Sara Samueli 8:1-22
8 Me no atua Zamueli, ifataro ndraononia tobali sanguhuku ba Gizaraʼeli.
2 Töi nononia siaʼa Yoeli ba töi nakhinia Abia.+ Tobali ira sanguhuku ba Mbere-seba.
3 Hizaʼi, lö laʼoʼö lalania iraononia. Laʼalui hare ba walimosa,+ latema zölö-sölö+ ba lafuyuʼö huku.+
4 Lua-luania, owulo fefu zondröniaʼö iraono Gizaraʼeli ba laʼondrasi Zamueli ba Rama.
5 Lamane khönia, ”No atua ndraʼugö, ba lö laʼoʼö lalamö iraonomö. Börö daʼö, fataro khöma samösa razo si tobali sanguhuku simane soi böʼö.”+
6 Fatuwu khö Zamueli* me lamane, ”Beʼe khöma samösa razo si tobali sanguhuku,” ba mangandrö Zamueli khö Yehowa.
7 Imane Yehowa khö Zamueli, ”Fondrondrongo fefu niwaʼöra andrö. Tenga yaʼugö nitimbagöra. Yaʼo nitimbagöra si tobali razo khöra.+
8 Nifaluara andre, lö aröu faböʼö simane nifaluara ba zilalö, iʼotarai me uheta ira ba danö Miserai ofeta maʼökhö. Lö tebulö wangerogöra yaʼo+ ba lafosumange lowalangi böʼö.+ Daʼö göi nifaluara khöu iadaʼa.
9 Fondrondrongo niwaʼöra. Hizaʼi, haogö fangelama ira. Fatunö khöra hadia nifalua razo samatörö yaʼira.”
10 Börö daʼö, ifaʼema Samueli fefu daromali Yehowa ba soi sangandrö razora khönia.
11 Imane khöra, ”Daʼa nifalua razo samatörö yaʼami:+ Ihalö nonomi matua,+ ibeʼe ira ba gureta wasuwöta,+ ibaliʼö ira saradadu si fakudo.+ So nifataronia si fagohi föna gureta wasuwöta andrö khönia.
12 Ifili dania gumandru zi saribu+ hegöi kumandru zi lima wulu.+ So göi dania zamaku nowinia,+ samasi,+ ba samazökhi fakake wasuwöta awö fakake guretania.+
13 Ihalö dania nonomi alawe tobali samazökhi fanikha somuhua, sondrino, ba sangehaogö roti khönia.+
14 Ihalö mbua nowimi sabölö sökhi, kabu nagu hegöi kabu zaitu khömi,+ ba ibeʼe khö ndra sawuyunia.
15 Ihalö zi sambua niʼofulu moroi ba mbua nowimi awö kabu nagu khömi ba ibeʼe khö ndra samatörö hegöi sawuyunia.
16 Ihalö göi zawuyumi ira matua ba sawuyumi ira alawe, urifömi sabölö sökhi awö galide khömi ba ibaliʼö sohalöwö khönia.+
17 Ihalö zi sambua niʼofulu moroi ba mbiri-biri khömi+ ba tobali ami sawuyunia.
18 Ba luo daʼö mangarö ami börö razo nifilimi andrö,+ hizaʼi lö ifondrondrongo Yehowa.”
19 Lö lafondrondrongo niwaʼö Zamueli soi daʼö ba lamane khönia, ”Löʼö, omasiga na so razoma.
20 Omasiga na simane soi böʼö ndraʼaga, ba tobali sanguhuku yaʼaga razoma andrö, sondröniaʼö yaʼaga ba si fasuwö salahima.”
21 Me no irongo fefu niwaʼöra andrö Samueli, ifuli ifaʼema daʼö khö Yehowa.
22 Imane Yehowa khö Zamueli, ”Fondrondrongo niwaʼöra ba fataro samösa razo samatörö yaʼira.”+ Aefa daʼö imane Samueli ba ndraono Gizaraʼeli, ”Miʼangawuli ba mbanuami zamösana.”
Nisura ba gahe zura
^ Sin.: ”Lö sökhi ba wamaigi Zamueli”.
