Sara Samueli 5:1-12
5 Me no laʼoloiʼö ira niha Wilisiti Dawöla Lowalangi sindruhu,+ laʼohe moroi ba Gebenihaezeri numalö ba Gasoto.
2 Laʼohe ira niha Wilisiti Dawöla Lowalangi sindruhu andrö ba gosali Dagono ba lafedadao ba zinga Dagono.+
3 Me maoso niha Gasoto sihulö wonginia, laʼila wa no asoʼa Dagono, telögu tou mbawania ba danö föna Dawöla Yehowa.+ Ba lafasindro Dagono andrö, lafuli ia ba nahiania.+
4 Me ifuli zui maoso ira sihulö wongi aefa daʼö, no ifuli asoʼa Dagono, telögu tou mbawania ba danö föna Dawöla Yehowa. No ateu högö ba afatö laluʼa dangania si dua rozi, tegaölö ba zinga mbawandruhö. Hatö ndroto-ndrotonia si hulö giʼa* zi toröi.
5 Daʼö mbörö wa irugi maʼökhö, na möi ndra ere hegöi niha sato ba gosali Dagono, lö lahundragö zalo sahatö ba mbawandruhö gosali Dagono ba Gasoto.
6 Ihuku niha Gasoto Yehowa faoma tangania ba idudugö Gasoto awö mbanua ba zi fasuinia, ibeʼe khöra wökhö faʼaböla hogo.*+
7 Me laʼila zalua, lamane ira niha Gasoto, ”Böi mibeʼe ba daʼa khöda Dawöla Lowalangi Gizaraʼeli, börö me no ihuku ita faoma tangania, simanö göi lowalangida Dagono.”
8 Börö daʼö, lafaʼoheʼö goroisa ba wangowuloi ira samatörö banua Wilisiti ba manofu ira, ”Hadia nifaluada ba Dawöla Lowalangi Gizaraʼeli andrö?” Lamane, ”Findrakö Dawöla Lowalangi Gizaraʼeli ba Gata.”+ Andrö wa lafindrakö.
9 Me no aefa lafindrakö, ihuku mbanua daʼö Yehowa faoma tangania ba ifawukaisi ira. Ibözi niha mbanua andrö faoma fökhö faʼaböla hogo, he iraono hegöi satua.+
10 Lafindrakö Dawöla Lowalangi sindruhu andrö ba Nekerona,+ hizaʼi me ofeta Dawöla andrö, muʼao niha Nekerona, ”Laʼohe khöda ba daʼa Dawöla Lowalangi Gizaraʼeli ba wamunu yaʼita hegöi soida!”+
11 Aefa daʼö, laʼowuloi fefu zamatörö banua Wilisiti ba lamane, ”Miʼohe Dawöla Lowalangi Gizaraʼeli andrö. Mifangawuli manö enaʼö lö mate ita hegöi soida.” Ataʼu mate fefu niha mbanua daʼö börö me ihöndrögö ira tanga Lowalangi sindruhu,+
12 ba göna fökhö faʼaböla hogo niha si lö mate. Muʼao fefu niha mbanua ba wangandrö tolo ba terongo weʼaora andrö irugi mbanua.
