Sara Samueli 9:1-27
-
Falukha Zamueli khö Zaulo (1-27)
9 So samösa mado Mbeniami+ sotöi Kisi,+ ono Gabieli, ono Zeroro, ono Mbekhorati, ono Gafia, ba yaʼia andrö niha si kayo sibai.
2 So nononia sotöi Saulo,+ awuyu-wuyu nasa ba no siga-siga. Yaʼia wondrege zi siga-siga ba Gizaraʼeli ba alawa manö ia moroi ba niha böʼö, ha falalawa galisinia ira.
3 Me taya galide si alawe khö Gisi andrö ama Zaulo, imane Kisi khö nononia Saulo, ”Ohe awöu samösa zohalöwö ba miʼalui hezo numalö galide andrö.”
4 Ba latörö mbanua si so ba hili Geferai ba tanö Zalisa, ba lö lasöndra. Lataluʼi danö Zaʼalimi ba lö hadöi kalide andrö ba daʼö. Latöröi fefu mbanua mado Mbeniami, ba lö lasöndra.
5 Me ofeta ira ba danö Zufi, imane Saulo ba zohalöwö khönia, ”Mangawuli ita. Ma dania iʼalu-alui ita amagu, lua-luania tenga kalide andrö zi so ba dödönia.”+
6 Imane sohalöwö khönia, ”So genoni Lowalangi ba mbanua daʼa, niha nifosumange. Fefu niwaʼönia hasambalö itörö.+ Möi ita ba daʼö, te tola ifatunö khöda hezo möi ita taʼalui.”
7 Imane Saulo ba zohalöwö khönia, ”Na möi ita ba daʼö, hadia nibeʼeda khönia? Lö hadöi khöda roti ba mbola-bola. Lö hadöi buala si tola tabeʼe khö genoni Lowalangi sindruhu andrö. Hadia zi so khöda?”
8 Imane sohalöwö andrö khö Zaulo, ”So nasa sambua tö khögu loga firö.* Ubeʼe dania khö genoni Lowalangi sindruhu andrö ba ifatunö khöda hezo möi ita.”
9 No toʼölö ba ndraono Gizaraʼeli mböröta na so zomasi mangalui Lowalangi lamane, ”Aine, möi ita khö zangiʼila,”+ börö me daʼö döi zamaʼeleʼö mböröta, sangiʼila.
10 Imane Saulo ba zohalöwö khönia, ”Sökhi niwaʼömö andrö. Aine, mofanö ita.” Möi ira ba mbanua si so enoni Lowalangi sindruhu andrö.
11 Me lasösö hili numalö miyomo ba mbanua, falukha ira ndraono alawe si möi manaʼu idanö. Manofu ira, ”Hadia so ba daʼa zangiʼila+ andrö?”
12 Lamane iraono alawe daʼö, ”So, hiza ia föna ba daʼö. Miʼaliokö, möi ia miyomo ba mbanua maʼökhö börö me lö ara tö tohare niha sato ba wameʼe sumange nitunu+ ba nahia salawa.+
13 Na mirugi dania yomo ba mbanua, miʼila ia fatua lö möi ia manga ba nahia salawa. Lö manga niha sato na lö yaʼia börö me yaʼia zamahowuʼö sumange andrö. Miʼaliokö wofanö enaʼö falukha ami.”
14 Ba mofanö ira miyomo ba mbanua. Me awena larugi, ifaondragö ira Samueli ba numalö ira ba nahia salawa.
15 Sahari fatua lö tohare Zaulo, no ihenaigö ifatunö Yehowa khö Zamueli,
16 ”Ba ginötö simane daʼa mahemolu, so samösa nifatengegu khöu niha moroi ba mado Mbeniami.+ Bayoini ia tobali sondröniaʼö ono mbanuagu Izaraʼeli,+ ba yaʼia dania zangefaʼö ono mbanuagu ba danga niha Wilisiti. No anehe ndraʼo wamakao nono mbanuagu ba no urongo weʼaora.”+
17 Me iʼila Zaulo andrö Samueli, imane khönia Yehowa, ”Daʼa niha niwaʼögu khöu me umane, ’Yaʼia dania zamatörö ono mbanuagu.’”*+
18 Möi Zaulo wamalukhaisi Samueli ba mbawa göli ba imane, ”Uʼandrö khöu, fatunö khögu hezo so nomo zangiʼila andrö?”
19 Imane Samueli, ”Yaʼo zangiʼila andrö. Midari-dari miyawa ba nahia salawa, ba fao ita wemanga maʼökhö.+ Mahemolu sihulö wongi ufasaoʼö na mangawuli, ba hasambalö ubeʼe wanema li ba wanofumö.*
20 Böi miʼabusi tödö galide si taya andrö me tölu hari silalö.+ No musöndra fefu. Haʼökhö nasa fefu gama-gama sebua böli andrö ba Gizaraʼeli? Hadia tenga okhötamö ba okhöta nösi nomo namamö?”+
21 Imane Saulo, ”Hana wa öwaʼö khögu zimane daʼö? Hadia tenga niha Mbeniami ndraʼo, mado fondrege zide-ide ba Gizaraʼeli,+ ba ösi nomogu göi fondrege zi lö eluaha ba mado Mbeniami?”
22 Iʼohe ira Samueli ba nahia wemanga ba ibeʼe ira ba nahia sabölö sökhi ba gotalua niha nikaoni ba wemanga andrö, so mato 30 niha waʼato.
23 Imane Samueli khö zondrino ba daʼö, ”Ohe ba daʼa zi no ubeʼe khöu, niʼandrögu enaʼö öfasambua.”
24 Borö daʼö mofanö zondrino andrö ba wangai nagole waha hegöi nagole si fao khönia ba itouʼö föna Zaulo. Imane Samueli, ”Diwo daʼa nitenagögu öu. Lau manga börö me no lahenaigö ia soguna khöu ba ginötö daʼa. No ufatunö khöra wa so domegu.” Ba manga Zaulo maʼökhö daʼö fao ira Zamueli.
25 Lö ara, mangawuli ira mitou ba mbanua moroi ba nahia salawa andrö,+ ba lö iböhöli Samueli wahuhuosa khö Zaulo ba dete nomo.
26 Maoso ira sihulö wongi daʼö ba me no moluo, mohede Zamueli khö Zaulo yawa ba dete nomo imane, ”Faʼanö ndraʼugö, möido ufasaoʼö wangawuli.” Ifaʼanö ia Saulo ba mofanö ira.
27 Me möi ira mitou ba zinga mbanua andrö, imane Samueli khö Zaulo, ”Waʼö khö zohalöwö khöu+ enaʼö idari-dari wofanö.” Borö daʼö idari-dari wofanö sohalöwö andrö. ”Hizaʼi, ozizio ba daʼa enaʼö tola ufatunö khöu niwaʼö Lowalangi.”
Nisura ba gahe zura
^ Mazui ”zondrorogö ono mbanuagu enaʼö lö möi ira baero”.
^ Sin.: ”hadia fefu zi so ba dödömö”.
