Sara Samueli 26:1-25
26 Aefa daʼö, tohare niha Zifi+ laʼondrasi Zaulo ba Gibea+ ba lamane, ”Hadia tenga no ibiniʼö ia Dawido ba Hili Hakhila sangotahögö Yesimono?”*+
2 Ba mofanö Zaulo ba Danö si Mate Zifi,+ fao ia khö ndra saradadu si 3.000 niha nifili moroi ba Gizaraʼeli ba wangalui Dawido.
3 Ifazökhi nosenia Saulo ba Hili Hakhila sangotahögö Yesimono ba zinga lala. Me luo daʼö, ba danö si mate toröi Dawido ba no irongo wa möi Zaulo ba danö si mate andrö wangalui yaʼia.
4 Börö daʼö, ifatenge zamauze Dawido ba wotatugöi hadia sindruhu tohare Zaulo mazui löʼö.
5 Aefa daʼö, möi Dawido ba nose Zaulo ba iʼila naha wemörö Zaulo faoma kumandrunia sotöi Abineri+ ono Neri. No mörö Zaulo ba nosenia, simanö göi ndra saradadunia ba zi fasuinia.
6 Manofu Dawido khö Gahimelekhi banua Kheti+ faoma Abizaʼi+ ono Zeruya,+ talifusö Yoabi, ”Haniha zi fao khögu weʼamöi mitou ba nose Zaulo?” Imane Abizaʼi, ”Faodo awöu.”
7 Ba zi bongi daʼö, möi Dawido faoma Abizaʼi ba nose andrö ba me larugi, no mörö Zaulo. Tanö ba lulunia so doho si no tetaru ba danö, ba no mörö Gabineri faoma saradadunia ba zi fasuinia.
8 Imane Abizaʼi khö Dawido, ”Maʼökhö andre no ibeʼe ba dangamö zi faʼudu khöu Lowalangi.+ Tehegö khögu ba wanaruʼö yaʼia tou ba danö faoma toho, sakali manö, lö saʼae ufomendrua.”
9 Imane khönia Dawido, ”Böi babaya ia, haniha zi lö fasala na ifazawa dangania ba wamunu niha nibayoini Yehowa?”+
10 Itohugö wangumaʼö Dawido, ”Faya wa no sauri Yehowa na tenga Yehowa dania zamözi yaʼia,+ mazui na lö mate ia ba ginötönia,+ mazui na lö labunu ia ba wasuwöta.+
11 Lö duhu ufalua daʼa ba niha nibayoini Yehowa na dali wamaigi Yehowa!+ Iadaʼa, halö doho si so ba lulunia, awö naha gönia idanö, ba mofanö ita.”
12 Ihalö doho andrö Dawido awö naha nidanö si so ba lulu Zaulo ba mofanö ira. Lö sangila yaʼira+ ba samösa lö si maoso börö me ibeʼe khöra Yehowa wemörö sabölö-bölö.
13 Lö ara, mofanö Dawido miyefo ba mosindro ia ba zuzu hili tanö böʼö si fandröndröu maʼifu.
14 Muʼao Dawido khö Gabineri+ ono Neri hegöi khö ndra saradadunia imane, ”He Abineri, tema ligu!” Imane Abineri, ”Haniha ndraʼugö daʼö siʼao khö Razo?”
15 Imane Dawido khö Gabineri, ”Hadia tenga ira matua ndraʼugö, ba lö simane yaʼugö ba Gizaraʼeli? Hana wa lö özago Razomö? So mege zaradadu si tohare ba wamunu Razomö.+
16 Lö miʼodödögö halöwömi. Faya wa no sauri Yehowa na lö mate ami börö me lö mizago Razomi si no ibayoini Yehowa.+ Faigi atö, hezo doho Razo awö naha gönia idanö+ si so mege ba lulunia?”
17 Irongo Saulo wa li Dawido daʼö ba manofu ia, ”Hadia yaʼugö daʼö onogu Dawido?”+ Imane Dawido, ”Yaʼia Pa, yaʼodo daʼa.”
18 Imane nasa Dawido, ”Hana wa ögohi-gohi zawuyumö andre Pa?+ Hadia zi no ufalua? Hadia horögu?+
19 Uʼandrö khöu Pa, fondrondrongo wehede zawuyumö andre. Na Yehowa zamarou yaʼugö ba wolohi yaʼo, ubeʼe khönia zumange niʼa.* Hizaʼi, na niha zamarou yaʼugö,+ niʼelifi ira föna Yehowa börö me no lafabali ndraʼo ba nono mbanua* Yehowa,+ hulö na lamane khögu, ’Ofanö, fosumange lowalangi böʼö!’
20 Börö daʼö, böi tehegö teduwagö ndrogu ba danö fandröndröu föna Yehowa. No möi baero razo ndraono Gizaraʼeli ba wangalui utu si ha sambua,+ hulö zolohi manu danö ba hili.”
21 Imane Saulo, ”No fasala ndraʼo.+ Angawuli onogu Dawido. Lö ufaʼala ndraʼugö saʼae börö me ebua mböli nosogu ba wamaigiu.+ Sindruhu wa no ufalua horö sebua ba amuata faʼabodo.”
22 Imane Dawido, ”Ba daʼa so dohomö Razo. Fatenge niha wangai.
23 Yehowa zanulöni ba niha zamösana, moloʼö faʼadölö dödö+ ba faʼalöfaröi dozi niha. Maʼökhö daʼa, no ibeʼe ndraʼugö ba dangagu Yehowa, hizaʼi lö omasido ufazawa dangagu ba wamunu niha nibayoini Yehowa.+
24 Simane faʼebua mböli nosomö maʼökhö ba wamaigigu, simanö göi waʼebua mböli nosogu ba wamaigi Yehowa. Ba yaʼiʼefaʼö ndraʼo ba gabula dödögu.”+
25 Imane Saulo khö Dawido, ”Yatefahowuʼö ndraʼugö onogu Dawido. Hasambalö wa öfalua zahöli-höli dödö ba mofozu nifaluamö.”+ Mofanö Dawido ba mangawuli Zaulo.+
Nisura ba gahe zura
^ Mazui te ”tanö si lö niha-niha; tanö si mate”.
^ Mazui ”tana khö”.
^ Mazui ”zumange bua nowi”.
