Sara Samueli 27:1-12
-
Labe’e khö Dawido mbanua Zikelagi ira niha Wilisiti (1-12)
27 Imane tödönia Dawido, ’Samuza maʼökhö dania, matedo ba danga Zaulo. Abölö sökhi na moloido+ ba mbanua niha Wilisiti enaʼö iböhöli wangalui yaʼo Saulo ba zi sagörö tanö Gizaraʼeli+ ba teʼefaʼö ndraʼo ba dangania.’
2 Börö daʼö, mofanö Dawido, fao khönia nono buania si 600 niha+ ba möi ira khö Gakhisi+ ono Maʼokhi, razo Gata.
3 Toröi Dawido khö Gakhisi ba Gata, simanö göi nono buania si no molohe ösi nomora zamösana. Fao göi khö Dawido woʼomonia si darua, yaʼia daʼö Ahinoa+ niha Yezereʼeli ba Abigaila+ niha Garimeli si no irai tobali foʼomo Nabalo mböröta.
4 Me irongo wa no moloi Dawido ba Gata, iböhöli wangalui yaʼia Saulo.+
5 Imane Dawido khö Gakhisi, ”Na lö fatimba khöu, beʼe khögu zambua naha nomo ba mbanua side-ide. Tenga sinangea toröi ndraʼo khöu ba daʼa, ba mbanua razo.”
6 Me luo daʼö, ibeʼe khönia mbanua Zikelagi+ andrö Akhisi. Daʼö mbörö wa tobali okhöta ndra razo Yehuda Zikelagi andrö irugi maʼökhö.
7 Döfi a öfa waŵa toröi Dawido ba mbanua niha Wilisiti.+
8 No toʼölö fasuwö Dawido awö ndra saradadunia ba wolawa niha Gesuri,+ niha Girisi, ba niha Gamaleki,+ börö me toröi ndra niha daʼö iʼotarai mbanua Delama numalö ba Zuri+ ofeta si tou ba danö Miserai.
9 Me isuwö mbanua daʼö Dawido, lö itehegö auri zamösa ndra matua mazui ira alawe.+ Ihalö nambi, biri-biri, sawi, kalide, ondra hegöi nukha. Aefa daʼö mangawuli ia khö Gakhisi.
10 Me manofu Gakhisi, ”Hezo manö mbanua nisuwöu maʼökhö andre?” imane Dawido, ”Banua tanö raya* Yehuda,”+ mazui, ”Banua tanö raya niha Yerameli,”+ mazui, ”Banua tanö raya niha Geni.”+
11 Samösa lö itehegö Dawido na so zauri ira matua hegöi ira alawe, enaʼö lö hadöi niʼohe ba Gata. Imane, ”Böi so zangombakha yaʼita ba lamane, ’Simane daʼa nifalua Dawido.’” Daʼö nifalua Dawido sagötö feʼasonia ba mbanua niha Wilisiti.
12 Faduhu dödö Gakhisi khö Dawido. Imane tödönia, ’Tatu manö fatuwu ndraono Gizaraʼeli khönia, na simanö lö tebulö tobali ia sawuyugu.’
Nisura ba gahe zura
^ Mazui ”Negebi”.
