Sara Samueli 24:1-22
24 Me no mangawuli Zaulo ba wolohi niha Wilisiti, lafatunö khönia, ”Ba Danö si Mate Nengedi so Dawido.”+
2 Börö daʼö, möi Zaulo ba wangalui Dawido awö zaradadunia, iʼohe 3.000 niha nifili moroi ba ndraono Gizaraʼeli. Laʼalui ia ba gahe hili sokara, ba nahia nambi hili.
3 Ofeta Zaulo ba kandra mbiri-biri* ba zinga lala, so ba daʼö dögi narö hili. Ba möi bakha ba daʼö Zaulo waniboʼö si taʼunönia.* Furi dögi narö hili daʼö so Dawido awö ndra saradadunia, no modao-dao ira.+
4 Lamane ono bua Dawido, ”Maʼökhö andre alua niwaʼö Yehowa khömö, ’Ubeʼe ba dangau nudumö,+ ba tola öfalua khönia gofu hadia ia zomasiʼö.’” Andrö, ikumo-kumo ia Dawido ba möi itaba gahe mbaru Zaulo sanau si lö taʼio.
5 Me no aefa ifalua daʼö Dawido, itegu-tegu ia tödönia side-ide+ börö me no itaba gahe mbaru Zaulo sanau si lö taʼio.
6 Imane ba nono buania, ”Lö duhu ufalua daʼa khö zokhö yaʼo na dali wamaigi Yehowa, börö me nibayoini Yehowa ia. Lö uhalö tangagu wamunu yaʼia börö me nibayoini Yehowa ia.”+
7 Itaha* nono buania Dawido faoma fehedenia ba lö itehegö khöra ba wamunu Saulo. Mofanö Zaulo moroi ba dögi narö hili andrö.
8 Möi baero Dawido moroi ba dögi narö hili andrö ba muʼao ia khö Zaulo, ”He Razo!”+ Me ifaigi furi Saulo, mangalulu Dawido ifalögu ia tou ba danö.
9 Imane Dawido khö Zaulo, ”Hana wa faduhu dödömö ba niha sangumaʼö, ’Edöna ifaʼala ndraʼugö Dawido?’+
10 No öʼila samösa maʼökhö andre hewisa Yehowa wameʼe yaʼugö ba dangagu. Hizaʼi, me so niha sangumaʼö khögu ba wamaʼala yaʼugö,+ ahakhö dödögu ndraʼugö ba umane, ’Lö uhalö tangagu wamunu sokhö yaʼo börö me nibayoini Yehowa ia.’+
11 Faigi atö gahe mbarumö sanau si lö taʼio si no ugogohe andre Pa. Me utaba daʼa, lö ubunu ndraʼugö. Iadaʼa, no öʼila samösa ba aboto ba dödöu wa lö tödögu wamaʼala hegöi ba wolawa yaʼugö,+ ba lö nifaluagu khöu horö. Hizaʼi, ögohi ba edöna öbunu ndraʼo.+
12 Yehowa zi tobali sanguhuku ba gotaluada,+ ba Yehowa dania zanulöni nifaluamö khögu.+ Hizaʼi, lö uhalö tangagu ba wolawa yaʼugö.+
13 So gamaedola niha me föna, ’Kalua zi lö sökhi moroi ba niha si lö sökhi,’ hizaʼi, lö uhalö tangagu ba wolawa yaʼugö.
14 Haniha niraʼu razo ndraono Gizaraʼeli irege möi ia baero? Haniha nigohimö? Hadia tenga ha sageu asu si mate ndraʼodo andre, ba utu si ha sambua?+
15 Yehowa zi tobali sanguhuku, ba yaʼia zanguhuku yaʼo hegöi yaʼugö. Yaʼia zi faʼawö ba zalua khögu,+ sanguhuku yaʼo, ba sangefaʼö yaʼo moroi ba dangamö.”
16 Me no awai ifaʼema wehedenia Dawido, imane Saulo, ”Hadia yaʼugö zi hede daʼö onogu Dawido?”+ Ba iduhugö wege-ege Saulo.
17 Imane khö Dawido, ”Yaʼugö zatulö, yaʼodo zi sala. Sökhi gamuatamö khögu, hizaʼi usulöni khöu faoma si lö sökhi.+
18 Maʼökhö andre no öforomaʼö khögu waʼasökhi dödöu, lö öbunudo me ilulu ndraʼo Yehowa ba dangau.+
19 Hadia so niha sangefaʼö si faʼudu khönia na falukha ira? Yehowa zanulöni khöu faoma si sökhi+ ba ngawalö nifaluamö khögu maʼökhö andre.
20 Aboto ba dödögu iadaʼa wa hasambalö mamatörö ndraʼugö tobali razo,+ ba lö tebulö ba dangamö wamatörö ndraono Gizaraʼeli.
21 Iadaʼa, aeʼe khögu ba hölu ba döi Yehowa+ wa lö öhori ngaʼötögu mazui öheta döigu moroi ba nösi nomo namagu.”+
22 Börö daʼö möi ba hölu Dawido khö Zaulo, aefa daʼö mangawuli Zaulo.+ Hizaʼi, Dawido hegöi ono buania möi ira miyawa ba naha wamini ba narö gara.+
Nisura ba gahe zura
^ Tefazökhi gandra daʼa moroi ba gara.
^ Sin.: ”mombalugö ahenia”.
^ Mazui te ”Ifofanö”.
