Sara Samueli 12:1-25
12 Ba gafuriata imane Samueli ba ndraono Gizaraʼeli, ”No uʼoʼö fefu niwaʼömi,* ba no ufataro razo samatörö yaʼami.+
2 Yaʼe razo samatörö yaʼami!*+ No udöniaʼö ami iʼotarai me awuyu-wuyu ndraʼo+ ba no atua ndraʼo iadaʼa ba ahuwa, ba so ndraonogu ba daʼa si fao khömi.+
3 Yaʼe ndraʼo. Na lö fao dödömi khögu, mifaduhuʼö föna Yehowa ba föna niha nibayoininia:+ Haʼökhö zawi mazui kalide si no irai uhalö?+ Haniha zi no irai ulimo mazui ufakao? Haʼökhö no irai utema zölö-sölö ba waminiʼö sala?+ Mifatunö, ba hasambalö ufuli fefu.”+
4 Latema li, ”Lö irai ölimo ndraʼaga, öfakao ndraʼaga, mazui ötema gofu hadia ia moroi ba danga niha.”
5 Börö daʼö imane khöra, ”Yehowa hegöi niha nibayoininia, daʼö zamaduhuʼö maʼökhö andre wa lö hadöi sinangea mifobahulu ndraʼo.”* Latema li, ”Yaʼia zamaduhuʼö.”
6 Imane khöra Samueli, ”Yehowa andrö zamaduhuʼö khömi. Yaʼia zamatenge Moze hegöi Aʼaroni ba wangeheta ira tuami moroi ba danö Miserai.+
7 Ba miʼozizio iadaʼa, yaʼodo zanguhuku yaʼami föna Yehowa moloʼö ngawalö zi sökhi fefu nifalua Yehowa khömi hegöi khö ndra tuami.
8 ”Me tohare Yakobo ba danö Miserai,+ labörögö ira tuami wangandrö tolo khö Yehowa,+ ba ifatenge Moze+ hegöi Aʼaroni Yehowa ba wangeheta yaʼira moroi ba danö Miserai, enaʼö toröi ira ba daʼa.+
9 Hizaʼi, no olifu ira Lowalangira Yehowa irege ilulu* ira+ ba danga Zisera,+ kumandru zaradadu Hasora andrö, ba danga niha Wilisiti+ hegöi ba danga razo Moabi+ si lö aetu ba wolawa yaʼira.
10 Laʼandrö wanolo khö Yehowa+ ba lamane, ’No mafalua horö,+ börö me no maʼerogö Yehowa ba mafosumange Mbaʼali+ hegöi adu Gasaroti.+ Efaʼö ndraʼaga iadaʼa ba danga zi faʼudu khöma, enaʼö tola mafosumange ndraʼugö.’
11 Aefa daʼö ifatenge niha Yehowa ba wangefaʼö yaʼami ba danga zi faʼudu ba zi fasuimi irege ahono dödömi me lö sametaʼu yaʼami.+ Yaʼira andrö Yerubi-mbaʼali,+ Bedana, Yefita+ ba Samueli.+
12 Me miʼila tohare Nahasi+ razo niha Gamoni ba wanuwö yaʼami, lö miböhöli wangumaʼö khögu, ’Löʼö, omasiga na so razoma!’+ Sindruhunia Yehowa Lowalangimi daʼö razomi.+
13 Yaʼe iadaʼa razo nifilimi, niʼandrömi. No ifataro samösa khömi razo Yehowa.+
14 Na miʼataʼufi Yehowa,+ mifosumange+ ba mifondrondrongo niwaʼönia,+ na lö misawö goroisa Yehowa, ba na yaʼami hegöi razomi miʼoʼö niwaʼö Yehowa Lowalangimi, sökhi daʼö.
15 Hizaʼi, na lö miʼoʼö niwaʼö Yehowa ba misawö goroisa Yehowa, tanga Yehowa zolawa yaʼami hegöi amami.+
16 Miʼozizio manö, ba mifaigi zahöli-höli dödö nifalua Yehowa föna hörömi.
17 Hadia tenga baŵa wamasi gandru iadaʼa? Muʼao ndraʼo khö Yehowa enaʼö ifeʼugu mbanua ba alua deu, enaʼö miʼila ba aboto ba dödömi wa no mifalua horö sebua föna Yehowa me miʼandrö razomi.”+
18 Aefa daʼö muʼao Zamueli khö Yehowa, ba ifeʼugu mbanua Yehowa ba alua deu ba zi maʼökhö daʼö irege ataʼu ira khö Yehowa hegöi khö Zamueli.
19 Lamane khö Zamueli, ”Angandrö khö Yehowa Lowalangimö salahi ndra enonimö andre,+ lö omasiga mate. No mafalua zi lö sökhi me maʼandrö razoma, irege monönö horöma.”
20 Andrö imane khöra Samueli, ”Böi miʼataʼufi. Atulö wa no mifalua zi lö sökhi. Iadaʼa, böi miʼerogö Yehowa+ ba mifosumange Yehowa soroi ba dödömi.+
21 Böi miholeʼö ami ba wolohi si möi zaya-zaya gölö,+ si lö moguna,+ si tebai mangorifi yaʼami, börö me zaya-zaya gölö fefu daʼö.
22 Börö döinia solakhömi,+ lö iröi nono mbanuania+ Yehowa, börö me Yehowa zombaliʼö yaʼami tobali ono mbanuania.+
23 Lö omasido ufalua horö föna Yehowa ba wamöhöli fangandrö salahimi. Lö ubato wamahaʼö yaʼami lala si sökhi ba satulö.
24 Hizaʼi, miʼataʼufi Yehowa+ ba böi faröi* ami ba wamosumange yaʼia soroi ba dödö. Mitörö tödömi zahöli-höli dödö nifaluania khömi.+
25 Ba na lö miböhöli wamalua si lö sökhi, hasambalö ihori ami,+ he yaʼami hegöi razomi.”+
Nisura ba gahe zura
^ Sin.: ”ufondrondrongo limi”.
^ Sin.: ”sowaö-waö fönami”.
^ Sin.: ”lö nisöndrami hadia ia ba dangagu”.
^ Sin.: ”ifamawa”.
^ Mazui ”mifosumange ia ba zindruhu”.
