Sara Samueli 30:1-31
30 Ba ngaluo si tölu, ofeta Dawido hegöi ono buania ba Zikelagi.+ No larabu mbanua tanö raya* ira niha Gamaleki.+ Lasuwö göi Zikelagi ba latunu.
2 Laʼoloiʼö ndra alawe+ ba fefu zi so ba daʼö, sebua hegöi side-ide. Laʼohe fefu ba lö nibunura.
3 No akhozi mbanua daʼö me irugi Dawido hegöi ono buania. No göi teʼoloiʼö woʼomora ira alawe awö ndraonora.
4 Daʼö mbörö wa abölö-bölö sibai weʼe Dawido awö ndraono buania irege tebai saʼae meʼe ira.
5 No göi laʼoloiʼö woʼomo Dawido si darua, Ahinoa niha Yezereʼeli ba Abigaila si no irai tobali foʼomo Nabalo niha Garimeli andrö.+
6 Abu sibai dödö Dawido börö me edöna latebu ia kara iraono buania. Mofönu sibai ira börö me no laʼoloiʼö ndraonora matua hegöi onora alawe. Hizaʼi, iʼabölöʼö ia Dawido moroi ba wanolo Yehowa Lowalanginia.+
7 Imane Dawido khö Gere Abiataro+ ono Gahimelekhi, ”Uʼandrö khöu, ohe ba daʼa nukha gere* andrö.”+ Möi Gabiataro wamasao khö Dawido.
8 Manofu Dawido khö Yehowa,+ ”Hadia abölö sökhi na ugohi niha sorabu andrö? Hadia ukhamö ira?” Imane Lowalangi, ”Gohi ira, hasambalö wa tola ökhamö ba ifuli möi khöu fefu zi no larabu.”+
9 Iʼanemaiʼö mofanö Dawido ba fao khönia nono buania si 600 niha,+ numalö ira ba Ndraso Mbezori ba so ösa nono buania si tetaha ba daʼö.
10 Itohugö wolohi si faʼudu khönia Dawido, iʼohe nono buania si 400, hizaʼi so 200 nono buania si lö fao börö me marase sibai ira ba wangötö Daso Mbezori.+
11 Ba dalu lala, falukha ira samösa ndra matua Miserai ba mbenua ba laʼohe ia khö Dawido. Labeʼe gönia ba lafabadugö khönia nidanö.
12 Labeʼe önia sambua kue nifaruka bua ara soköli ba dombua kue nifaruka bua nagu.* Me no aefa manga ia, ifuli abölö ia börö me no tölu hari lö si manga ia ba lö samadu idanö.
13 Manofu khönia Dawido, ”Haniha zokhö yaʼugö ba hezo öʼotarai?” Imane niha daʼö, ”Yaʼodo niha Miserai, sawuyu niha Gamaleki. Iröi ndraʼo sokhö yaʼo börö me mofökhödo tölu hari silalö.
14 No marabu mbanua tanö raya* niha Gereti,+ banua Yehuda hegöi banua tanö raya* Galebi.+ Matunu nasa Zikelagi.”
15 Imane Dawido, ”Uʼandrö khöu, fasao ndraʼaga khö ndra niha sorabu andrö.” Imane niha daʼö, ”Ufasao ndraʼugö khöra asala möiʼö ba hölu khögu ba döi Lowalangi, wa lö öbunu ndraʼo mazui öbeʼe ndraʼo ba danga zokhö yaʼo.”
16 Börö daʼö, ifasao ira khö ndra niha sorabu andrö si no muzawili, manga, mamadu, molau owasa börö waʼoya zi no larabu moroi ba mbanua niha Wilisiti faoma Yehuda.
17 Aefa daʼö, ibunu ira Dawido iʼotarai sihulö wongi me ogömi-gömi nasa ofeta bongi. Lö hadöi soloi,+ baero zi 400 niha si fakudo ba gondra.
18 Ifuli mangawuli khö Dawido fefu zi no larabu ira niha Gamaleki+ ba iʼefaʼö göi woʼomonia si darua.
19 Lö hadöi okhötara si taya, iʼotarai ba zide-ide ofeta zebua. Ifuli mangawuli khöra ndraonora matua ba onora alawe hegöi gama-gama si no larabu.+ Mangawuli khö Dawido fefu zi no larabu andrö.
20 Ihalö fefu nambi, biri-biri ba sawi, ba laʼohe daʼö iraono buania föna guriföra samösa. Lamane, ”Yaʼe nirabu Dawido.”
21 Aefa daʼö, mangawuli Dawido möi ia ifaigi niha si 200 si toröi ahatö ba Ndraso Mbezori,+ si no marase sibai wefao khönia. Tohare ira ba wamalukhaisi Dawido awö niha si fao khönia. Me ahatö irugi Dawido ba zi so yaʼira, isofu hewisa ira.
22 Hizaʼi, dozi niha si lö sökhi ba si lö karua si fao khö Dawido lamane, ”Börö me lö omasi fao ira khöda, böi beʼe dana khöra moroi ba zi no tarabu mangawuli. Awai zi tola lahalö ha iraono ba foʼomora zamösana, aefa daʼö akha lalau mofanö.”
23 Imane Dawido, ”He ira talifusögu, böi mifalua zimane daʼö ba zi no tarabu nibeʼe Yehowa khöda. No ilumöʼö ita ba ibeʼe ba dangada niha sorabu andrö sanuwö yaʼita.+
24 Haniha zi fao tödö khömi? Hawaʼebua dana khö zi möi fasuwö, simanö göi waʼebua dana khö zanarogö gama-gama.+ Fagölö-gölö fefu gurakha nitemada.”+
25 Iʼotarai daʼö, ifoʼahonoa daʼö Dawido tobali amakhoita hegöi huku ba ndraono Gizaraʼeli irugi maʼökhö.
26 Me mangawuli Dawido ba Zikelagi, ifaʼoheʼö ösa nirabu andrö khö ndra sondröniaʼö ba Yehuda si faʼawö khönia. Imane, ”Yaʼe mbualagu* khömi, nirabu moroi ba zi faʼudu khö Yehowa.”
27 Ifaʼoheʼö daʼö ba niha si so ba Mbetieli,+ ba Ramoti tanö raya* ba Yatiri,+
28 ba Naroeri, ba Zifimoti, ba Gesemoa,+
29 ba Rakala, ba mbanua niha Yarameli,+ ba mbanua niha Geni,+
30 ba Horama,+ ba Mborasa, ba Gatakhi,
31 ba Heberona+ ba fefu mbanua sasese möi Dawido awö ndra saradadunia.
Nisura ba gahe zura
^ Mazui ”Negebi”.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”kue kismis”.
^ Mazui ”Negebi”.
^ Mazui ”Negebi”.
^ Sin.: ”howu-howu”.
^ Mazui ”Negebi”.
