Sara Samueli 11:1-15
11 Aefa daʼö, tohare Nahasi niha Gamoni+ ba ifazökhi nosenia ba wanuwö Yabesi+ ba Gileadi. Lamane khönia ira niha Yabesi, ”Datalau fawuʼu li* ba tobali ndraʼaga sangai halöwö khöu.”
2 Imane Nahasi niha Gamoni andrö, ”Fawuʼu li ndraʼo khömi asala mitehegö ukoe nono hörömi kambölö, enaʼö teʼailasi ndraono Gizaraʼeli.”
3 Lamane ira satua mbanua Yabesi, ”Beʼe khöma ginötö fitu hari, enaʼö tola mafatenge niha ba zi sagörö tanö Gizaraʼeli. Na lö hadöi saʼae dania sangefaʼö yaʼaga ba malulu ndraʼaga khöu.”
4 Me ofeta denge-tenge andrö ba Gibea+ nahia si toröi Saulo, ba ifaʼema wehede daʼö ba niha fefu ba laduhugö wege-ege.
5 Tohare Zaulo moroi ba kabu ba no ibeʼe tanö föna gurifönia. Lö ara imane, ”Hana wa mege-ege niha?” Lafatunö khönia wehede niha Yabesi.
6 Me irongo daʼö, mohalöwö ba dödönia+ geheha Lowalangi ba mofönu sibai ia.
7 Ihalö dua geu zawi si matua ba itatawi. Aefa daʼö ifatenge niha ba wolohe ba zi sagörö tanö Gizaraʼeli lamane, ”Haniha zi lö fao khö Zaulo ba Samueli, latatawi zawinia simane daʼa!” Ataʼu fefu soi daʼö khö Yehowa irege hasara dödöra wefao.
8 Iʼerai ira ba Mbeseki ba so 300.000 ndraono Gizaraʼeli ba 30.000 niha Yehuda.
9 Lamane khö ndra tenge-tenge si tohare andrö, ”Miwaʼö khö ndra niha Yabesi ba Gileadi: ’Mahemolu ba zi laluo, teʼefaʼö ami.’” Lafaʼema wehede daʼö khö ndra niha Yabesi ira niha nifatenge ba omuso sibai dödöra.
10 Lamane ira niha Yabesi, ”Mahemolu malulu ndraʼaga khömi, ba tola mifalua hadia manö zomasi ami khöma.”+
11 Mahemolunia, ibagi tölu zaradadunia Saulo ba möi ira ba gotalua nose me inötö wanaro sihulö wongi* ba labunu niha Gamoni+ ofeta laluo. Ahori muzawili niha si lö mubunu, ba lö hadöi ba gotaluara zi fao daru-darua.
12 Lamane niha sato khö Zamueli, ”Haniha zangumaʼö, ’Hadia razoda Zaulo andrö?’+ Miʼohe ira ba daʼa, akha mabunu ira.”
13 Imane Saulo, ”Tebai so nibunu maʼökhö daʼa,+ börö me no iʼefaʼö ndraono Gizaraʼeli Yehowa maʼökhö andre.”
14 Aefa daʼö imane Samueli ba niha sato, ”Miʼaine, möi ita ba Giligala+ ba wamaduhuʼö razoda.”+
15 Ba möi ira fefu ba Giligala ba lafataro Zaulo tobali razo föna Yehowa ba daʼö. Labeʼe zumange fangatulö khö Yehowa+ ba laʼowasaini daʼö iraono Gizaraʼeli hegöi Saulo, si fao faʼomuso dödö sebua.+
