Sara Samueli 29:1-11
-
Lö faduhu dödö niha Wilisiti khö Dawido (1-11)
29 Laʼowuloi fefu ndra saradadura ira niha Wilisiti+ ba Gafeka. No lahaogö göi nosera iraono Gizaraʼeli ba zinga gumbu nidanö Yezereʼeli.+
2 Tohare ndra sondröniaʼö niha Wilisiti ladöniaʼö ngawawa si otu awö zi saribu, ba tanö furi so Dawido hegöi saradadunia fao ira khö Gakhisi.+
3 Hizaʼi, lamane ira sondröniaʼö niha Wilisiti, ”Hana wa fao ndra niha Heberaiʼo andre?” Imane Akhisi, ”Dawido daʼa, sawuyu Zaulo razo ndraono Gizaraʼeli andrö. No töra döfi toröi ia khögu.+ Iʼotarai wamobörö me fao ia khögu irugi maʼökhö, lö irai uʼila so zala nifaluania.”
4 Hizaʼi, mofönu ndra sondröniaʼö niha Wilisiti ba lamane, ”Fangawuli niha daʼö.+ Sökhi na mangawuli ia ba nahia si no öbeʼe khönia. Böi tehegö fao ia khöda ba wasuwöta. Ma tebulö dödönia ba ilawa ita dania.+ Hadia tenga no sambua lala si sökhi khönia ba wangomusoiʼö tödö zokhö yaʼia na ibunu zaradaduda?
5 Hadia tenga Dawido ia nihöni-höni niha andrö si fao fanunö,
’Ribu nibunu Zaulo,Ba ngafulu ribu nibunu Dawido’?”+
6 Börö daʼö, ifakaoniʼö Dawido andrö Akhisi+ ba imane khönia, ”Faya wa no sauri Yehowa na tenga niha sadölö tödö ndraʼugö ba omasido na fao ndraʼugö khögu weʼamöi fasuwö,+ börö me lö hadöi sala nifaluamö khögu iʼotarai me tohareʼö irugi maʼökhö.+ Hizaʼi, lö lafaduhusi tödö ndraʼugö ira sondröniaʼö.+
7 Börö daʼö, angawuli ba yaʼohahau dödöu. Böi alui lala wa mofönu ndra sondröniaʼö niha Wilisiti.”
8 Imane Dawido khö Gakhisi, ”Hana? Hadia zalagu? Iʼotarai me tohare ndraʼo khöu irugi maʼökhö, hadia so zalagu si no irai öʼila? Hana wa tebai fao ndraʼo khöu Pa ba wolawa udumö?”
9 Imane Akhisi khö Dawido, ”Ba wamaigigu, sindruhu wa sökhi sibai ndraʼugö hulö malaʼika Lowalangi.+ Hizaʼi, lamane ira sondröniaʼö niha Wilisiti, ’Böi tehegö fao ia khöda ba wasuwöta.’
10 Andrö, faoso mahemolu sihulö wongi ba fao khö ndra sawuyu sokhö yaʼugö, ba ofanö na ibörögö moluo.”
11 Sihulö wonginia, maoso Dawido hegöi ira saradadunia, mangawuli ira ba mbanua niha Wilisiti, ba mofanö niha Wilisiti ba Yezereʼeli.+
