Sara Samueli 16:1-23
16 Aefa daʼö imane Yehowa khö Zamueli, ”Hawaʼara tebato waʼabu dödöu khö Zaulo?+ No utimbagö ia tobali razo ndraono Gizaraʼeli.+ Foʼösi dandru andrö khöu faoma fanikha,+ ba aeʼe khö Gizaʼi+ niha Mbetilekhema andrö börö me no ufili samösa nononia tobali razo khögu.”+
2 Imane Samueli, ”Hewisa weʼamöigu ba daʼö? Na irongo daʼa Saulo, hasambalö ibunudo.”+ Imane Yehowa, ”Ohe sageu zawi si bohou ebua ba ömane, ’Möido ba wameʼe sumange nitunu khö Yehowa.’
3 Kaoni Gizaʼi na öbeʼe zumange nitunu andrö, ba ufatunö khöu dania hadia zinangea öfalua. Hasambalö öbayoini khögu niha nifiligu andrö.”+
4 Iʼoʼö Samueli hadia niwaʼö Yehowa khönia. Me irugi Mbetilekhema+ lafalukhaisi ia ira satua mbanua ba daʼö si fao faʼataʼu ba lamane khönia, ”Hadia faʼohahau dödö wa tohare ndraʼugö?”
5 Imane Samueli, ”Faʼohahau dödö wa tohare ndraʼo. Möido ubeʼe zumange nitunu khö Yehowa. Miʼamoniʼö ami ba mifao khögu ba wameʼe sumange nitunu andre.” Aefa daʼö iʼamoniʼö Gizaʼi awö ndraononia matua, ba ikaoni ira ba wameʼe sumange andrö.
6 Me tohare ira ba iʼila Geliabi,+ imane tödönia, ”Hasambalö daʼa niha nibayoini Yehowa.”
7 Imane Yehowa khö Zamueli, ”Böi faigi mbotonia ba faʼalawania,+ börö me tenga yaʼia nifiligu. Famaigi niha faböʼö ba wamaigi Lowalangi, börö me ha soroma ba hörö niʼila niha, hizaʼi tödö nifaigi Yehowa.”+
8 Aefa daʼö, ikaoni Izaʼi nononia Gabinadabi+ ba iʼohe khö Zamueli, hizaʼi imane Samueli, ”Tenga yaʼia nifili Yehowa.”
9 Aefa daʼö iʼohe Izaʼi nononia sotöi Sama,+ imane zui Samueli, ”Tenga yaʼia nifili Yehowa.”
10 Iʼohe nononia si dafitu andrö Izaʼi khö Zamueli, hizaʼi imane Samueli khö Gizaʼi, ”Lö hadöi ba daʼa nifili Yehowa.”
11 Börö daʼö manofu Zamueli khö Gizaʼi, ”Hadia awai andre nonomö?” Imane Izaʼi, ”So ziakhi nasa.+ No möi ia ikubaloi mbiri-biri.”+ Imane Samueli khö Gizaʼi, ”Kaoni ia. Tebai manga ita na lö si tohare ia.”
12 Andrö ikaoni ia Izaʼi, iʼohe yomo ba nomo. Awuyu sibai nasa ia, waʼasökhi hörönia ba no siga-siga.+ Imane Yehowa, ”Ozizio, bayoini ia me yaʼia nifiligu!”+
13 Ihalö Samueli dandru si no ifoʼösi faoma fanikha+ ba ibayoini Dawido föna ndra gaʼania. Iʼotarai daʼö mohalöwö geheha Yehowa ba waʼauri Dawido.+ Aefa daʼö, mangawuli Zamueli ba Rama.+
14 No aheta geheha Yehowa khö Zaulo,+ ba itehegö Yehowa lö sökhi-sökhi dödö Zaulo börö gera-erania samösa.*+
15 Lamane khö Zaulo ira sohalöwö khönia, ”No itehegö Lowalangi enaʼö lö sökhi-sökhi dödöu.
16 Na lö fatimba khöu Pa, fatenge ndra sohalöwö khöu ba wogaoni niha sonekhe ba wotika harafa.+ Ero na itehegö Lowalangi lö sökhi-sökhi dödöu, akha itika harafa andrö niha daʼö ba terara dödöu.”
17 Imane Saulo khö zohalöwö khönia, ”Miʼalui khögu niha sonekhe ba wotika harafa andrö ba miʼohe ia ba daʼa.”
18 Imane samösa sohalöwö khönia, ”No irai uʼila samösa nono Gizaʼi ba Mbetilekhema sonekhe ba wotika harafa, sabölö ba wasuwöta ia ba si lö faʼataʼu.+ Onekhe ia fahuhuo ba no siga-siga,+ ba fao khönia Yehowa.”+
19 Aefa daʼö, ifatenge denge-tengenia Saulo khö Gizaʼi ba imane, ”Fatenge khögu nonomö Dawido sokubaloi biri-biri andrö.”+
20 Ihalö Izaʼi roti, naha* nagu nibadu, ba ono nambi, aefa daʼö ibeʼe ba dete hulu galide, ifaʼoheʼö khö Zaulo fao nononia Dawido.
21 Ofeta Dawido khö Zaulo ba ibörögö mangai halöwö ia.+ Omasi sibai Zaulo khö Dawido ba ibaliʼö solohe fangönania.
22 Ifaʼoheʼö goroisania Saulo khö Gizaʼi, ”Tehegö khö Dawido enaʼö lö iböhöli wangai halöwö khögu börö me omasido ia.”
23 Ero na itehegö Lowalangi lö sökhi-sökhi dödö Zaulo, ihalö harafania Dawido ba itika, ahono dödö Zaulo ba omuso dödönia ba taya waʼalösökhi-sökhi dödönia.+
Nisura ba gahe zura
^ Sin.: ”ifakao Zaulo eheha si lö sökhi moroi khö Yehowa”.
^ Nifazökhi moroi ba guli gurifö.
