Sara Samueli 15:1-35
15 Imane Samueli khö Zaulo, ”Yehowa zamatenge yaʼo ba wombayoini yaʼugö tobali razo ba nono mbanuania Izaraʼeli.+ Iadaʼa, fondrondrongo hadia niwaʼö Yehowa.+
2 Imane Yehowa samatörö saradadu zorugo, ’Usugi niha Gamaleki enaʼö laluʼi zi no lafalua, me no lasuwö ndraono Gizaraʼeli me aheta ira ba danö Miserai.+
3 Ofanö iadaʼa, suwö niha Gamaleki,+ hori ira fefu+ awö gokhötara. Böi tehegö auri* ira. Bunu ira fefu,+ ira matua hegöi ira alawe, iraono side-ide hegöi ono sawuyu, sawi hegöi biri-biri, ondra ba kalide.’”+
4 Iʼowuloi zaradadunia Saulo ba iʼerai ira ba Delami, 200.000 fefu zaradadu sanörö tanö ba 10.000 zaradadu Yehuda.+
5 Ba möi Zaulo ba mbanua Gamaleki, labiniʼö ira ba ndraso ba wamaʼuʼu niha Gamaleki.
6 Imane Saulo khö ndra niha Geni,+ ”Miʼofanö, miröi niha Gamaleki enaʼö lö ufaogö wangohori yaʼami khöra,+ börö me miforomaʼö waʼomasi si lö faröi ba ndraono Gizaraʼeli+ me aheta ira ba danö Miserai.” Andrö mofanö niha Geni moroi ba gotalua niha Gamaleki.
7 Aefa daʼö ikalaisi niha Gamaleki andrö+ Saulo, iʼotarai Hawila+ irugi Zuri+ si so ba zi tambai Miserai.
8 Iraʼu razo Gamaleki andrö sotöi Agagi,+ ba ahori ibunu fefu niha mbanua daʼö faoma föda.+
9 Hewaʼae simanö, Saulo hegöi ira saradadunia lö labunu* Agagi awö gurifönia fondrege zi sökhi simane nambi, urifö satabö, biri-biri si matua, ba fefu danö böʼö si sökhi.+ Lö omasi ira lahori daʼö. Awai nihorira ha si lö moguna ba si lö omasi ira.
10 Imane Yehowa khö Zamueli,
11 ”Maniasa ndraʼo me no ufataro Zaulo tobali razo. No iröi ndraʼo ba lö iʼoʼö wehedegu.”+ Abua sibai khö Zamueli ba lö iböhöli weʼao khö Yehowa ba zi sara wongi daʼö.+
12 Me maoso ia sihulö wongi sibai ba wamalukhaisi Saulo, so duria nirongo Zamueli, ”No mofanö Zaulo ba Garimeli,+ ba no ifazökhi khönia ba daʼö nadu famolakhöminia.+ Aefa daʼö möi ia mitou ba Giligala.”
13 Me möi Zamueli wamalukhaisi Saulo, imane khönia Saulo, ”Yaʼifahowuʼö ndraʼugö Yehowa. No ufalua niwaʼö Yehowa.”
14 Hizaʼi imane Samueli, ”Na simanö, hana wa urongo-rongo li nambi, biri-biri ba sawi?”+
15 Imane Saulo, ”Nihalö moroi ba niha Gamaleki daʼö, börö me lö omasi* ndra saradadu na tehori nambi, biri-biri, ba sawi fondrege zi sökhi, enaʼö tola mubeʼe sumange nitunu ia khö Lowalangimö Yehowa. Tanö böʼönia, no mahori.”
16 Me irongo daʼö imane Samueli, ”Noa daʼö! Ufatunö khöu hadia niwaʼö Yehowa khögu mege ba zi bongi.”+ Imane Saulo, ”Fatunö.”
