Sara Samueli 13:1-23
13 Faʼalawa ndröfi Zaulo me tobali ia razo+ . . .* fakhe, ba dua fakhe mamatörö ia ba ndraono Gizaraʼeli.
2 So 3.000 niha moroi ba Gizaraʼeli nifili Zaulo. So 2.000 zi fao khönia ba Mikhimasi hegöi ba mbanua si so ba hili Mbetieli, ba 1.000 zi fao khö Yonata+ ba Gibea+ Mbeniami. Tanö böʼö, ifangawuli ba nosera zamösana.
3 Kala ndra saradadu Wilisiti+ ba Geba+ ibeʼe Yonata, ba larongo daʼö ira niha Wilisiti. Börö daʼö, iwaʼö Saulo enaʼö lafoli dorofe nifazökhi moroi ba dandru+ ba soi daʼö maʼasagörö ba lamane, ”Mifondrondrongo yaʼami niha Heberaiʼo!”
4 Larongo fefu duria daʼö iraono Gizaraʼeli, ”No ibunu zaradadu Wilisiti Saulo. Iadaʼa, fatuwu sibai niha Wilisiti ba ndraono Gizaraʼeli.” Daʼö mbörö wa lakaoni niha sato enaʼö fao ira khö Zaulo ba Giligala.+
5 Owulo niha Wilisiti ba wanuwö iraono Gizaraʼeli. So 30.000 gureta wasuwöta ba 6.000 zaradadu si fakudo, ba simane faʼoya gawu ba zinga nasi+ waʼato zaradadu. Tohare ira ba lafazökhi nosera ba Mikhimasi, tanö ba gatumbukha Mbeti-avena.+
6 Laʼila iraono Gizaraʼeli wa tosasa waʼaurira börö me no teʼuʼu ira irege so zaminiʼö yaʼira ba dögi narö hili,+ ba gotalua gara, ba hili sokara, ba narö danö hegöi ba mbaʼa nidanö.
7 So ösa niha Heberaiʼo sangötö Ungo Nidanö Yoridano numalö ba mbanua Gado hegöi ba Gileadi.+ Hizaʼi toröi Zaulo ba Giligala ba ataʼu fefu niha si fao khönia.
8 Ibaloi manö fitu hari irugi ginötö si no itatugöi Samueli, hizaʼi lö iʼila tohare Zamueli ba Giligala ba ibörögö laröi ia niha sato.
9 Imane Saulo, ”Miʼohe ba daʼa khögu zumange nitunu ba sumange fangatulö.” Aefa daʼö, ibeʼe zumange nitunu andrö.+
10 Awai sibai ibeʼe zumange nitunu andrö Saulo, tohare Zamueli. Ifaondragö ia Saulo ba itemaʼö.
11 Imane khönia Samueli, ”Hadia nifaluamö?” Imane Saulo, ”Uʼila wa no ibörögö laröi ndraʼo niha sato,+ ba lö iʼila tohare ndraʼugö ba ginötö si no ötatugöi, ba no owulo göi niha Wilisiti ba Mikhimasi.+
12 Andrö umane tödögu, ’No mamaʼanö niha Wilisiti ba wanuwö yaʼo ba Giligala ba lö niʼandrögu faʼahakhö dödö Yehowa.’* Daʼö mbörö wa ufaso manö wameʼe sumange nitunu.”
13 Imane Samueli khö Zaulo, ”Ba daʼa oroma waʼabodomö. Lö öʼoʼö goroisa Yehowa Lowalangiu.+ Na öʼoʼö menaʼö, hasambalö aro wamatörömö sagötö faʼara ba ndraono Gizaraʼeli ibeʼe Yehowa.
14 Iadaʼa, hasambalö adudu wamatörömö.+ Iʼalui dania niha böʼö Yehowa sangomusoiʼö tödönia,+ ba ifataro ia Yehowa tobali sondröniaʼö ono mbanuania+ börö me lö öʼoʼö goroisa Yehowa.”+
15 Aefa daʼö mofanö Zamueli moroi ba Giligala numalö ba Gibea Mbeniami. Iʼerai zaradadunia Saulo ba so mato 600 niha zi fao khönia nasa.+
16 Ba Geba+ Mbeniami toröi Zaulo, ononia Yonata hegöi niha si fao khöra. Lafazökhi nosera ira niha Wilisiti ba Mikhimasi.+
17 Tohare zorabu moroi ba nose niha Wilisiti, labagi tölu ngawawa ira. Ngawawa si oföna numalö ba lala sofeta ba Gofera ba danö Zuala,
18 ngawawa si dua numalö ba lala Mbeti-horona,+ ba ngawawa si tölu numalö ba lala sofeta ba nola yefo ndraso Zeboyi, gamaudu danö si mate.
19 Me luo daʼö, lö hadöi sonekhe mamazökhi loga ba zi sagörö soi Gizaraʼeli, börö me lamane ira niha Wilisiti, ”Böi so niha Heberaiʼo samazökhi föda mazui toho.”
20 Andrö wa möi ndraono Gizaraʼeli khö ndra niha Wilisiti ba wamazökhi khöra siʼöli wamaliʼö tambu, faku, fato mazui rosö.
21 Gazi ba wangataröʼö siʼöli wamaliʼö tambu, faku, garafu fokharu danö, fato, mazui ba wangehaogö siʼo gubalo, yaʼia daʼö mato walu gram firö.*
22 Ba me alua wasuwöta andrö, lö hadöi föda mazui toho ba danga niha si fao khö Zaulo hegöi Yonata.+ Ha Saulo zangogunaʼö fangöna, simanö göi nononia Yonata.
23 Me luo daʼö, mofanö ndra saradadu Wilisiti latörö lala sise-ise ba ndraso Mikhimasi.+
Nisura ba gahe zura
^ Lö si tesura hawaʼalawa ndröfinia ba ngawua wehede Heberaiʼo.
^ Mazui ”lö nihalögu tödö Yehowa”.
