Sara Samueli 6:1-21
-
Lafangawuli Dawöla ira niha Wilisiti ba mbanua Gizara’eli (1-21)
6 No fitu waŵa Dawöla+ Yehowa ba mbanua niha Wilisiti.
2 Lakaoni ndra ere hegöi samaʼeleʼö+ ira niha Wilisiti ba manofu ira, ”Hadia zinangea tafalua ba Dawöla Yehowa andre? Fatunö khöma hewisa lala wamuli yaʼia.”
3 Lamane, ”Na omasi ami mifuli Dawöla amabuʼula li Yehowa Lowalangi ndraono Gizaraʼeli, lö tola löʼö mibeʼe khönia zumange. Mibeʼe zumange fameta zala.+ Awena dania döhö ami ba miʼila hadia mbörö wa lö iböhöli wamözi yaʼami.”
4 Manofu niha Wilisiti, ”Hadia zumange fameta zala sinangea mabeʼe khönia?” Lamane khöra, ”Moloʼö faʼato zamatörö niha Wilisiti,+ mibeʼe lima ngawua wamaedo zogobuʼu ba waʼaböla hogo andrö nihaogö moroi ba ganaʼa, ba lima ngawua deʼu anaʼa, börö me no göna ami fökhö waba andrö hegöi ira samatörö yaʼami.
5 Mifazökhi nadu famaedo zogobuʼu ba waʼaböla hogo andrö hegöi adu famaedo deʼu+ samakiko nowimi, ba mifosumange Lowalangi ndraono Gizaraʼeli. Maʼatö iheta dangania ba wangöhöndrögö yaʼami, lowalangimi awö nowimi.+
6 Hadia guna miʼabeʼeʼö dödömi simane niha Miserai hegöi Faraʼo?+ Hadia tenga hulö nifaso ira+ ba wamofanö iraono Gizaraʼeli me no ibözi ira?+
7 Iadaʼa, mihenaigö goroba si bohou ba dua ngaʼeu nina zawi si lö irai monoro.* Mifaböbö zawi andrö ba goroba, mifasambua nonora ba mibeʼe ba kandra.
8 Mibeʼe yawa ba goroba Dawöla Yehowa andrö. Ba weti si so ba zingania, ba daʼö mibeʼe nadu anaʼa nibeʼemi dania tobali sumange fameta zala.+ Aefa daʼö, mifofanö zawi andrö,
9 ba mifaigi: Na numalö Dawöla andrö ba Mbeti-zamesi,+ sofeta ba mbanuania, daʼö dandra wa Lowalangira zameʼe khöda famakao andre. Ba na tenga, ba daʼö taʼila wa tenga tangania zamözi yaʼita, hizaʼi salua khöda andre si lö mudöna-döna.”
10 Daʼö nifaluara. Lahalö dua ngaʼeu nina zawi ba lafaböbö ba goroba, hizaʼi ononia labeʼe ba kandra.
11 Ba labeʼe yawa ba goroba andrö Dawöla Yehowa awö weti naha deʼu anaʼa ba adu famaedo zogobuʼu ba waʼaböla hogora.
12 Mofanö manö zawi andrö, muhöfu-höfu ira ba lala sofeta ba Mbeti-zamesi.+ Latörö manö lala sebua, lö laholeʼö ira ba gambölö mazui ba gabera. Laʼoʼö moroi furi ira samatörö banua Wilisiti ofeta ba nola Mbeti-zamesi.
13 Me luo daʼö, mamasi bua gandru niha Mbeti-zamesi ba ndraso. Omuso sibai dödöra me laʼila Dawöla andrö.
14 Ofeta goroba daʼö ba nowi Yosua niha Mbeti-zamesi ba tebato ba zinga gara sebua. Aefa daʼö, latataba geu goroba andrö ba labeʼe zawi no mege+ tobali sumange nitunu khö Yehowa.
15 Labeʼe tou Dawöla Yehowa andrö ira niha Lewi+ awö weti si so adu anaʼa ba zingania, ba labeʼe fefu yawa ba dete gara sebua andrö. Me luo daʼö, labeʼe zumange nitunu ira niha Mbeti-zamesi+ ba sumange tanö böʼö khö Yehowa.
16 Me laʼila daʼö, mangawuli ba Nekerona zondröniaʼö banua Wilisiti si dalima ba zi maʼökhö daʼö.
17 Daʼa wamaedo zogobuʼu ba waʼaböla hogo andrö nihaogö moroi ba ganaʼa nifaʼoheʼö niha Wilisiti tobali sumange fameta zala khö Yehowa:+ Sambua ba Gasoto,+ sambua ba Gaza, sambua ba Gasekalo, sambua ba Gata+ ba sambua ba Nekerona.+
18 Faʼoya deʼu anaʼa moloʼö faʼoya mbanua nifatörö ndra samatörö banua Wilisiti si dalima andrö, tefarahu ba daʼö mbanua nikölini hegöi banua sigide-ide si lö mufobaʼa-baʼa.
Kara sebua ba nowi Yosua niha Mbeti-zamesi ba nibeʼera Tawöla Yehowa andrö, daʼö zamaduhuʼö irugi maʼökhö.
19 Ibunu niha Mbeti-zamesi Lowalangi börö me no lafaigi Dawöla Yehowa. So 50.070 niha* nibunu ba gotaluara, ba abu dödöra börö me ato sibai nibunu Yehowa.+
20 Börö daʼö manofu niha Mbeti-zamesi, ”Haniha zanau ölö föna Yehowa, Lowalangi niʼamoniʼö andrö,+ ba hezo so mofanö ia wa iröi ita?”+
21 Aefa daʼö, lafatenge niha ba mbanua Giriati-yeari+ ba wamaʼema oroisa, ”No lafangawuli Dawöla Yehowa ira niha Wilisiti. Miʼaeʼe ba daʼa, miʼohe khömi Dawöla andrö.”+