17 Itohugö wangumaʼö Samueli, ”Hadia tenga si lö eluaha ndraʼugö mböröta ba wamaigimö,+ me tobali ndraʼugö sondröniaʼö ba mado ndraono Gizaraʼeli, me ibayoini ndraʼugö Yehowa tobali razo ndraono Gizaraʼeli?+
18 Ba gafuriata, ifatenge ndraʼugö Yehowa ba wamalua sambua halöwö me imane, ’Ofanö, ae hori fefu niha Gamaleki sebua horö.+ Suwö ira irege ahori mate ira fefu.’+
19 Ba hana wa lö öʼoʼö niwaʼö Yehowa, si fao fakhögusa örabu gahulua+ ba öfalua zi lö sökhi föna Yehowa?”
20 Imane Saulo, ”Ba no uʼoʼö niwaʼö Yehowa! No möido ufalua halöwö nibeʼe Yehowa ba wondraʼu Agagi razo Gamaleki andrö, ba no ahori ubunu fefu niha Gamaleki.+
21 Ira saradadu zangai biri-biri ba sawi fondrege zi sökhi moroi ba nirabu sinangea muhori andrö, enaʼö labaliʼö sumange khö Yehowa Lowalangimö ba Giligala.”+
22 Imane Samueli, ”Hezo zabölö omasi Yehowa tafalua: Mameʼe sumange nitunu awö zumange tanö böʼö+ mazui ba woloʼö niwaʼö Yehowa? Abölö sökhi woloʼö moroi ba wameʼe sumange,+ ba abölö sökhi woʼameʼegö tödö moroi ba wameʼe tawö+ mbiri-biri si matua.
23 Famadaö+ fagölö waʼalösökhinia ba waetasa,+ ba faʼasiliyawa fagölö ira ba wakelemusa ba fanömba adu.* Börö me lö öʼoʼö niwaʼö Yehowa,+ iheta khöu waʼarazo.”+
24 Imane Saulo khö Zamueli, ”No ufalua horö, no usawö goroisa Yehowa hegöi fehedemö börö waʼataʼugu niha ba ufondrondrongo niwaʼöra.
25 Iadaʼa uʼandrö khöu, efaʼö khögu horögu ba fao khögu wangawuli enaʼö tola utuhi danö föna Yehowa.”+
26 Hizaʼi imane Samueli khö Zaulo, ”Lö fao ndraʼo khöu ba wangawuli. Lö niʼoʼöu wehede Yehowa, ba no itimbagö ndraʼugö Yehowa tobali razo ba ndraono Gizaraʼeli.”+
27 Me ibaliʼö ia Samueli ba wofanö, igogohe Saulo gahe mbaru Zamueli sanau si lö taʼio irege asika.
28 Me iʼila daʼö imane khönia Samueli, ”Maʼökhö andre, no iheta khöu Yehowa wamatörö ndraono Gizaraʼeli, ba ibeʼe ba niha böʼö sabölö sökhi moroi khöu.+
29 Lö duhu falimo+ Lowalangi Solakhömi ba Gizaraʼeli+ mazui ibulöʼö wangera-ngerania,* börö me tenga simane niha ia, salio tebulö era-era.”*+
30 Imane Saulo, ”No ufalua horö. Hizaʼi, uʼandrö khöu fosumange ndraʼo föna ndra satua mbanua ba soigu ba föna ndraono Gizaraʼeli. Fao khögu wangawuli ba utuhi danö föna Yehowa Lowalangimö.”+
31 Ba fao Zamueli khö Zaulo ba wangawuli, ba ituhi danö Saulo föna Yehowa.
32 Aefa daʼö imane Samueli, ”Ohe ba daʼa Agagi razo Gamaleki.” Ba tohare Agagi si fao faʼataʼu,* börö me iwaʼö tödönia mege, ’Lö saʼae labunu ndraʼo.’*
33 Hizaʼi imane Samueli, ”Simane ina si taya ono börö wödamö, simane daʼö göi ninamö, taya nononia.” Aefa daʼö, igögötö Agagi andrö Samueli föna Yehowa ba Giligala.+
34 Ba mofanö Zamueli numalö ia ba Rama, ba mangawuli Zaulo ba nomonia ba Gibea Zaulo.
35 Lö saʼae irai falukha Zamueli khö Zaulo irugi ngaluo waʼamatenia, börö me no abu dödö Zamueli khö Zaulo.+ Maniasa Yehowa börö me no ifataro Zaulo tobali razo ba ndraono Gizaraʼeli.+
Nisura ba gahe zura
^ Mazui ”Böi hakhösi tödö”.
^ Mazui ”laforomaʼö waʼahakhö dödö khö”.
^ Mazui ”börö me ahakhö dödö”.
^ Mazui ”adu nösi nomo”. Sin.: ”terafi”.
^ Mazui ”maniasa ia”.
^ Mazui ”maniasa”.
^ Mazui te ”Ba lö faʼaombö dödö khö Agagi”.
^ Sin.: ”No italuʼi ndraʼo faʼafökhö waʼamate”.
