Sara Samueli 28:1-25
-
Möi Zaulo ba mbanua Geni-dora ba wamalukhaisi zogaoni bekhu niha si no mate (1-25)
28 Samuza maʼökhö, laʼowuloi ndra saradadura ira niha Wilisiti ba wanuwö iraono Gizaraʼeli.+ Imane Akhisi khö Dawido, ”Tatu manö öʼila wa fao ndraʼugö khögu hegöi ira saradadumö ba wasuwöta.”+
2 Imane Dawido khö Gakhisi, ”Aboto ba dödöu hadia nifalua zawuyumö andre.” Imane Akhisi, ”Daʼö mbörö wa ufataro ndraʼugö ba wozago yaʼo sagötö faʼaurigu.”+
3 Me luo daʼö, no mate Zamueli ba laʼeʼesi ia iraono Gizaraʼeli maʼafefu ba lakoʼo ia ba Rama, banua si tumbu yaʼia.+ Fefu zogaoni bekhu niha si no mate ba samaʼeleʼö ba soi daʼö, no ahori ibunu ira Saulo.+
4 Owulo ndra saradadu niha Wilisiti ba lafazökhi nosera ba Zunema,+ daʼö mbörö wa iʼowuloi fefu zaradadu ndraono Gizaraʼeli Saulo, ba lafazökhi nosera ba Giliboa.+
5 Me iʼila Saulo zaradadu niha Wilisiti, ataʼu ia ba manizi dödönia.+
6 Hewaʼae manofu Zaulo khö Yehowa+ ba lö irai itema linia Yehowa ba wangifi, ba Gurimi,+ mazui khö ndra samaʼeleʼö.
7 Andrö wa imane Saulo khö ndra sawuyunia, ”Miʼalui khögu ndra alawe si tola mogaoni bekhu niha si no mate+ ba möido khönia ba wangandrö fanuturu lala.” Lamane khönia, ”So samösa ndra alawe ba Geni-dora si tola mogaoni bekhu niha si no mate.”+
8 Ifake nukha tanö böʼö Saulo faböi oroma wa yaʼia daʼö ba weʼamöi khö ndra alawe andrö. Fao khönia darua nono buania ba zi bongi daʼö. Imane khö ndra alawe daʼö, ”Uʼandrö khöu, ogunaʼö waʼatua-tuamö ba wogaoni bekhu niha si no mate+ ba wanahö salua khögu ba zi so föna, ba kaoni khögu samösa nifatunögu khöu.”
9 Imane khönia ira alawe daʼö, ”Öʼila samösa zi no ifalua Saulo me no ahori ibunu fefu zogaoni bekhu niha si no mate hegöi samaʼeleʼö ba soi daʼa.+ Hana wa öfaʼala ndraʼo ba öbunudo?”+
10 Möi ba hölu Zaulo ba döi Yehowa. Imane, ”Faya wa no sauri Yehowa na fasala ndraʼugö ba zimane daʼa!”
11 Manofu khönia ndra alawe daʼö, ”Haniha nikaonigu?” Imane Saulo, ”Kaoni khögu Zamueli.”
12 Me iʼila ”Zamueli”,*+ muʼao ndra alawe daʼö ba imane khö Zaulo, ”Saulo ndraʼugö Pa! Hana wa ölimodo?”
13 Imane khönia Razo, ”Böi ataʼufi, hadia niʼilamö?” Imane ira alawe daʼö khö Zaulo, ”So zi hulö lowalangi moroi tou ba narö danö.”
14 Iʼanemaiʼö manofu Zaulo, ”Hewisa nihania?” Imane ira alawe daʼö, ”Si möi baero andrö ira matua satua, no ifake mbaru sanau si lö taʼio.”+ Iʼila Saulo wa ”Samueli” daʼö ba mangalulu ia.
15 Aefa daʼö manofu ”Zamueli” khö Zaulo, ”Hana wa ökaoni ndraʼo ba öbusi dödögu?” Itema linia Saulo, ”So gabula dödögu sebua. Lasuwö ndraʼo ira niha Wilisiti, ba no iröi ndraʼo Lowalangi. Lö irai itema ligu ba wangifi mazui khö ndra samaʼeleʼö.+ Daʼö mbörö wa ukaoni ndraʼugö enaʼö uʼila hadia zinangea ufalua.+
16 Imane ”Samueli”, ”Na no iʼerogö ndraʼugö Yehowa ba tobali ia si faʼudu khöu,+ hadia guna wa manofu ndraʼugö khögu?
17 Hasambalö ifalua Yehowa zi no ifaʼeleʼö khögu: Yehowa zangeheta famatörö daʼa ba dangau ba ibeʼe ba niha böʼö yaʼia daʼö khö Dawido.+
18 Daʼö nifalua Yehowa khöu maʼökhö andre börö me lö öʼoʼö niwaʼö Yehowa ba lö öfalua wönunia si hola-hola ba niha Gamaleki.+
19 Ibeʼe göi ndraʼugö Yehowa hegöi iraono Gizaraʼeli ba danga niha Wilisiti.+ Fao ndraʼugö khögu mahemolu+ hegöi iraonomö matua.+ Ibeʼe göi Yehowa ndra saradadu Gizaraʼeli ba danga niha Wilisiti.”+
20 Iʼanemaiʼö tegaölö tou Zaulo ba ataʼu ia wamondrongo fehede ”Zamueli”. Baero daʼö, lö faʼabölönia saʼae börö me lö si manga ia sara luo sara wongi.
21 Me möi ndra alawe daʼö wamaigi Saulo, iʼila wa abu sibai dödönia. Imane, ”No ifalua sawuyumö andre hadia niwaʼömö. No utehegö nosogu+ ba uʼoʼö niwaʼöu.
22 Iadaʼa uʼandrö khöu, fondrondrongo wehede zawuyumö andre. Daʼufazökhi öu roti enaʼö abölö ndraʼugö wofanö ba lala.”
23 Hewaʼae simanö, lö omasi Zaulo. Imane, ”Lö omasido manga.” Hizaʼi, laforege wangumaʼö khönia ira sawuyunia hegöi ira alawe andrö. Ba gafuriata ifondrondrongo niwaʼöra. Maoso ia ba modadao ba naha wemörö.
24 So khö ndra alawe andrö sageu nono zawi satabö. Iʼaliokö wanaba, ihalö hamo darigu, ihaogö wamaruka, aefa daʼö ifaga tobali roti si lö mufaruka ragi.
25 Ifaʼanö fefu daʼö föna Zaulo hegöi föna ndra sawuyunia ba manga ira. Lö ara, mofanö ira ba zi bongi daʼö.+
Nisura ba gahe zura
^ Tenga sindruhu-ndruhu Samueli, hizaʼi malaʼika si lö sökhi sanagö ngaʼeu Zamueli.
