Sara Samueli 2:1-36
2 Aefa daʼö mangandrö Khana,
”Omuso dödögu börö Yehowa;+No ibeʼe khögu* waʼabölö Yehowa.
No ibokai mbawagu ba wameʼe fanema li ba zi faʼudu khögu,Börö waʼomuso dödö ba wangorifi andrö si otarai ndraʼugö.
2 Samösa lö niʼamoniʼö simane Yehowa,Lö hadöi simane yaʼugö,+Ba lö hadöi gowe saro simane Lowalangima.+
3 Miböhöli wehede fayawasa;Böi alua ba mbewemi wehede faʼasiliyawa,Börö me ahori iʼila fefu Lowalangi Yehowa,+Ba yaʼia zamareso amuata si fao faʼatulö.
4 Adudu wana ndra saradadu sabölö,Ba niha si no alabu ibeʼe waʼabölö.+
5 Niha sabuso, mohalöwö ia ba wangalui önia,+Niha solofo, lö saʼae olofo ia.+
Niha si lö ono, tumbu khönia dafitu ndraono,Ba sato ono matua toröi furi.*
6 Yehowa zamunu ba sondrorogö faʼauri;Yaʼia zolohe mitou ba Lewatö* ba sanusugi.+
7 Yehowa zameʼe faʼanumana ba faʼakayo;+Yaʼia zohöndrögö ba soʼalawaʼö.+
8 Ifazawa niha sambö faʼabölö moroi ba gawu-gawu;Iʼalawaʼö niha si numana moroi ba dambu,*+Enaʼö modadao ira ba zinga zondröniaʼö,Ba wameʼe khöra dadaoma nifosumange.+
Yehowa zangokhögö ehomo danö,Sameʼe tanö yawa ba detenia.
9 Irorogö lala nono mbanuania si lö faröi,+Ihori niha si lö sökhi ba zogömi-gömi,+Börö me tenga ba waʼabölönia samösa möna niha.+
10 Yehowa zangohori niha solawa yaʼia;*+Ifeʼugu ia khöra moroi ba dalu mbanua.+
Yehowa zanguhuku ulidanö maʼasagörö,+Yaʼia zameʼe kuaso khö razonia,+Ba iʼalawaʼö dandru* niha nibayoininia.”+
11 Aefa daʼö, mangawuli Elikana ba nomonia si so ba Rama, ba mangai halöwö nono andrö khö Yehowa+ föna Gere Eli.
12 Lö sökhi gamuata ndraono Eli+ ba lö lafosumange Yehowa.
13 Ambö khöra nibeʼe nono mbanua si tobali tana khö gere, lafalua nasa daʼa:+ Ero so zameʼe sumange nitunu, tohare zangai halöwö khö gere ba so garafu sebua ba dangania. Na larino nagole andrö,
14 itaruʼö garafu daʼö ba naha niʼogunaʼö ba wondrino nagole andrö. Hadia zi fakhai ba garafu daʼö, ihalö ere tobali tana khönia. Daʼö nifaluara na so ndraono Gizaraʼeli si möi ba Zilo.
15 Fatua lö mutunu dawö nibeʼe sumange,+ tohare zangai halöwö khö gere, imane ba niha sameʼe sumange andrö, ”Beʼe khö gere nagole sataha si tola mufaga. Ha nagole sataha zomasi itema moroi khöu, tenga si no murino.”
16 Na imane niha andrö, ”Tunu ua dawönia,+ awena halö zomasiʼö,” si toʼölönia imane sangai halöwö khö gere, ”Löʼö, iadaʼa beʼe! Na löʼö, ufaso wangai.”
17 Daʼö mbörö wa ebua sibai horö ndra sangai halöwö andrö föna Yehowa+ börö me laʼaohasi ba dödö zumange nibeʼe khö Yehowa.
18 Ba mangai halöwö Zamueli+ föna Yehowa, ifake* nukha gere* si sökhi+ hewaʼae iraono ia nasa.
19 Ero röfi, ifazökhi inania mbaru sanau side-ide si lö taʼio ba ibeʼe khönia ero na tohare ira foʼomonia ba wameʼe sumange nifalua ero röfi.+
20 Fatua lö mangawuli Gelikana hegöi foʼomonia, ifahowuʼö ira Eli imane, ”Yaʼibeʼe khöu nono Yehowa moroi khö woʼomomö andre si tobali fangali nono nifafizaʼöu khö Yehowa.”+ Aefa daʼö mangawuli ira ba nomo.
21 Iʼameʼegö tödö Khana andrö Yehowa irege manabina ia+ ba tumbu khönia datölu nono matua ba darua nono alawe. Itugu tedou waʼebua Zamueli föna Yehowa.+
22 No atua saʼae Geli, ba no irongo fefu nifalua ndraononia+ ba ndraono Gizaraʼeli. Iʼila göi wa no mohorö ndraononia khö ndra alawe sangai halöwö ba mbawandruhö nose waʼowulo.+
23 Si toʼölönia imane khöra, ”Hana wa lö miböhöli wamalua daʼa? Lö sökhi nirongogu sanandrösa khömi moroi khö ndra niha daʼa fefu.
