Sara Samueli 19:1-24
19 Lö ara aefa daʼö, ifatunö Saulo khö nononia Yonata ba fefu ndra sawuyunia wa omasi ia na ibunu Dawido.+
2 Börö me omasi sibai Yonata ono Zaulo andrö khö Dawido,+ imane Yonata khö Dawido, ”Edöna ibunu ndraʼugö amagu. Angelama mahemolu sihulö wongi. Aeʼe ba naha si tobini, ba daʼö biniʼö ndraʼugö.
3 Fao ndraʼo khö namagu ba mozizio ndraʼo ba zingania ba mbenua, ba gamaudu nibiniʼömö yaʼugö. Ba fahuhuo ndraʼo khö namagu sanandrösa khöu. Na so nirongogu, hasambalö ufatunö khöu.”+
4 Börö daʼö, ifatunö Yonata ngawalö zi sökhi nifalua Dawido+ khö namania Saulo. Imane, ”He Razo, böi falua horö khö zawuyumö Dawido andrö börö me lö hadöi salania khöu, ba no ifalua ngawalö zi sökhi soguna khöu Razo.
5 Itehegö nosonia ba wamunu niha Wilisiti+ andrö irege ibeʼe waʼamöna* sebua Yehowa ba Gizaraʼeli. No öʼila samösa daʼö Razo, ba omuso dödöu. Tobali, hadia mbörö wa edöna öbunu Dawido lö börö-börö irege fasala ndraʼugö ba ndro niha si lö horö?”+
6 Ifondrondrongo niwaʼö Yonata andrö Saulo ba möi ba hölu Zaulo, ”Faya wa no sauri Yehowa na labunu ia.”
7 Aefa daʼö, ikaoni Dawido Yonata ba ifatunö khönia fefu zalua. Ifasao Dawido andrö Yonata khö Zaulo, ba ifuli mangai halöwö Dawido khö Zaulo simane ba zilalö.+
8 Me fasuwö zui ira ba niha Wilisiti, möi föna Dawido ba ikalaisi ira. Abölö-bölö wanuwönia yaʼira irege moloi ira fönania.
9 Ifuli zui itehegö Yehowa lö sökhi-sökhi dödö Zaulo.*+ Me luo daʼö, no modao-dao Zaulo ba gödonia, no igogohe doho ba so ba daʼö Dawido, ba manika harafa ia.+
10 Ifuli zui itandraigö Saulo ba wohandro Dawido faoma toho enaʼö tetaru ia ba dowa, hizaʼi iholeʼö ia Dawido irege tetaru doho andrö ba dowa. Bongi daʼö, moloi Dawido ba lö teʼala ia.
11 Aefa daʼö, ifatenge niha Saulo ba wanarogö omo Dawido ba wamunu yaʼia sihulö wongi,+ hizaʼi ifatunö Mikhala khö woʼomonia Dawido, ”Na lö mofanö ndraʼugö bongi daʼa, mateʼö mahemolu.”
12 Iʼanemaiʼö idada si tou Dawido andrö Mikhala, ifatörö ba zandrela irege tola moloi Dawido ba wangefaʼö yaʼia.
13 Maoso Mikhala ibeʼe nadu* yawa ba naha wemörö Dawido, no ifoʼambala faoma nukha nifazökhi moroi ba mbu nambi ba gamaudu högö farate, ba ibalugö faoma nukha.
14 Ifatenge niha Saulo ba wamaondragö Dawido, hizaʼi imane Mikhala, ”Mofökhö ia.”
15 Börö daʼö ifatenge niha Saulo ba wamaigi Dawido imane, ”Miʼohe ia ba daʼa fabaya naha wemörönia enaʼö ubunu ia.”+
16 Me ofeta niha nifatenge Zaulo, laʼila nadu* andrö ba naha wemörö ba no mufoʼambala faoma nukha nifazökhi moroi ba mbu nambi ba gamaudu högö farate daʼö.
17 Imane Saulo khö Mikhala, ”Hana wa ölimo ndraʼo simane daʼa ba ötolo zi faʼudu khögu+ enaʼö moloi ia?” Imane Mikhala, ”Iwaʼö khögu, ’Tehegö khögu wofanö, na löʼö ba ubunuʼö.’”
18 Moloi Dawido ba möi ia ifalukhaisi Zamueli ba Rama.+ Ifatunö fefu nifalua Zaulo khönia ba mofanö ira, toröi ira ba Nayoti.+
19 Ba gafuriata irongo Saulo duria, ”Ba Nayoti ba Rama so Dawido.”
20 Iʼanemaiʼö ifatenge niha Saulo ba wondraʼu Dawido. Me laʼila mamaʼeleʼö ndra samaʼeleʼö si no agatua ba so ba gotaluara Zamueli sondröniaʼö yaʼira, mohalöwö geheha Lowalangi khö ndra tenge-tenge Zaulo andrö ba ibörögö göi lafalua zimane nifalua ndra samaʼeleʼö.
21 Me irongo daʼö Saulo, ifuli zui ifatenge niha böʼö ba ibörögö zui lafalua zimane nifalua ndra samaʼeleʼö. Börö daʼö, ifuli zui ifatenge niha böʼö Saulo, ngawawa si tölu, ba ibörögö zui lafalua zimane nifalua ndra samaʼeleʼö.
22 Lua-luania, möi Zaulo ba Rama. Me irugi mbaʼa nidanö sebua ba Zeku, manofu ia, ”Hezo Zamueli faoma Dawido?” Lamane khönia, ”Sisa ba daʼö, ba Nayoti+ ba Rama.”
23 Me numalö ba daʼö Zaulo, mohalöwö khönia geheha Lowalangi ba mofanö ia hulö göi simane nifalua ndra samaʼeleʼö nifaluania irege ofeta ia ba Nayoti ba Rama.
24 Iheta göi nukhania ba ifalua zimane nifalua ndra samaʼeleʼö föna Zamueli. Ifadölö ia tou lö nukha, maʼö-maʼökhö ba sara wongi. Daʼö mbörö wa lamane niha, ”Hadia samaʼeleʼö göi Zaulo andrö?”+
Nisura ba gahe zura
^ Mazui ”wangefa”.
^ Sin.: ”ifakao Zaulo eheha si lö sökhi moroi khö Yehowa”.
^ Mazui ”nadu nösi nomo”. Sin.: ”terafi”.
^ Mazui ”nadu nösi nomo”. Sin.: ”terafi”.
