Sara Samueli 3:1-21
-
Tobali sama’ele’ö Zamueli (1-21)
3 Ba mangai halöwö Zamueli+ khö Yehowa barö wamatörö Geli hewaʼae ide-ide ia nasa. Me luo daʼö, ha fawaraö na terongo daromali Yehowa hegöi angilata.+
2 Samuza maʼökhö, no mörö Geli ba mbateʼenia. No abösi hörönia ba lö iʼila niha saʼae.+
3 Lö nibunu wandru ba nomo Lowalangi+ ba no mörö Zamueli ba gosali*+ Yehowa ba naha Dawöla Lowalangi.
4 Lö ara, mohede Yehowa khö Zamueli, ba itema linia Samueli, ”Yaʼe ndraʼo.”
5 Fagohi ia wamalukhaisi Eli imane, ”Yaʼe ndraʼo Pa. Hana ökaonido?” Imane khönia Eli, ”Lö si hede ndraʼo khöu, ae fuli förö.” Mofanö Zamueli ba ifuli mörö ia.
6 Ifuli zui mohede khönia Yehowa, ”He Samueli!” Maoso Zamueli möi iʼondrasi Geli imane, ”Yaʼe ndraʼo Pa. Hana ökaonido?” Imane khönia Eli, ”Lö si hede ndraʼo khöu onogu, ae fuli förö.”
7 Lö saboto ba dödö Zamueli haniha Yehowa ba lö nifaʼeleʼö khönia daromali Yehowa.+
8 Ifuli zui mohede khönia Yehowa ba zi medölu kali, ”He Samueli!” Maoso Zamueli möi iʼondrasi Geli imane, ”Yaʼe ndraʼo Pa. Hana ökaonido?”
Awena aboto ba dödö Geli wa Yehowa zi hede khö nono daʼö.
9 Imane Eli khö Zamueli, ”Ae fuli förö. Na mohede ia khöu sakali tö ba ömane: ’Hede yaʼugö Yehowa, irongo enonimö andre.’” Börö daʼö, mofanö Zamueli ba ifuli mörö ia.
10 Lö ara, tohare Yehowa ba mozizio ia ba daʼö. Mohede ia simane mege, ”He Samueli, he Samueli!” Itema linia Samueli, ”Fahuhuo, irongo enonimö andre.”
11 Imane Yehowa khö Zamueli, ”So zedöna ufalua ba Gizaraʼeli, si tokea dalinga zamondrongo.*+
12 Ba luo daʼö, ufalua fefu zi no uwaʼö sanandrösa khö Geli awö nösi nomonia, iʼotarai wamobörö irugi zafuria.+
13 Böi zi lö öfatunö khönia wa uhuku dania nösi nomonia sagötö faʼara, börö golalöwa si no anehe ia.+ Laʼelifi Lowalangi iraononia,+ hizaʼi lö mofönu ia khöra.+
14 Daʼö mbörö wa möido ba hölu ba nösi nomo Eli wa tebai muʼefaʼö zala nifaluara hewaʼae labeʼe zumange nitunu mazui sumange tanö böʼö.”+
15 Mörö Zamueli irugi moluo, aefa daʼö ibokai fefu mbawandruhö nomo Yehowa. Ataʼu Zamueli wamatunö angilata andrö khö Geli.
16 Hizaʼi imane Eli khö Zamueli, ”He onogu Samueli!” Itema linia Samueli, ”Yaʼe ndraʼo Pa.”
17 Manofu Geli, ”Hadia goroisania khöu? Uʼandrö khöu, böi biniʼö khögu. Ötema wanguhuku sabölö-bölö moroi khö Lowalangi na öbiniʼö khögu zambua fehede niʼoroisinia khöu.”
18 Börö daʼö, ifatunö khönia fefu Samueli, lö ibiniʼö zambua fehede. Imane Eli, ”Ohitö dödö Yehowa daʼö. Yaʼifalua zi sökhi ba wamaiginia.”
19 Itugu tedou waʼebua-bua Zamueli ba fao khönia Yehowa,+ ba gofu hadia wehedenia hasambalö itörö.*
20 Fefu ndraono Gizaraʼeli iʼotarai Dano irugi Mbere-seba, laʼila wa no tefili Zamueli tobali samaʼeleʼö khö Yehowa.
21 Lö iböhöli Yehowa weʼamöi ba Zilo ba lö aetu ifaʼeleʼö ia Yehowa khö Zamueli, iʼogunaʼö daromali Yehowa.+
Nisura ba gahe zura
^ Eluahania ose Lowalangi.
^ Mazui ”afökhö dania dalinga zamondrongo”.
^ Sin.: ”lö ibeʼe aekhu ba danö”.