24 Böi mifalua zimane daʼö onogu. No urongo duriami si lö sökhi si tehöngö ba gotalua nono mbanua Yehowa.
25 Na so niha samalua horö ba niha böʼö, so zosalahini yaʼia ba wangandrö khö Yehowa.* Hizaʼi, na khö Yehowa ifalua horö,+ haniha zi tola mangandrö salahinia?” Hewaʼae simanö, lö lafondrondrongo li namara, börö me no ihalö gangetula Yehowa ba wamunu yaʼira.+
26 Itugu tedou waʼebua Zamueli ba itugu iʼomasiʼö ia Yehowa hegöi niha sato.+
27 Ba möi samösa genoni Lowalangi ba wamalukhaisi Eli imane, ”Daʼa goroisa Yehowa, ’Hadia tenga no ufaʼeleʼö ndraʼo ba nösi nomo namau me iʼosawuyu ira Faraʼo ba danö Miserai?+
28 No ufili ndra tuamö moroi ba gotalua mado ndraono Gizaraʼeli+ enaʼö tobali ira ere khögu, labeʼe zumange ba naha wanunu sumange,+ labeʼe zumange somuhua* ba lafake nukha gere* si sökhi fönagu. No ubeʼe ba nösi nomo ndra tuamö fefu zumange nitunu moroi ba ndraono Gizaraʼeli.+
29 Hana wa miʼaohasi ba dödö* zumange nibeʼe tana khögu niʼoroisigu ba nahia si toröi yaʼo?+ Hana wa abölö öfosumange ndraonou moroi ba wamosumange yaʼo, yaʼia me laʼa zabölö sökhi moroi ba zumange nibeʼe nono mbanuagu Izaraʼeli?+
30 ”’Daʼö mbörö wa imane Yehowa Lowalangi ndraono Gizaraʼeli, ”Sindruhu no uwaʼö wa lö tebulö mangai halöwö* fönagu nösi nomou hegöi ösi nomo ndra tuamö.”+ Hizaʼi, imane Yehowa iadaʼa, ”Lö utehegö alua daʼö, niha samosumange yaʼo ba ufosumange göi,+ ba niha sangosiwawöi yaʼo ba uʼosiwawöi.”
31 Ba ginötönia dania, uheta waʼabölöu* ba faʼabölö nösi nomo namau, irege lö hadöi sanau noso ba nösi nomou.+
32 Öʼila dania zi faʼudu khöu ba nahia si toröi yaʼo, ba larasoi ngawalö zi sökhi iraono Gizaraʼeli.+ Lö hadöi saʼae niha sanau noso ba nösi nomo namau.
33 Ngaʼötöu zi no utehegö ba wangai halöwö ba naha wanunu sumange khögu, abösi höröu labeʼe ba tobali fangabu dödöu. Hizaʼi, arakhagö fefu nösi nomou mate ira ba mbawa wöda.+
34 Si tobali tandra khöu, daʼa zalua ba ndraonomö si darua, Hofini ba Fineha: Endronga mate ira ba ngaluo si fagölö.+
35 Ufataro khögu samösa gere si lö faröi,+ samalua somasi dödögu. Ubaliʼö ere ngaʼötönia* ba lö tebulö mangai halöwö* ia föna niha si no ubayoini.
36 Tohare dania gofu haniha zi toröi ba nösi nomou, ba möi ia mangalulu khö gere andrö ba wangandrö kefe hegöi roti. Imane, ”Uʼandrö khöu, fohalöwö ndraʼo tobali ere, enaʼö tola uʼa safoto roti.”’”+
Nisura ba gahe zura
^ Mazui ”No iʼalawaʼö dandrugu”. Faigi duho ”Tandru” ba Geluaha Ngawua Wehede.
^ Sin.: ”aleu”.
^ Mazui ”Syeol”. Faigi Geluaha Ngawua Wehede.
^ Mazui te ”ba naha zasao”.
^ Mazui te ”Ataʼu niha solawa Yehowa”.
^ Faigi Geluaha Ngawua Wehede.
^ Mazui ”efod”. Daʼa mbaru sebua si so tanö föna ba tanö furi.
^ Sin.: ”ifaböbö ba löwi-löwinia”.
^ Mazui te ”Lowalangi dania zangagö dalu gotalua khömi”.
^ Mazui te ”lafanimbo zumange nitunu”.
^ Mazui ”efod”. Daʼa mbaru sebua si so tanö föna ba tanö furi.
^ Sin.: ”mitifa”.
^ Sin.: ”mowaö-waö”.
^ Sin.: ”daʼiou”.
^ Sin.: ”Ufazökhi khönia nomo si lö irai adudu”.
^ Sin.: ”mowaö-waö”.
