Sara Samueli 4:1-22
4 Lö iböhöli Samueli wamaʼema oroisa Lowalangi ba ndraono Gizaraʼeli maʼafefu.
Aefa daʼö, fasuwö ndraono Gizaraʼeli, lalawa niha Wilisiti. Lafazökhi nosera ba zi tambai Gebenihaezeri, ba lafazökhi göi nosera niha Wilisiti ba Gafeka.
2 Lafaʼoli ira ba wasuwöta ira niha Wilisiti ba wolawa iraono Gizaraʼeli. Abölö-bölö sibai wasuwöta daʼö irege kala ndraono Gizaraʼeli ba danga niha Wilisiti ba labunu mato 4.000 ndraono Gizaraʼeli ba wasuwöta andrö.
3 Me mangawuli ndra saradadu ba nose, lamane ira sondröniaʼö iraono Gizaraʼeli, ”Hana wa itehegö kala ita maʼökhö Yehowa ba danga niha Wilisiti?+ Dataʼohe dawöla amabuʼula li Yehowa moroi ba Zilo+ enaʼö fao khöda dawöla andrö ba iʼefaʼö ita moroi ba danga nudu.”
4 Börö daʼö, lafatenge niha ba Zilo ba lahalö dawöla amabuʼula li khö Yehowa samatörö saradadu zorugo andrö si dadao yawa* ndra kerubi.+ So göi ba daʼö ndraono Eli si darua sotöi Hofini ba Fineha,+ fao ira ba wolohe tawöla amabuʼula li Lowalangi sindruhu.
5 Me ofeta ba nose dawöla amabuʼula li Yehowa, ebua li ndraono Gizaraʼeli weʼao irege modögö danö.
6 Me larongo li siʼao andrö ira niha Wilisiti lamane, ”Hana wa so ziʼao-ao ba nose niha Heberaiʼo?” Awena laʼila wa no laʼohe ba nose andrö Dawöla Yehowa.
7 Ataʼu niha Wilisiti ba lamane, ”No tohare Lowalangi ba nosera!”+ Lamane nasa, ”Awai khönia ita saʼae, lö irai alua daʼa ba zilalö!
8 Awai khönia ita saʼae! Haniha zangefaʼö yaʼita moroi ba danga Lowalangi sabölö andrö? Lowalangi daʼa mböröta zamunu niha Miserai me iʼasogö ngawalö wamakao ba danö si mate.+
9 Yaʼami niha Wilisiti, böi miʼataʼufi, miforomaʼö wa ira matua ami, enaʼö lö tobali ami sawuyu niha Heberaiʼo simane me miʼosawuyu ira.+ Miforomaʼö wa ira matua ami ba misuwö ira!”
10 Fasuwö niha Wilisiti ba kala ndraono Gizaraʼeli+ irege moloi ira ba nosera zamösana. Ato sibai zi mate. So 30.000 zaradadu si mate ba ndraono Gizaraʼeli sanörö tanö.
11 Baero daʼö, larabu Dawöla Lowalangi ba mate ndraono Eli si darua, Hofini ba Fineha.+
12 So samösa ndra matua mado Mbeniami zoloi moroi ba wasuwöta, ba ofeta ia ba Zilo maʼökhö daʼö. No asika mbarunia ba no fatambu högönia.+
13 Me ofeta ia, no modao-dao Geli ba gurusi ba zinga lala, ibase-baseʼö börö me so so dödönia Dawöla Lowalangi sindruhu.+ Möi yomo niha daʼö ba mbanua ba ifatunö zalua, ba ibörögö moʼira niha sato ba daʼö.
14 Me irongo oi zara moʼira niha sato, manofu Geli, ”Hana wa kaliru sibai?” Iʼaliokö ia niha daʼö wangondrasi Eli ba ifatunö hadia zalua.
15 Me luo daʼö, 98 fakhe ndröfi Eli. Lö maliwa saʼae nono hörönia ba lö iʼila niha.+
16 Imane niha daʼö khö Geli, ”Yaʼodo uʼotarai fasuwö! Soloi ndraʼodo andre moroi ba daʼö.” Manofu khönia Geli, ”Hadia zalua onogu?”
17 Imane solohe turia andrö, ”No moloi ndraono Gizaraʼeli labeʼe ira niha Wilisiti, ba kala ira.+ Onomö si darua, Hofini ba Fineha no mate,+ ba no laʼoloiʼö Dawöla Lowalangi sindruhu.”+
18 Me itötöi niha andrö Dawöla Lowalangi sindruhu, alabu Geli, toböʼa ia furi ba gurusinia ba mbawa göli. Afatö mbagi ba mate ia börö waʼatua ba esolo sibai ia. Tobali ia sanguhuku ba Gizaraʼeli 40 fakhe waʼara.
19 Manabina numönönia foʼomo Wineha ba arakhagö moʼono. Me irongo wa no laʼoloiʼö Dawöla Lowalangi sindruhu, ba no mate namania matuania awö woʼomonia, tegaölö ia tou ba moʼono.
20 Me atata dölania, lamane ira alawe si zizio ba zingania, ”Böi busi dödöu no tumbu nonomö ono matua.” Lö ifaigi-faigi ba no ahono manö ia.
21 Ibeʼe töi nono andrö Ikabodi.*+ Imane, ”No taya lakhömi Gizaraʼeli no laʼohe ba wangosawuyu,”+ börö me no laʼoloiʼö Dawöla Lowalangi sindruhu ba börö zalua khö namania matuania hegöi foʼomonia.+
22 Imane, ”No taya lakhömi Gizaraʼeli no laʼohe ba wangosawuyu, börö me no laʼoloiʼö Dawöla Lowalangi sindruhu.”+
