Sara Samueli 22:1-23
22 Mofanö Dawido moroi ba daʼö,+ moloi ia isawa Dögi Narö Hili Gadula.+ Me no larongo ira talifusönia hegöi ösi nomo namania maʼafefu, möi ira laʼondrasi ia.
2 Owulo khönia fefu niha si tosasa, si so foʼömö, ba sabu tödö, tobali ia sondröniaʼö yaʼira. So mato 400 niha zi fao khönia.
3 Aefa daʼö, mofanö Dawido moroi ba daʼö isawa Misefe ba Moabi, ba imane khö razo Moabi,+ ”Tehegö toröi ba daʼa khöu namagu faoma inagu irege uʼila hadia nifalua Lowalangi khögu.”
4 Andrö wa iröi ira khö razo Moabi, ba toröi ira ba daʼö sagötö feʼaso Dawido ba narö gara.+
5 Imane samaʼeleʼö sotöi Gado+ khö Dawido, ”Böi iagö manö narö gara. Hetaʼö ba daʼö, ofanö ba mbanua Yehuda.”+ Mofanö Dawido ofeta ia ba gatua Hereti.
6 Irongo Saulo wa no lasöndra Dawido hegöi niha sato si fao khönia. Me luo daʼö, no modao-dao Zaulo ba Gibea+ ba narö geu damarika si so ba nahia salawa. No igogohe doho ba no lafasui ia ira sawuyunia.
7 Imane Saulo khö ndra sawuyunia si so ba zi fasuinia, ”Mifondrondrongo yaʼami niha Mbeniami. Hadia ibeʼe khömi fefu nowi awö kabu nagu ono Gizaʼi+ andrö? Hadia ifataro ami tobali kumandru zi saribu ba kumandru zi daotu?+
8 No hasara dödömi ba wolawa yaʼo! Lö samatunö khögu me fawuʼu li nonogu khö nono Gizaʼi daʼö!+ Samösa lö hadöi ba gotaluami soʼameʼegö tödö yaʼo, ba sangombakha khögu wa no hasara dödö nonogu khö zawuyugu andrö ba wamaʼala yaʼo, simane salua iadaʼa.”
9 Imane Doegi+ niha Gedomo andrö nifataro ba daʼö ba wondröniaʼö sawuyu Zaulo,+ ”No uʼila nono Gizaʼi daʼö, möi ia ba Nobi khö Gahimelekhi ono Gahitobi.+
10 No iʼandrö wanuturu lala Ahimelekhi khö Yehowa, aefa daʼö ibeʼe zoguna khönia. Iʼamualagö nasa wöda Goliato niha Wilisiti andrö.”+
11 Iʼanemaiʼö ifatenge niha Razo ba wogaoni Ere Ahimelekhi ono Gahitobi ba fefu gere ba nösi nomo namania si so ba Nobi. Börö daʼö, möi ira fefu laʼondrasi Razo.
12 Imane Saulo, ”He ono Gahitobi, uʼandrö khöu fondrondrongo!” Imane Ahimelekhi, ”Lau Pa.”
13 Imane Saulo, ”Hana wa no hasara dödömi khö nono Gizaʼi andrö ba wolawa yaʼo, mibeʼe khönia roti ba föda, ba miʼandrö wanuturu lala moroi khö Lowalangi ba zoguna khönia? Ilawa ndraʼo ba iʼalui lala ba wamaʼala yaʼo simane salua iadaʼa.”
14 Imane Ahimelekhi khö Razo, ”Haniha ba gotalua zawuyumö si tola mufaduhusi tödö* simane Dawido?+ Yaʼia andrö umönö Razo,+ kumandru zaradadu, ba niha nifosumange ba gödo razo.+
15 Hadia awena ba daʼa uʼandrö wanuturu lala khö Lowalangi ba zoguna khönia?+ Lö duhu uʼoʼö niwaʼömö! Böi lau khögu hadia ia ba simanö göi ba nösi nomo namagu, börö me lö aboto ba dödögu daʼa fefu.”+
16 Imane Razo, ”Si mate saʼae ndraʼugö+ Ahimelekhi, yaʼugö ba fefu nösi nomo namau.”+
17 Imane Razo khö ndra sanaro* ba zi fasuinia, ”Mibunu fefu gere Yehowa andre, börö me no faʼawö ira khö Dawido! No laʼila wa nigohi-gohi ia ba lö lafatunö khögu!” Hizaʼi, lö lahalö tangara ira sawuyu Razo andrö ba wamunu fefu gere Yehowa.
18 Ba mohede Razo khö Doegi+ imane, ”Yaʼugö bunu ndra ere daʼö!” Ifalua daʼö Doegi niha Gedomo andrö,+ ba so 85 niha nibununia ba zi maʼökhö daʼö, samake nukha gere* nifazökhi moroi ba nukha si sökhi.+
19 Isuwö göi Nobi,+ banua ndra ere andrö faoma föda. Ira matua hegöi ira alawe, iraono ba ono sawuyu, sawi, kalide, biri-biri, ibunu fefu faoma föda.
20 Hizaʼi, aefa samösa nono Gahimelekhi ono Gahitobi sotöi Abiataro,+ moloi ia ba iʼoʼö Dawido.
21 Imane Abiataro khö Dawido, ”No ibunu fefu gere Yehowa andrö Saulo.”
22 Imane Dawido khö Gabiataro, ”Me luo daʼö,+ no uʼila wa so ba daʼö Doegi niha Gedomo andrö ba hasambalö ifatunö khö Zaulo. Yaʼo zoluʼi faʼamate niha sato ba nösi nomo namau.
23 Böi röi ndraʼo. Böi ataʼufi, ulumöʼö ndraʼugö. Haniha zedöna mamunu yaʼugö, no göi edöna ibunu ndraʼo.”+
Nisura ba gahe zura
^ Mazui ”si lö faröi”.
^ Sin.: ”si fagohi”.
^ Mazui ”efod”. Daʼa mbaru sebua si so tanö föna ba tanö furi.
