Sara Samueli 7:1-17
7 Tohare niha Giriati-yeari ba laʼohe Dawöla Yehowa ba nomo Gabinadabi+ si so ba hili-hili, ba laʼamoniʼö ba daʼö nononia sotöi Eleazari tobali sanaro Tawöla Yehowa.
2 No ara ba Giriati-yeari Dawöla andrö ikhamö 20 fakhe, ba fefu ndraono Gizaraʼeli ibörögö laʼalui Yehowa.*+
3 Imane Samueli ba ndraono Gizaraʼeli maʼafefu, ”Na sindruhu soroi ba dödömi mifuli ami khö Yehowa,+ miheta khömi lowalangi adu andrö+ hegöi adu Asaroti.+ Miʼosambuaʼö dödömi khö Yehowa ba ha yaʼia mifosumange+ enaʼö iʼefaʼö ami moroi ba danga niha Wilisiti.”+
4 Me larongo daʼö iraono Gizaraʼeli, latiboʼö nadu Mbaʼali khöra hegöi Asaroti, ha Yehowa nifosumangera.+
5 Aefa daʼö imane Samueli, ”Miʼowuloi fefu ndraono Gizaraʼeli ba Misefa,+ ba mangandrö ndraʼo khö Yehowa salahimi.”+
6 Ba owulo ira ba Misefa, lahalö nidanö ba lafaduwa föna Yehowa,* fuasö ira ba zi maʼökhö daʼö.+ Lamane, ”No mafalua horö föna Yehowa.”+ Ibörögö tobali sanguhuku Zamueli+ ba ndraono Gizaraʼeli ba Misefa.
7 Me larongo ira niha Wilisiti wa no owulo ndraono Gizaraʼeli ba Misefa, möi lasuwö ndraono Gizaraʼeli ira samatörö banua Wilisiti.+ Me larongo daʼö, ataʼu ndraono Gizaraʼeli börö niha Wilisiti.
8 Lamane iraono Gizaraʼeli khö Zamueli, ”Böi böhöli weʼao khö Yehowa Lowalangida enaʼö itolo+ ba iʼefaʼö ita moroi ba danga niha Wilisiti.”
9 Lö ara, ihalö nono mbiri-biri Samueli ba ibeʼe fefu tobali sumange nitunu+ khö Yehowa. Iʼandrö wanolo khö Yehowa soguna ba ndraono Gizaraʼeli ba ifondrondrongo wangandrönia Yehowa.+
10 Me ibeʼe zumange nitunu andrö Samueli, lasuwö ndraono Gizaraʼeli ira niha Wilisiti. Iʼasogö weʼugu mbanua sabölö-bölö+ Yehowa ba wolawa niha Wilisiti, ifawukaisi ira+ irege lö lasöndra waʼamöna föna ndraono Gizaraʼeli.+
11 Möi baero ndraono Gizaraʼeli moroi ba Misefa ba wolohi niha Wilisiti, ba lö laböhöli wamunu yaʼira ofeta tanö raya Mbeti-kari.
12 Aefa daʼö, ihalö sambua gara+ Samueli, ibeʼe ba gotalua Misefa faoma Yesana, ba ibeʼe töi gara andrö Ebenihaezeri.* Imane, ”No itolo ita Yehowa irugi iadaʼa.”+
13 Simane daʼö waʼakala niha Wilisiti ba lö möi ira saʼae ba danö ndraono Gizaraʼeli.+ Sagötö faʼauri Zamueli, lö tebulö danga Yehowa ba wolawa niha Wilisiti.+
14 Baero daʼö, banua si no larabu mege ira niha Wilisiti moroi ba ndraono Gizaraʼeli, lafangawuli khöra iadaʼa, iʼotarai Nekerona ofeta ba Gata, ba lafuli lahalö danöra iraono Gizaraʼeli moroi ba danga niha Wilisiti.
So göi waʼatulö ba gotalua ndraono Gizaraʼeli ba niha Gamori.+
15 Lö manö tebulö Zamueli tobali sanguhuku ba ndraono Gizaraʼeli sagötö faʼaurinia.+
16 Ero röfi, ifasui Mbetieli,+ Giligala+ hegöi Misefa.+ Tobali ia sanguhuku iraono Gizaraʼeli ba mbanua daʼö fefu.
17 Si toʼölönia, mangawuli ia ba Rama+ börö me ba daʼö so nomonia, ba tobali ia sanguhuku iraono Gizaraʼeli ba mbanua andrö. Ifazökhi naha wanunu sumange khö Yehowa ba nahia daʼö.+
Nisura ba gahe zura
^ Mazui ”laʼalui Yehowa si fao fege-ege”.
^ Eluahania tandra wamalalini era-era.
^ Eluahania ”Kara Wanolo”.
