yehowa. Aefa daʼö, iwaʼö khöra Samueli enaʼö mangawuli ira ba nomora zamösana.
26 Mangawuli göi Zaulo ba nomonia ba Gibea, fao khönia ndra saradadu börö me ifarou dödöra Yehowa.
27 Lamane ira niha si lö sökhi, ”Hewisa wa tola iʼefaʼö ita niha daʼa?”+ Laʼaohasi ba dödö ia ba lö mamuala ira khönia.+ Hewaʼae simanö, lö hede-hedenia.*
Nisura ba gahe zura
^ Mazui ”tana khönia”.
^ Mazui ”so gamaedola”.
^ Sin.: ”moloʼö ngawawa si saribu khömi”.
^ Sin.: ”hulö niha si lö hede ia”.
